ياليت من قال انا يسبق كلامه فعل شفناه

يقوله اللي ليا ما قاد قافِ زان معناه = يبني بيونه وهو في خالقه دايم رجاوي
اليا طرى ماطرى نظم القوافي راح ينحاه= وان شاف ماعاف بين محتوى القلب العناوي
في هاجسي خاطرة وانا اشتكي منها معاناة= واظن مثلي جميع الناس لجوا بالشكاوي
رفيقي اللي مقاطعني وانا شفي بلاماه =ادارجه لليام وهو يبي قطع العراوي
عميلي اللي وعدني وانتحى وانا اتحراه= حان الوعد للسداد وهو على النكران ناوي
صحيبي اللي بدت له حاجتي ماشفت مسعاه= يعلم بحالي وهو ماهو على الفزعة شفاوي
ياجيلنا اليوم عينت الرجال اللي لهم جاه= اللي يفوزون في دفع النوايب والبلاوي
اللي لياما عطوك العلم وانك قبل تقراه= تلقى البراهين للافعال ماهو قول غاوي
ياجيلنااليوم جيل الامس كان الصدق مبداه= كان الصفا والوفا عنوان للجيل الصفاوي
لوكا ن قليلهم يعرف كتاب الله وفحواه=لكنهم يفرقون الناس مدلل وغاوي
مهما يجي بينهم من علم قالتهم مسواة= المدعي يدعي والشيخ يفصل في الدعاوي
وان حان وقت اللزوم الصقر يبدي لك في مسراه= تلقى العلم فالسما مرفوع والمشرب عذاوي
وحنا قرينا الكتاب وكل مفضمونه عرفناه= لكن سير العمل ماجا على قدر الفتاوي
اليوم اشوف الرجل لاعطاك علم شوي ينساه= من بعد قل الحيا والسمت من وجه الحياوي
ياكثر منه تكلم والحصيل اعلم به الله = قول بليا فعل مثل البعير اللي رغاوي
ياليت من قال انا يسبق كلامه فعل شفناه= الياسمعنا الكلام الفعل جا قبل الهقاوي
حتى يعم الوفا والود بين الناس تلقاه= والناس تمشي على وضخ النقا سارح وضاوي
وختامها ذكر ربِ كلنا نرجي عطاياه= صلوا على من بعثه الله بالوحي السماوي