ياعمر من عذر المطاعم تحييك

السلام عليكم ورحمة الله وبركاته
موضوع هذه الابيات عن محاربة بعض الاطفال لطعام المنزل وعدم قبوله مهما كانت درجة لذاذته و جودته وتفضيل اكل المطاعم والبوفيات عليه وهذه مشكلة تواجه بعض الاسر ولديه ابن لايمكن ياكل إلا وجبة المطعم وذات يوم كنا في طلعة بر واشترط الغداء من البخاري فاعطيته قيمة الغداء ونزل الي المطعم واخذ المطلوب ورجع وهو يبتسم مرتاح سالته وش السالفه قال صاحب المطعم رحب بي اول مادخلت وزهمني باسمي قلته طبعا ياخوي انت عميل دايم لازم يرحب بك على طول وبهذه المناسبه قلت هذه الهجينيه في عميل المطاعم المحترم لعل وعساء ان يقلع عن ماتعود عليه

ياعمر من عذر المطاعم تحييك=حيثك عميل(ن) عارفينك ودايم
لكن طبخ امك عدو(ن) معاديك= دايم مبوز عن لذيذه وصايم
الزول نتفه يازعيم المهاليك=كنك من اللي في هواء البيض هايم
يم البخاري لو رفضنا نوديك=تموت جايع يانحيل القوايم
لاشك لازم يالضعيف نداريك=ولا يلومنا في حب شرواك لايم
ماهو غلا إلا نقبل مواطيك=ولاهو موقت حب ثابت ودايم
اطلب ومطلوبك نجيبه ونرضيك=مدام فينا باقيات العزايم
وفي عطلة الاسبوع حتما نمشيك=بر وبحر وإلا زيارة رحايم
لعل ماتفقدك عيني وتبكيك=ويرعاك من لانمت ماهو بنايم
وحنا برجوا الله وبعده نراجيك=إليا كبرت وصرت رجال قايم
امك ثم امك ثم بامك نوصيك=تسعة شهور بطنها وانت عايم
وخرجت للدنيا وهي هايمه فيك=عليك تخشا من هبوب النسايم
لاصحت ضجت من صياحك تواسيك=ولاهي تنام إلا انت قافي ونايم
مامثلها مخلوق فالكون يغليك=ياذخرها رد الجزال القدايم
وعن خوة اللي خوتك ماتهقويك=اللي عن الجزله رضا فالهلايم
خذرا وحذرا يالسنافي يماشيك=في خوته مانت بلاقي غنايم
اما رماك وشربكك فالشرابيك=والبسك لو انك بري التهايم
ثم تبتلش وتدور اللي ينجيك=وتصير علكة صايغين الظلايم
وحذرا القطوع بوالدينه يخاويك=اللي يكيل لوالدينه شتايم
الله من مده يمدك ويعطيك=وعزيز عن مد المخاليق شايم
والله لنا يصخر جنابك ويهديك=ياشوفنا ياسمعنا يالقوايم