ردي على الشاعر والمنشد المعروف بدر العريمه

قصيدة الشاعر والمنشد المعروف بدر العريمه

اصبرت لين ان الصبر صار عاده = امشي مع العالم وانا بخاطري شي
اخطيت مدري عمد ولا اراده = ومدري ليا هالحين لو كنت مخطي
مير المهم اني فقدت السعاده = بعد هنوفاً كل نضراتها لي
تمشي مشي جندي امام القياده = خطوه بخطوه قاصره يوم تمشي
اثر التسرع شين عكس الركاده = ياليتني ركدت فكري وبالي
واثر الزمن يفرض عليه عناده = ويعذب القلب المعنى ويكوي
ناجيت وقتي واعترض لي زياده = واشار لي شور مبارك ويعني
قال انت لك صاحب ندا قلت ناده = ندا يحل معقدات الملاوي
حيرني الموضوع وابغى الافاده = من شاعراَ لاصخر القاف يكفي
ان طب فالميدان يلقى الاشاده = وبالطيب بين الناس طيَب ويوفي
من يزرع المعروف يلقى حصاده = ومن مايحب الطيب في خلقته سي
انا يابو سامي نسيت الوساده = ليه ثلاث ايام بالضبط ما اغفي
لاهب ذعذاع الشمال وبراده = سالت همومي سيلة الدمع والمي
ليت الحدث فديو واعيد الاعاده = ولاصير عبره لاهل الحب والغي
نظرات مفتونه ونظرات ساده = وانا جذبني نظرتن فاتنه في
والله ما انسى شوفته والقلاده = مادام له نسخه بعيني واناحي
وانت التمكن فيك بالشور عاده = وانا بشورك قبل تبديه راضي

وهذا ردي على الشاعر بدر

الصبر للي فيه عزم وجلاده=عواقبه تحمد وتثمر وتشفي
صبر الفتى مافيه عيب ونقاده=على الظروف القاسيه مثل ماهي
واليا انفتن قلبك بنظرات غاده=وبأوصاف فاتن جسمها بأجمل الزي
نظره بلا مصلوح هم واباده=مامن وراها غير جرحٍ بقا ني
ابعد عن ادروب الشقاء والقراده=قبل الغرام يحط في خافقك كي
الحب مثل الليل يرهب سواده=ويكون بعض احيان شجره بلا في
لاشك يعرف بالشقاء والنكاده=مثل مايعرف بالكرم حاتم الطي
الا اذا ترجي وراها استفاده=حاجه على وضح النقا مابهاشي
ابشر بعزك والرجل واجتهاده=اساعدك بالجاه والمال ويدي
لو ان ماكلٍ يحقق مراده=كم واحدٍ من لوعة الحب يشكي
قبلك تعبت من الغرام وجهاده=وش عاد لو قلبي محصن ومحمي
يالشاعر اللي نادرٍ بانفراده=ابيات شعره بالجزاله لها ضي
ويضفي على جمال شعره انشاده=اليا شدا بالصوت غيّر طواري
عندي على طيبه وصيته شهاده=اقولها من قلب والعلم مقفي
بدر العريمه شعلته من زناده=الطيب ورث له من الميت للحي
تم الكلام اللي على الجزل قاده=شاعريميز ذيك من ذيك من ذي
ولاينفع الانسان غير العباده=هذا الكلام الصح ماهو بمنفي