ديوان الشاعر على غلاب الجابري

سلام تسليم الوفاء يالحويفي=من خاطر"صوغ القوافي يشوقه
يابدر برق الوسم جاله رفيفي=مزنه من المنشا الهبايب تسوقه
مزنن ورى مزنن ومزنن رديفي=ركز نصوبه واستناضت ابرقه
وحس الرعد يابدر جاله رزيفي=وملأ المحاجر والمخايل حقوقه
ملا الخباري والقطاله رفيفي=على الخباري زايدات"فروقه
يابدر ابو سلمان عيدي وريفي=سج القدم غب المطر مع شروقه
على شروق الشمس والأرض ريفي=والعشب بالريضان مالت عذوقه
قلبي لذعذاع الهبايب وليفي=لا ذعذع الغربي ينشط نشوقه
في راس مرجوم" طويلن منيفي=قلبي على مبداه يزداد شوقه
وانته على طرد الولع يالحويفي=حر"شهر مايرد عنه سبوقه
لاكن ابي خوتك وتصير ضيفي=الجيب جاهز والمعاميل فوقه
وارد مديله من حفيزه نضيفي=وفي شايت الله ماش شي يعوقه
وليا لقينا اثر حباري نقيفي=والطير نطلق يالحويفي سبوقه
ويطيب كيفك يالحويفي وكيفي=العلم صامل والنوايا صدوقه

ياذيب وهنيك ترود المراقيب=وليا بغيت تويق تقدر تويقي
تأخذ هواك امع السهال العباعيب=وتمشي لحالك لومالك رفيقي
مالك هدف ياذيب ولا مطاليب=الا الحلال اليا ضوى للفريقي
وترضا على مايقسم الله ياذيب=منته على مافات مثلي شفيقي
وانا أتقضب مال كفي مقاضيب=حبلي قصير ولا ينٌجي غريقي
في حال ولابحال ليه مقاضيب=كفي مقاضيب" تفك الوثيقي
لاكن حادني عداه وزواريب=لوقلت كلمت حق عاقوا طريقي
أجامل المبغض اجازيه بالطيب=واصبر على عوجاه كنه شقيقي
أجامله حتى أقطع الشك بالريب=واضحك لو ان الضحك ماهو حقيقي
ولا انت ياذيب الخلى لك مهاذيب=تأخذ هوى نفسك وكفك طليقي
ياذيب وهنيك ترود المراقيب=وليا بغيت تويق تقدر تويقي

بديت بسم الله عزيز الجلالي=الواحد المعبود رب" عبدناه
مذري هبايبها ومنش الخيالي=جميع مابالكون يرجون حسناه
وخلاف ذاء ياحسين جاوب سوالي=بلي سمعت وشفت ماعرف معناه
عطني حلول المشكله لاتبالي=أنا أترك الموضوع ولا أتبناه
وش راي فكرك ياكريم السبالي=في من بعد كشف الحقايق عرفناه
عمن لسانه بالمجالس يلالي=ومن سمع قوله قال ياطيب مجناه
لوكان مايسواء سمول النعالي=تغتر فيه الناس والأمر لنثاه
يشذب رفيقه كان جاله مجالي=ويثني عليه إن حضر ون غاب يشناه
هو ما دراء أن الطيب عسر المنالي=ولا كل رجلا" تكسب الطيب يمناه
مايكسب الطوله قصير الحبالي=لوكان يملك قاصي الكون ودناه
من عافنا عفناه لو كان غالي=ومن لا يدانينا ترانا ماندناه
من عافنا لوهو رفيق" أموالي=نبديله البغضاء ولن زعل زدناه
ون جاء نهار" فيه طامن وعالي=نارد على العد الروي ماحتريناه
ولا ترى الطَيب بعيد المدالي=نعتز فيه ولو غلط ماكرهناه
نعطيه حقه بالوفاء والكمالي=ولوكان به عيب" يعيبه كنيناه
والخاتمه ياحسين هاذا مقالي=عن ما سمع سمعي وبالعين شفناه

أنا هوايه طلعة الرجم ياعبيد=مبداه والله صار عندي عباده
اسير حب البر ومطارد الصيد=وفي طلعة المرقاب عندي سعاده
واحب خوت ناقلين البواريد=اللي لهم بمطارد الصيد عاده
واحب دارن سيلها جا تراديد=دارن سقاها الوسم وبله زياده
يلقابها القناص بالصيد مايريد=ويلقابها المهموم غاية مراده
هذا هواي وكل ما احتاج واريد=يومن كلن بالحياه له اراده

ياعبيد سوق الجيب ياعبيد سوقه=الجيب سوقه وحفظ الدرب ياعبيد
انصا بنا مزنن تلاعج بروقه=تلقى الخباري في سهال الجراهيد
يوم الردي ياعبيد تقصر سبوقه=عن طلعة المرقاب والمشي بالبيد
عسى الردي ياعبيد ربي يعوقه=عساه مايفلح ولا يكسب الفيد
وبعد بناء عن منَ يفتح شدوقه=أهل النفاق مكثرين المناقيد
اللي لجاء بالمجلس يقوم سوقه=ويصير شيخ "للرخوم الرعاديد
هذا ينافقبه وهذا يعوقه=واللي ينافق عنده يصير له سيد
نفسي على شرواه ماهي شفوقه=اللي راعيت البيت تفقتله القيد
وصلات ربي عد نون يسوقه=على نبين شيد الحلق تشييد

سلام ياشبل الأسد بعرينه=سلام تسليم الوفا سر وجهار
يامير يازبن الدخيل وعوينه=الله ينجي والدينك من النار
أنته سعد طير السعد خابرينه=ذخر الحرار اللي لهم بالوفا أذكار
ضد الخصيم اليا لعبه قرينه=كسابت العليا طويلين الأشبار
ذخر الملوك أهل الحصون المتينه=في حكمهم نفخر على كل الأقطار
يامن على الطولات تسبق يمينه=حلال صعبات المهمات جبار
أشكي لكم قلب" تزايد حنينه=على طلوع الرجم في دو الأقفار
قلب" تولع من قدايم سنينه=بطرد الولع ماينفعه كثر الأعذار
يشفق لدارن للأثر فيه عينه=مع خوة اللي مثلكم شهم وخيار
خوة سعد ذخر السعد عارفينه=عوق الخصيم إن كان عمين الأبصار
على مديل ألفين مستوردينه=من مصنع اليابان عداده أصفار
يرتاح سواقه لصوت المكينه=ليا دق سلفه قبل تشتيت الأفكار
يبعد هموم اللي فواده حزينه=دنياه عنده ماسوت ربع دينار
هذا هوى قلبي ولاكن وينه=اللي يقرب دار ويبعد اديار
ورجل" سواتي ماقدر سد دينه=يصعب عليه أشراه يانسل الأحرار
وصلاة ربي عد ماضي سنينه=على النبي بعداد همال الأمطار

الله يعينك ياجيبي في مشاويرك=نوب" مع القار ونوب" مع الحره
كلن يسومك وأنا يالشاص مابيعك=لو زودو بالثمن ماأرخصك بالمره
لن صرت ناوي على المقناص بمشيبك=واصُل ديار" لنا يذكربها جره
ياسعٌد منهو بتال الليل يسريبك=مع تختخا" راحتي في برده وحره
يالشاص يشناك مثبورا" مايدريبك=يسرح ويضوي على بيته كما الذره
يشناك خبلا" مايدري عن مواصيلك=ينفخ لهاته وفيه الناس مغتره

ياناشدن راع الولع والمطاريش=طيور الحجل عنها تنشد أهلها
صيدي وعول الضلع وقت المغابيش=أطلع لها بدري بعالي جبلها
كانك تنوش عني العلم تنويش=ماني من اللي يقتنص في سهلها
وإن كان مالك في تهامه عراميش=دور عن تهامه وتلقى بدلها
وبهل المدينه لوتولعت حتى أيش=مايسقي الظميان شوفة ضحلها
الحر مثلك ينهظ وينفض الريش=يبدي براس النايفه عن وحلها
العلم واضح مايبى العلم تفتيش=مالله خلق نفسن وضيع عملها
وأنا أدري أنك من رجال" مداغيش=زيزوم لثقال الحمول وجملها
هذا حسب ظني ولاتقول ذا ليش=مايغني الفقران جمعت هللها
والخاتمه أعداد وبل الرشاريش=العذر لله ثم لك من زللها

لا والله ألا شبت النار بالكبد=شبت لهيب النار بين الضلوعي
وون ونت من نزل فوقه الحد=حد القصاص وباقيله سبوعي
على اللذي ياحسين مايبدي السد=هرجه معي يقطع ضمايه وجوعي
أنشهد أنه بين الأضلاع ورد=ورد غرامه بين حدب الضلوعي
أتلا العهد ياحسين به قبل مايشد=ولا ضنتي عقب شديده رجوعي
ولا لي جداء ياحسين غير التوجد=اليا ذكر ليه حسًين الطبوعي
هو اللذي حبه بقلبي تجند=وأصبحت له مرهون من غير طوعي

ماني على زلت رفيقي شفاوي=أدمح له الزله ولو زل ياحسين
يضحك حجاجي له ليا جاء لفاوي=وفزع معه في حزت العسر واللين
وصبر على عوجاه لوكان غاوي=وليا تمادى بالخطاء قلت له وين
اصير له مثل الطبيب المداوي=واكتب له الجرعات مابين قوسين
بالطيب اعالج مخطي الربع واوي=ودراه من زلت لساني عن الشين
ومٌاتشافى له جبت المكاوي=اكوي مرض قلبه وبكحله العين
وأغليه لونه بعيد ونحاوي=ورفا خماله في حضور المعادين
ياحسين ربعي مبعدين الهقاوي=ربعي بني جابر رجوم الشياطين
ربعي هل الميقاف بظرب الأهاوي=زبن الدخيل وبالمواقف سلاطين
أكفاهم الله من عظيم البلاوي=كسابت العليا من أول وهالحين