المراجل صعيبة ما تروم الزهيد

المراجل صعيبة ما تروم الزهيد

المراجل صعيبة ما تروم الزهيد = ما يشيل الحمول إلا رياجيلها
المراجل تبي عزم يفر الحديد = لين تركب على السنة صواميلها
المراجل تبي مال وعقل رشيد = وسيف حق نذر بالعدل تكميلها
كان مالك وجود بالمصيب الأكيد = لا ترجى ضياها من قناديلها
وكان منته عزيز النفس خلقك حميد = كيف تامن زعلها قبل تدليلها
دوك مني وصايا يقبلنّ المزيد = واقع الوقت ما يسمح بتأجيلها
وقفة بالنهار القمطرير الشديد = بالمهمّات مثمرةٍ محاصيلها
وفزعةٍ للفقير المستعف الوحيد = عند رب الملا ترجح مكاييلها
ولا تفرّط بقرمٍ صافيٍ لك عضيد = لين تقرءا الأدلة وش مداليلها
وطاعة الله هي الحبل المتين الجويد = محكماتٍ حلقها في مقافيلها
وان نصاك ابن عمك من مكانٍ بعيد = فوق من تطوي البيداء محاحيلها
لاتهاون ترى الدرب الصعيب المكيد = يشفي النفس من علّة بهاذيلها
دمعةٍ من ظروف الوقت فوق الجليد = ماتت الفيزياء في سر تحليلها
ونقطتين من دم الوجه عند البليد = تجرح الكبد وتجدد غرابيلها
كان جاهك ومالك مايفك الضهيد = لا تلوم الرجال اللي طفح كيلها
لعنبو الواسطة كم علّقت من هريد = ما يشيل الخشاش إلا زنابيلها
من تجرّع تجاريب الزمن يستفيد = من دروس الحياة وعدلها وميلها
كان مانته برايك صيرميٍّ أمجيد = ونظرتك للأمور يجوز تبديلها
شاور اللي برايه عبقريٍّ سديد = لرسم خطّته قفّل مداخيلها
والسبب لا بذلته قاصدٍ ما تريد = الصعيبات عند الله تساهيلها
والتمني وليت ولو ماهي تفيد = ما تسر الزنود اللي فتر حيلها
وان جفاك الزمان وقام هجره يزيد = غير رب الملا بلواك ما يزيلها
مجلسٍ فيه قدرك ما يغيض الضديد = مسرحٍ للظنون اليا سرجت خيلها
موتت الحر في برج المعزة شهيد = خير له من حياةٍ طال تذليلها
جازلي بيت شعرٍ من بيوت القصيد = حكمةٍ من خلف مشعان ترتيلها
كان مانته وفير المال عندك رصيد = صورتك مايحب الناس تجميلها
ياوجوداه ياجيبٍ يعسف العنيد = ما يهاب الفلاة اللي درج سيلها
لرهجنّ الضلوع وحال وقتك سعيد = عزبتك لربعة في موخره شيلها
ثم سوقه ثمان أيام بالوجه سيد = لين نفسك تطيب وينجلي ليلها
دام بالجسم عزمٍ يحتمل للمديد = الهواية تغنّي لي وغنّي لها

نافع الحربي

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

صح لسانك

كلماتك غايه في الروعه

أحييك على هذا البوح المتميز

دمت ودام شعرك وبوحك

	المشاركة الأصلية كتبت بواسطة الحب الباقي

	صح لسانك مليون على القصيده والله يـعـطـيـك الـعـافيـــــــــــة بيض الله وجهك

الحب الباقي هلابك وصح بدنك ووجهك ابيض
اسعدني وسرني حضورك وتعليقك لاهنت :

	المشاركة الأصلية كتبت بواسطة ابومشعاب الحربي

	صح لسانك كلماتك غايه في الروعه أحييك على هذا البوح المتميز دمت ودام شعرك وبوحك

ابو مشعاب الحربي هلابك وصح بدنك اشكرك
اسعدني وسرني حضورك وتعليقك لاهنت :

صح لسانك اخوي نافع الحربي

وسلمت يمناك ع الجزله

لاهنت

صح الله لسانك
ولاهنت

ابو الفوز هلابك لاهنت

	المشاركة الأصلية كتبت بواسطة سعودية

	صح لسانك اخوي نافع الحربي وسلمت يمناك ع الجزله لاهنت

اختي سعودية هلابك ولا عليك زود
لقد شرفني حضورك وتعليقك شكرا لك :

ابو بدر صح لسانك ملايين وهذه القصيدة لاتقل عن سابقتها جزاله 00 هنا الحكمه وهنا الجزاله 00

أبحرت مع طواريق هذه الشامخه كثيرا متميزه جدا وتعرف رأيي مسبقا بها 0

دمت كما تحب 0 بناخيك