حفل معايدة قبيلة الغيادين بدخنة

15-09-10, 04:24 AM

أقام ابنــاء قبيلة الغيادين حفل المعايدة السنوي الثالث في استراحة التعاون بمدينة دخنة
وذلك أول ايام العيد 1/10/1431هـ والذي حضره جمعٍ غفير من ابناء القبيلة من مدينة وخارجها
والذي تضمن حفلُ خطابي وشــعـري وتـــكـريـــم لعدد من أبـنــاء القبيـلة والذين خدموا أفراد قبيلتهم

وأسمـــاء المكرمين كالتالي:

1_الشيخ/ الحميدي بن ذعار بن بتلاء

2_الشـيخ/ بندر محمد بن بـتلاء

3_ باين عايض الغيداني

4_المقدم دكتور/ عبدالعزيز عاتق الغيداني

5_ الرائد/ سعد عبدالرحمن الغيداني

6_ رئيس رقباء متقاعد/ هايف معجب الغيداني

7-الطالب العالمي / سعود دخيل الله الغيداني
( هدية جهاز لاب توب)

8_ إدارة منتديات الغيادين ( حمود نويفع الغيداني)

9_ القائم على تفعيل جوال الغيادين ( مشعل عتيق الغيداني) ابو شاهر

والان مع القصــــائـــــــد التي قيلت بالمنــــــــاسبة

قصيدة شاعر المناسبات / مساعد عبدالرحمن الغيداني

ياليلة في عيدنا عوادة=فيها اجتماع عايد كالعادة
طابت وسر الطيب في جمعتنا=فيها القصيد منومس قصادة
الله يقبل من صومكم ياربعي=في شهر خير ورحمة وعبادة
فالاجتماع نشوفكم ونسلم=والعيد فرصة نحتري ميعادة
وبالاجتماع نقول كيف احوالك=للي لفانا من بعيد اتلادة
وبالاجتماع نجيب نطرح فكرة=للفايدة ماهي بفرض سيادة
وبالاجتماع نرضي الزعلاني=وراع العناد يكب عنه عناده
وبالاجتماع نوضح المفهومي=حتى الوهم يقوم من مقعاده
وبالاجتماع نواسي المنصابي=حتى نشيله من كفوف انكاده
وبالاجتماع نهني اللي حصل=حتى يزود ويجتهد بزياده
ونقول للباقين سووا مثله=حتى يقوم النيم من مرقادة
وبالاجتماع تصير فرحة كبرى=برنامج تبحل به النقاده
حديث مع شيخ رفيع قدرة=لأباه واخوانه وكل اولاده
وقصايد فيها جديد الفكره=تقول لول جامعه صياده
فيه المجال مفتح بيبانه=والموهبه تلقالها نشاده
وأنا بهذا الاجتماع أناشد=اللي لهم بالطايلات رياده
يشيل همه مع هموم ربوعه=والموهبه يقدح لها بزنادة
دام الدروب مفتحه في وجهه=يدخل ويدخلنا بقدر اجهاده
ترى الرفيق اللي ربعه نفعه=النفعه اللي للسعد وراده
فرصه ليا جالك مجال تبذر=الطيب بالادنين يا حصاده
ربعك ليا عزيتهم تلقاهم=لادارت الدنيا وقيد القاده
كل ذكر ميقافك وعنز لك=مير ادرس الموضوع من ابعاده
قدام تصفق باليمين اليسرى=تبغى زمان ما حصل معواده
وتروح للي نفعتك راحت له=الاجنبي من بعد حصل مراده
ويقول ودي مير ربعي ابدا=دور قريب لك وصيح وناده
ثم اتذكر حجم ربعك بعده=بحساس ما قدمت في ميلاده
وأنا ما أقول الفزعه احتكروها=المسلمين احقوقهم وراده
لكن الأولى أولى وراع الفطنه=يحقق النيشان قبل زناده
واعود في قافي لشيء حاصل=لو مأنتشر لكن نخشى افساده
الظن من دون استناد لحجه=اخاف لا يكبر علينا ماده
وتكثر ظنون الناس حسب اهواها=يالين كل يستغش افواده
وتعكس على روح التظامن فرقه=وكل على الثاني يبث احقاده
ظن برفيقك خير تلقى ظنك=وإن ما لقيته مانقصك بعاده
ترى الرفيق حليل مهما يحصل=تلقاه لا بار الزمن باسياده
واعود في قافي لحاسد ربعه=ياشينكم شيناه يالحساده
ياحاسد ربعك تعذب روحك=نار عليك بسبتك وقاده
النعمه اللي جاتهم مكتوبه=من واحد يرزق جميع عباده
ما يلحقك نقص بسعادة ربعك=لكن من حولك تمن اسعاده
دام الحسود مع الغبن يكتب له=الاثم في نص ياقو سناده
اقول حسبها بعقلك واسلم=من واحد ينقص خوي زاده
وأنا ما اخص احد بعينه مره=مير القصيده يالبيب قلاده
اوصاف اوصفها وأحذر منها=للي لنفسه ما يمل جهاده
ولا ازكي النفس الضعيفه منها=نوب القصيد يصير في قصاده
الادمي يخطي وخير المخطي=اللي يتوب من الخطأ بايراده
والحمد لله نادره في ربعي=كل على العليا يعسف جواده
ربعي بمدحتهم يطيب المعنى=روحي ومدح الروح ماهي عاده
ليه لو ان الناس هبت فيها=كل يطير لابته واجداده
يالين صار المدح خذني جيتك=بسنا وألا خالي من اسناده
الحاصل انتم خابرين انفسكم=واحفاد من عقب وفاء لاحفاده
المدح ما حد بمسيرة وافي=طيبه قديماته تلتها جداده
والسب ما قلل بطيب الطيب=راع الشداد اللي زهاه شداده
وختامها جعل العياد مبارك=ويالله عساكم دوم من عواده

قصيدة الشاعر / عقاب لافي العـماني

نبي نشب نار بكل ضلعٍ بلا دخان=سوات القبايل وقت ميلاد شاعرها
وذا ديدن العربان في ماضي الأزمان=تعلّم بشاعرها وتشرح مشاعرها
مثل مايعد لكل منتج خبر وإعلان= تعد القبيله كل نار لمنابرها
تعد القبيله كل شاعر حزام آمان=وعلى قدرة الشاعر تعدد ذخايرها
ترى كل شاعر للقبيلة يعد لسان=يحامي عن احماها ويحصي مفاخرها
وحنا بوقتٍ مابه اسلاح للعدوان=سلاح القبايل في زمنا حناجرها
وذا الماقف اللي ماعنه عذر مهما كان=لا قدم زمانك لك ظروفك توخرها
وأنا الشاعر اللي مايبي فزعة الشيطان= ولو فزعة الشيطان بالشعر ماانكرها
وكم شاعرٍ يفتح خياله له البيبان=وكم شاعرٍ خيال فكره يسكرها
عسى الله مثل ماصخّر الريح لسليمان=لنا الشرّد اللي ماتصخّر يصخّرها
عسى الله يجيب الصورة البكر بالألوان=ما ابي الصوره اللي كل شاعر يكررها
ولوفٍ توالف كل شاعر بدون عنان=ولا طورت شاعر ولاهو مطورها
أبي اللي تذيّر قدمنا تقل فيها جنان=قبل شوفة الشاعر خياله يذيّرها
أبي اللي عليها تتعب خيولها الفرسان=على دربها هاذي معالم حوافرها
أبيها لاطبت في كبر ساحة الميدان=تمنى أفضل الشعّار لو كان شاعرها
أبي صيتها يسري قبل ساير الركبان=وياصل قبل لاتاصل اللي يدورها
أبيها تناسب موقفٍ كبر ضلع آبان=على نفس شاعر شرهة الربع خابرها
رجالٍ لهم في عالية نجد مجدٍ بان= فعولٍ يعجز الشعر ماهو بحاصرها
ماهو في قصيدة لو أولف بهم ديوان=ما سطر سطوره معجزاتٍ تسطرها
ماشالت بحور الشعر جمعة ذوي غيدان=تبا تصغّر الشعر وبحوره معابرها
شف المجد قام ايفصل لروسهم تيجان = وشف الطايله لنفوسهم كيف تأسرها
ومثل مايحطون الدسم في قصر دسمان=بقصر التعاون للتعاون نوادرها
ومثل مانغمض عين ونركب النيشان=نغمض عن أخطاء ربعنا ثم نمررها
ومثل ما يشال الدمع في داخل الأعيان= نشيل الجماعة فالعيون ونكبرها
ومن منهو الليله مهو شايش وطربان = جموع الجماعه عينه يسر ناظرها
ترى العيد يحسب في عيون الربع (عيدين)= لا جات الجماعة فالمعايد عن آخرها
وأنا ماغواني يوم كسّرت فالقيفان=لجل خاطر عيون الجماعة بكسّرها
جمعنا الوفا ماهو نظام وحقوق إنسان=ولا جابنا عاداتنا اللي نقدرها
ترى الراي يبقى أفضل ليا عاضده رايان=ولو اختلفنا آرائنا مانصادرها
بعد ما اجتمعنا . . أقولها بالفم المليان=الأرباح يمكن ماتعادل خسايرها
إذا صار جمعتنا هنا بس بالأبدان= وإذا نفوسنا عيت لاتنظف سرايرها
هنا يكون هذا الجمع صوري ولاله شان=سوات اجتماع أهل القبور بمقابرها
مضى وقتهم في داخل المقبرة جيران=وذي صورةٍ حية وحبيت أصورها
لزومٍ علينا جمعة قلوبنا من الآن=وواجب علينا قلوبنا أنّا نطهرها
علشان نبقى إخوان فعلاً لاقلت إخوان=وروابط أخوتنا الشّريعة مصادرها
ويد الله مع ايدين الجماعة وذا العنوان=وذي قاعدة ماياجب أنّا نغيرها
ومن شذ عن درب الجماعة هو الخسران= فلا يحسبنه يوم قفى مخسّرها
لأنك لو أخذت ابيمينك عشر عيدان=لو اتقول ابكسرها ترى ماانت قادرها
لكن لو تفرقها تغيّر هنا الميزان= على عود – عود- الطفل يقدر يكسّرها

الشاعر / مشعل عتيق الغيداني ( ابو شـاهر )

ليا بدى مشعل بداية قافه=يسمي الله قبل بدع لحونه
بسم الله اللي كلنا بنخافه=بين اصبعينه روحنا مرهونه
من بعد ذكر الله وحسن لطافه=بأقول ترحيب لكم توحونه
يامرحبا ترحيب فيكم كافه=عداد من طاف الحرم وركونه
وعداد هتان المطر وشعافه=يامرحبا ترحيبة موزونه
اشوف هالمحفل بكل اطرافه=هم ربعي اللي حظ منهم عونه
ياحظ منهو له نصير لحافه =وياحظ رأسٍ لو نصير متونه
عزالله إنا للشنب نتافه=محنا من اللي ضحكته بسنونه
واللي طمع فينا لقانا عافه=يوم الهييشه والمثارى لونه
ماهي سوالف فعل كل شافه=حنا هدمنا البيت فوق ركونه
حنا سكارى نجد حنا آفه=حنا مقابيس الوغى وجنونه
اصغر شنب فينا تجيك اوصافه=رجال وافي وان وقف تلقونه
في سد وجهي يحتمي ميقافه=ويجمل اللي لأعتزوا يلقونه
اليا رقى يرقى على مشرافه=واليا مشى كل العرب يتلونه
واليا رمى دايم يصيب اهدافه=ماهو من اللي رميته من دونه
اخذ سنام العز خلاّ اردافه=والحر تكفي نظرة لعيونه
هذا كلام العرف والعرافه=ماهو كلام اللي تطير جنونه
واليا ختم مشعل ختامة قافه=صلى على محمد وتم لحونه

الشاعر / محمد عبدالله جليل الغيداني

عاد عيد القبيلة كل عام جديد=وياعسى كل عام فيه متعايدين
بس نطمع من اللي نظموه المزيد=لجل يبقى التواصل بيننا كل حين
مر عيدين وتحقق بعض ما نريد=بس نبغى التجمع بالسنه مرتين
لاجتمعنا نفك من اللحام الحديد=ونبني اطول بروج بهمة الداعمين
والخطا لاحصل مره منه نستفيد=ونتركه درس يبقى عبرت للسنين
والامر بينكم شورى ورايا سديد=رشحوا من ترونه للأمانه امين
جيل يولد وجيل مع زمانه يبيد=والتهاون خطره اكثر على الغافلين
ونقطة الدم لاطاحت تنشف وريد=كيف لاضاع دم وضاعوا الاقربين
وكل رجل بليا رجال يبقى وحيد=لو ملى خزنته بالمال ماله يدين
مثل نخل بعد ما طال عود هميد=يبسته الهبايب منى يسار ويمين
الضما حول العذق الرطيب لجريد=هكذا يستفيد من الحياة الفطين
والتجارب اتبين مع مداها البعيد=وأدري ان الجميع برايهم مكتفين
لكن الراي والراي المقابل يفيد=وبالسياسة يقولون المقارن ثمين
وان تقدمت خطوه للورى لا تعيد=وقتك اللي كسبته فيه لا تستهين
والزمن ما توقفه النوايا بقيد=وكان ما تسبقه تصبح لقفله سجين
ودنا عقب هذا يصبح القول اكيد=مانبيها سوالف دامنا جالسين
المواضيع تطرح مير صارت جليد=فسروها لنا ياكبارنا الحاضرين
ياكثر ما نصفق للكلام ونشيد=ولكن اللي نبي للأن عيا يبين
ولا لقينا سبب مقنع لجل مانحيد=وليش مانعترف مادامنا مقصرين
وليه دايم نسمي الوقت هو العنيد=وليه ماناخذ العبره من السابقين

الشاعر الشـــاب / رائد نواف الغيداني

في نهار العيد تنساق التهاني=والتهاني بين خلان ورفاقه
فرحة الاعياد فيها شكل ثاني =باللقا والود باقه خلف باقه
كل عام وجمعنا في هالمكاني=وكل عام تزيد وتزيد العلاقه
كل عام وقدركم بين المحاني= كل عام ولايجي للحزن طاقه
فرحة الدنيا غشتني واستباني=هاجسٍ بيطول ماقرب فراقه
هيض لخفاق وأستسلم لساني=للقصيد وفي سواليف الصداقه
لين من قو الفرح مر وغشاني=السحاب اللي غمرني في عناقه
قمت اصب من العسل قاف ومعاني=وأستلذ بطعمه الي فيه ذاقه
إشهد وسجل ووثق يازماني=فرحة المشتاق من بعد اشتياقه
شوفة الغالين في عيد رمضاني =مايساويها رصيد ولا بطاقه