يمه دخيلك لا تموتين

هذه الابيات كتبتها قبل وفاة والدتي رحمها الله رحمة واسعة واسكنها فسيح جناته عندما كانت في العنايه بمستشفى الرس

يــمـه دخـيلـك لا تـمـوتـيـن تكـفـين = ردي عــلي الصوت لا تـفجعـيـني

عيشي فداك اللي بقـالي من سنيـن = للموت يا امي واللحــد قــدميــني

اما يا خذني يا حـيــاتي وتــبـقـيـن = وإلا يا خـــذني معــك ما تتركيني

لا تتركــيـني يا بعــيـدي وتمضيـن = عـنـــــي لا حي ولا مع الميتيني

لا تتركـيني يا امـي تـراي هالحين = امـوت واحــيــــا كلما تمرضيني

العـيـن يا بعـد النظـر اذرفت لين = جــفـــت وهـلــت دمـها يا معيني

اطرق لك باب اللي خلقنا من الطين = ويـدك الحنونه ما اطلقتها يديني

اظـمها بقـلبي يا قــلـبي وأنا بين = حـال الـرجاء والياس متناحريني

نوب الرجاء بك يا غـناتي يمنين = ونوب اختنق والياس عنك يحديني

ما تشيلـني لا جيت اغادرك رجلين = ارجــع قـبل بـاب العـناية يجـيـني

اسمع صدى صوتـك كــأك تنادين = تــعــــال ودع جـنـتـك يـــا جـنيني

تـعـال ويـلي عـنـك ويـلاه من وين = تلقى وأنا امك في عزاء يا ضنيني

تـعـال ويـلي عـنـك من لوعة البين = تقضي على فـرقاي عمرك حزيني

واصرخ بدون شعـور لا لا تموتـين = اثره غـــــلاك اللي يهرج يا وتيني

لـــو غـبتي الله لا يـقـوله عن العين = يا نور عيني اصبح الكــون شيني

والله ما عــاد اشوف بالكـون لونين = إلا اسود من الكحــل باقي سنيني

والله ما يـبقى من الفـرح لو تغيبين = فــرحـــه ولـو لأطـفـال معـيـديني

لوغبتي ياعيوني عن عيوني منين = لعــيــوني قرة عين يا نون عيني

[/font][/b][/center][/size][/color]