اهداء إلى البشاريه

السلام عليكم ورحمة الله وبركاته
تحية طيبة وبعد ...
اطرح بين يديكم قصيدة مدح في رجال البشاريه اصحاب الكرم والجود
ومهما كتبت وكتبت فلن ولم أوفيهم حقهم
واتمنى ان تنال اعجابكم ورضاكم
واعذروا قصوري
وللتحميل بالصوت اضغط على الرابط التالي :
http://www.5zna.com/download/33147bf405cac5fe.amr
لا اطيل عليكم لكم القصيدة :

يا قاف هلل واحتفل جاك التميز والجمال = جتك المراجل شامخه تمشي على منوالها
أبمدح احرار العرب وأبمدح فحول الرجال = ربع الجمايل والعطى ربع الفعل بافعالها
أقدم اشعاري لهم وأرفع لهم حتى العقال = تحية إعجاب وفخر بمزينه وبرجالها
وأخص راعين الوفى اهل المكارم والجزال = بشاريه نعم الأصل نعم الفصل بخصالها
لا قيل بشري افتخر وارقى على روس الجبال = لأن المراجل والكرم في كف بشري شالها
بشاريه دار النفايل مابها شك وجدال = بشاريه فوق البشر حتى الفخر يعنالها
بشاريه دار الأهل رمز الشكاله والخصال = حتى وسام المرجله والله بشري نالها
ولا ثار دخان المعارك واندلع نار القتال = بالدرع والسيف الحدب بشري كفو خيالها
وان جا التسامح والعفو في قصة البشري مثال = اللي عتق جاره ولا يرجي نياق بدالها
وأبي أخص بكلمتي نسل المحاديب الصقال = أربع من مزينه كما شهق القمم وطوالها
علي سليل المرجله بيرق شموخ واعتدال = بو فالح اللي للكرم ما مد إلا جزالها
والا شجاع ابن السمو للمجد عنوان وكمال = أبو حبيب المعتلي هالنايفه يرقىلها
وناحي عضيد الملتجي فكاك عقدات الحبال = أبو محمد ماتوانى يشيل ثقل جبالها
ومساعد اللي ساكن بوسط المعالي والطوال = أبو بدر وقت الفعل والجد هو رجالها
نعم القرايب والأهل ربع(ن) تشد الها الرحال = بشاريه دار العلى من شيخ حتى أطفالها
من زارع اللي ساكنين الجوف في وسط الشمال = أبعث قصيدي والعذر بقصور شاعر قالها
حرب العظيمه لابتي بالجود وسم ولا تزال = نجم السما الساطع كل نجومها تقدالها
ياناس هاكم كلمتي تجمد على أشناب الرجال = البشري لامن ارتكى للصعب شال ثقالها

وسلامتكـــم ...
أخوكم / مهند بن عابد الزارع .