ديوان الشاعر بدر الهبيري

ياللي لعبت ولعبتك مدروسه =واتعبت نفسك راسم(ن) خطتها
ضحكتني بافكارك الملموسه=وارضيتني يوم اشرقت نكبتها
تبغى عليّ تجيبها معكوسه=وانا مدرس قبلك بحصتها
بدري عليك وربعك المتعوسه=عقبك طرحت بهمتي رايتها
مامنك خوف ولامن الناموسه=اللي كسرت جناحها وابرتها
خلك بدرب العالم الملحوسه=وابقى بنار(ن) شلتك شبتها
رد العلوم ونادم الجاسوسه=واكل الفطيس اللي لكم جابتها
يامجلس(ن) فطرة هله منكوسه=لحم العباد الغافلين اكلتها
ناس(ن) عن الدرب السوي محبوسه=مهدلها ابليس العور فعلتها
واعين مير عقولهم ملبوسه=تبطي ولاتبرابها شكتها
تنخربها من كل جنب السوسه=وعلى دروب اهل الحكي ودتها
ومادامها من غيضها محموسه=علي لازيد الغضا نيرتها
نفسي عن وجيه الخـَبَث محروسه = لو السنين القاسيه حدتها
يوم انها فيما مضى محسوسه=ماضرها مما جرى حرتها
لاشفتها في غلها مغموسه=عالجتها واصبر على علتها
واليوم لو هي بالقسا مغمومسه=ماني بناسي لو عصت عزتها
أعزها عن كلمة(ن) مدسوسه = واحرص لو اقدر باللغا ردتها
كم لحية(ن) من كلمتي مهلوسه=وتضرها لو قيل ماضرتها
مدافعي بالقاضيه متروسه=ياويل ناس(ن) باللقا ناشتها
لو انها في حربها مهووسه=مالومها لو دشرت حلتها
وانحت عن الهرج الهوج مخروسه=واستاذنت واقفت ولاعادتها
به ناس عقلياتها مركوسه=من ساسها مدري جرت عادتها
لو امرنا بيدينها منحوسه=ولاعليها لوم ياجارتها
من حسدها تقل انها منفوسه=ولو حصل شمس النهار اطفتها
تا تفترس لكنها مفروسه=وتبغى صعود النايفه واشقتها
يامدعي واحبالنا ممسوسه=دعواك ماهي مخلفه وزنتها
لو غرتك ماهي سوى دنفوسه=في ذمتي والناس مافاتتها
مير انتبه لو بيضتك مفقوسه =بالمقبله لاتعترض وجهتها
والكلمه اللي قلتها مطموسه=بيديّ لو بعض الرجال افختها
تمسي وعينك بالقدم مدعوسه=والصبح تشكي للعرب عمستها
ولاتلوم عيونك المعموسه=ترى ملامك يمها يبهتها
لومك يطاول نفسك المتعوسه=يوم اخلفت ميزانها نيتها
دنياك ياوجه النكد سنعوسه=قبلك رجال تطول ماطالتها
لو ان مابك يالهطل ناموسه =خوذ النصيحه يوم جت حزتها
لاتطب دار الا وهي معسوسه=ولاتهوش كبار ماهاشتها
وامش الدروب ان كانها مسيوسه=والا تراك ترد مع ساقتها

لاوافقن ّ العوج عوجا صريحه = بالله عليكم يآهل العرف شآقول
الصمت ضيم ولاهرجنا فضيحه = والعرض مدري ليه مايقبل الطول
اليوم اشوفه( بار )راع المنيحه=واشناه من فعله لو الهرج منقول
والله لآاذكيه مثل الذبيحه=لو مااعترف لي لو على شبه مدلول
العام اسمّيها ضمير ونصيحه=واليوم اسمّيها متاهات واحلول
عـَـلـَقـت والمخراج نزف القريحه=عسى قصيدي فيه الادراك مآمول
وانا مخاطبلي بوقتي شريحه = اخص واللي خص يلقى له اعقول
ولااشره على المترديه والنطيحه = لاواكب المنهاج ابو هرج معسول
لاقال لازم سالــْفـَـتـه الصحيحه =وان قلت قول يقول ماهو بمعقول
لامن هجيته يعتبرها مديحه =واليا مدحته قلـّب اعيونه الحول
هذّار والهذّار نفسه شحيحه = غير ان عقله بعض الاحيان مشلول
وان كان نفسي منه ماهي مريحه= لاعاد ينشدني على ويش مذهول
النفس شينه والنوايا قبيحه=واشتلتها من تيهتي هم واحمول
( على الرجى ) كم بحْت فيها فصيحه= لكن مغير الياس مجني ومحصول
والدْ عيني كل ماشفت ضيحه = واسْـمَـيتها في ضيعتي بااربع افصول
طرد السراب وعلة(ن) مستبيحه = للخافق اللي له زمانين مقتول
واليا نشقت لطايح الوسم ريحه = اجيه والقى القاع محمي ومنزول
ضاقتبي الآفاق لو هي فسيحه=والقيد بيديني مكبـّـل ومفتول
ولو السكوت اعلاج نفس (ن) جريحه =كان التزمت الصمت مبطي على طول
لكن سكوتي مِنه روحي ذبيحه = الصمت باب(ن) ,, مير ماهوب مدخول
اما اِفتحه والا فخذها صريحه = عساه يبقى طول الايام مقفول

طوّلت صابر كمْ وانا محتمل كمْ =
=مير الصحيح اليوم لله درّي
منكم لفن العوج بافعال وبفمْ =
=ولافيكم اللي للخطايا مقرّي
ومما تقولونه يبا الوصل يَحرَمْ=
=عليّ بالله حالف (ن) مايمرّي
كم لي وانا للغيظ صبّار واكظم=
=طالت وانا من طولها شفت ضرّي
والذمه ادري مالكم عهد وذمم =
=ولاتفرقون اليوم خيري وشرّي
والرد عنه يحدّني سلم وشيَم=
=يوم الردى في سلمكم مستقرّي
يوم ان مابوجيهكم يالهمل دم =
=مامثلكم فيه يتشرف مقرّي
قيلت ومن قال المثل جاد واَحكم=
=وادق وابلغ من حديث المقرّي
الطيّب اليا اخطا يقدّر ويحشم =
=يدمح خطاه وزلته ماتضرّي
والا الردي خشمه اليا زل يدقم=
=والناس كل(ن) من خطاه امتبري
للناس بين الناس شيمات وقـيـَم=
=ومن شذ وين اليوم يبغى يفرّي
لابد من عقب الفرير ايتحطم=
=ويحط وسط النار مهما يغرّي
طبع الزمان ولابها شك يابوَم=
=لابد من يوم(ن) عليكم يكرّي
الكرّه اللي تا توردكم الهم=
=والوقت شرواكم لزوم (ن) يعرّي
لاهدافكم ماهو موصلكم الذم=
=والذم عمره ماخبرنا يذرّي
لو تعبدون ابليس والقس الادغم=
=وترددون اللي يقول المعرّي
جتكم على الرّمه مصاقيل وجزم=
=وامّا عن المنهج كشفه التحرّي
واللي قبل ناره مع الناس تشعم=
=صد وخمدها يوم شاف التزرّي
ومخطف الهرجه عقب هذره انطم=
=وذيل الهزيمه جرّه اليوم جرّي
مير افطنوا باقي براكين واحمم=
=في حال والا حال صاروخ ذرّي
وانا ماجيب العلم خافي ومبْهـَم=
=لا والله الا بالحقوق امتجرّي
من دون حقي باللقا عالي اهمم=
=والخصم لابده بنصري يقرّي
والله وانا بن عيد ما اخسر ولا اهـْـزَم=
=لي ماقف (ن) يوم الملاقى يسرّي
يطرب رفيقي والعدو منه ينسم=
=والماد بحري وان بغيتوه برّي

أستشف ّ النور لو مابي سرور=
=كل ماشمس الضحى تبدي شعاع
ناقم الحاله واراعي كــل زور=
=لانطق به عيّ وامسى به يــــطاع
في زمـنــّا مـــــابقى للعلم نور=
=والعجب كل العجب فيما يـــــشاع
جا محل مــفـتـّـح العينين عور=
=والجهل راعيه مفتول الــــــــذراع
والنتيجه كــفـّت العين السبور=
= واقفل ابــــواب العتب طاري وداع
واكتفيت بمامضالي من حضور=
= واعتزمت البعد خوف امن الضياع
مكسبي عرفي لـــــــوافين الـشبور =
= والبقا في راس من للعرف راع
ما احتمل شوف الزمن فيني يبور=
= من بعد ماكانت فجوجي وساع
ولاخبرت الوقت والــــــدنيا تدور=
= لين شفت اللي تزعمها الرعاع
يامدوّرلك على حسابي عــــــبور =
=فالعيون اصبحت من سقط المتاع
لو تبا تصنع عذر ما انت امعذور =
= تمّـت الحسبه وطــوّيت الشراع
ماتت الشيمات من بين الصدور=
= لالقـــــــــي ولاثني ولارباع
من يخبْرالحيّ ملفاه الــــــقبور =
= ومــن يخبر الدون منزله الرفاع
مايعيش الحر في عش الـنسور=
=ولايموت العز من قلب الشجاع
الذليل يعيش ويموت مــحــَقور=
=والـــــــــكرامه كنز لكن مايباع
ياجماعه كيف دمي مايفور=
=والقضيه شـــــــقها فيه اتساع
حروة العامين واقف بالنحور=
= بالطليعه واول اصفوف الدفاع
ولاحسبت احساب جحاد وشكور=
= يوم بعض الناس غايته الخداع
والسموحه كان جا مني اقصور=
= والعطا يالربع قدر المستطاع
والمقصر بالمواجيب امعذور=
=يوم بان الزيف وانزاح القناع
بالردى مايستشير ولايشور =
= كود من طبعه مثل طبع الضباع

ياتاج المعالي والسمو بندر ابن سعود= المعذره كان الثقافات محدوده
أنا مادريت انك بلوس انجلوس مولود=وطفولتك في هاك الاجواء مفنوده
لو ادري درست الغاتهم وابذل المجهود=واخذت دوره بالأتيكيت مشهوده
واخاطبك في مايليق بقدرك المحمود=ياحضرة سمو المجد والعز والزوده
مفروض مثلك ينعمدله خدم وجنود=وتصير لك صفحات الاعلام مفروده
ومع المفكر والأديب وصنفهم معدود=ومجلسك عنداهل المقامات والسوده
ويقام لك حفل(ن) به المؤتمر معقود= لك والزلول الحمر لخطاك ممدوده
يا العالم اللي صرت في عالمك محسود=والاعلام مثلك من زمان امس محسوده
قهر ماعرفك الا بدر واخر العنقود=والصومعه لو قبل ماهي بمشيوده
عسى وقتنا اللي فات لو بالحلوم يعود=ويشوف بعض الناس الاحداث مجروده
ياهل ترى نسمع تنحّط ونفخ زنود=والا التبجح والتهاويل موجوده
ودي نشيلك لين نودعك وسط الذود =بعريعره والا صلاصل على جوده
ونجيبلك حر (ن)على صيدته مهدود=وتآصل مقانيصك ورى حد ساموده
أغديك تنسى عالم (ن) ماعليها زود= وترخـّـي اعصاب(ن)ٍ لها عام مشدوده
ترى التكلف بالحياه اخلف المعهود=وترى البسيط امن الحكي عالي الجوده
عش واحسب لمآ قول لايخلفك مقرود=لاخير في عمر(ن)ٍ تواليه ماكوده
ياكم نعيش ولانصل غاية المقصود=نبغى بلوغه لكن الطرق مسدوده
نتعب ورى الغايه ولاللتعب مردود=مهما بذلنا ماش لتعابنا فوده
إلى متى تسعى ورى العالم المفقود=وخيلك على درب المتاهات ملكوده
قبلك زمانك شيب العود والمولود=عمر ّ ورى الستين والعين مفصوده
من عقب ماكان المنا بالصعب معقود=وعينه تطاول قمة طويق والسوده
برك واقتنع في قسمته وارتضى الموجود=واراح القدم واختار عن سيره العوده
وكثر القليل بنضرته واللهود سهود=وهدى واهتدى من يوم ماعاصر الكوده
تغانم زمانك قبل شره عليك يعود=ترى افكارك اكثرها من الناس منقوده
وانا ترى لاني بضايع ولامجحود=لي منزله عند الكريمين محموده
لي رفقة(ن) ماهي برفقت عجم وزيود=رفقة صواريم(ن) على الطيب مهدوده
ماني بحاير يصفق الجال والجلمود=ولانفسي على بعضات الازوال محدوده
اشوم لاشفت العرب بالها محشود=مني ونضرات العجب شبه مقصوده
واليا حكى غيري هو الفاهم البالود=واليا حكيت تصير الاوضاع مرصوده
تعبت المنافق والحكي والنوايا السود=ولاعاد بصبر زود والنفس ملهوده
صبرت وتحملت الخطا والعذر منشود=واسكت واجامل والمحاذير مفقوده
صابر واشوف الشر مع ما صبرت يزود=حتى لقيت النار بالصدر موقوده
أثري على نفسي تحاملت دون قيود=واخذتها للضيق والناس مسعوده
ظلمتها بالسخط واللوم والمنقود=لعيون عنها دب الاوقات مصدوده
مير الصحيح اليوم ماشوف عنه صدود=لابدها تنذاع الاخبار مردوده
بعض العرب سيفه على حضرتي مجرود=لدناة كلمه والمحابيل منضوده
وعن غيري اغضى لين مايودعه مغمود=واخمر تقل علباه بالسوط مجلوده
هون على نفسك ترانا محنا هنود=ولاتمشي علينا العوج والهوج مسروده
على خبايا ماجرى والحروف شهود=بلغنا الرشاد وكلمة الحق مسنوده
حنا توكلنا على الواحد المعبود=يوم الوجيه البارده غصب معبوده
وجيه(ن)ٍ تطيب ووين ماتستحل تسود=ووجيه عفنه وين ماجات مسيوده
أنا غلطتي قبل ابتدي مارسمت حدود=لين ابتلشت بروس عسره ومعقوده
لدناتها والعود يقدح براس العود=واشوارها من خارج القطر معموده
نفسي جزت وانا على ماجزت ملهود=واشوفها في تالي الوقت مجهوده
يامقابل(ن) بحجاج من عرفته معقود= وعلوم احاليها رجيعه ومعصوده
هذا جواب(ن) ما انتضر من وراه ردود= هنا وقفنا والمضامين محشوده

ويل من عينه على دمعه كضوم=لو عباريها مثل وبل الغمام
مايفيده وان مسحها بالكموم=سيلها يملى محاجرها وزام
كنـّــها كنه من الدمع امعدوم=أو تقل دمعه على عينه حرآم
خوف لايدريبها راع العلوم=وان درى عنها تعذر بالزكام
عن كراها حدّها طيف الحلوم=وانجلى عن جفنها حلو المنام
للسهر فيها المواري والرْسوم=واِلـ شقاها كن غاشيها عسام
ليلها مابه ونيس الا النجوم=والنهار بجور واقعها ظلام
حالها يامن على حالي رحوم=لاتسرّ الناضرين ولا تلام
لاتعرّضها بصدَّتـْـك السموم=واتـْـحَدَاها يا نضرها للعدام
لو خـَـطيت وقلت مالي بك لزوم=عن مرد القول يكفيك الهيام
ضاقت الدنيا بصاحبك الكتوم=وانطوى واغدى مفاتيح الكلام
وانزوى بين التخيّـل والوهوم=واعتراه الخوف واشقاه الملام
ينتظر علّ انتظاره مايدوم=واعذابه كان به طال المقام
ليلته ظلما واحاليه امهزوم=وايّـتـنهـّـد يوم خلق الله نيام
ضايقه فيه المسالك واليموم=وين مايمشي تقـفـّـاه الحيام
كل مالد النضر غيضه يزوم=والضنون لوقـْعها وقع الحسام
ماتخلـّـف عن مراكيب العموم=لين ماراحت طموحاته هدام
قام يلـْعِـي في طرفها كل بوم=واستدار الحظ ملعون الرسام !!
لاتنهض طوّحت فيه العزوم=والهواجس برّدت فيه العضام
للفنا وضعه ترى بات امحسوم=كان مالله راد واخطته السهام
بين طول البعد واقفاي امحروم=للشعور احيان وقفه وانقسام
لاتجر السالفه عضّ البهوم=عقبها ما للندم فود ومرام
والله ان اقسى من النار الضروم=تـبْـعـَـت المقفي على راع الغرام

يالمستشك اللي طمرت الحفودي=ماتقول دربك يالمطامر على وين
تغط ّ فعـلي يارفيق الزيودي=واللي بعـبّـك ظلف عنزه وشاتين
طبعي مااعدّي بالسوالف حدودي=مير البلا من راعي العين بالعين
ماكل هرج(ن)يحتمل للردودي=والا المرد الشين للمنطق الشين
بعـض العرب يحمل صفاة اليهودي=وان ماحملها شفتبه طبع للقين
هذار لكن بالملاقى شرودي=مايحمي الماقف ولايقضي الدين
وانا ماافتل للرفاقه عضودي=ولاحسبت حساب حسّـان وحسين
مير احتمل للي تشيله زنودي=وان فاق حملي قدرتي عندي ايدين
والله لسرّيها مساري جدودي=لين انها تاقف على الشين والزين
ماني بقايل للقضى واوجودي=ولاني بقايل طاب بكره وبعدين
لكن بقول اللي عليه السعودي=ربع(ن) بدل ربع وبدل دار دارين
مادام خابت يالموالي جهودي=والخير مني تعقره بم حدين
تبشر برمح(ن) ياصلك مايعودي=لين يتمكن من حشاياك شبرين
لاتحسبنا عن سواتك رقودي = حنا ترانا ندبل الصاع صاعين
ما انت بعلى شين الفعول امحمودي=ولا انخبر من يمدحونه على الشين
والله يبارك باامهات الشدودي=اللي تطيّرك الضحى بالجناحين
والا السانك لاخليت معقودي=وتصير بين الناس تمشي بوجهين
لاشك يالمقرود ما انت امحسودي=عندي مقامك من مقام ام ديدين
من بينـّـا لاطاح راس العمودي =مالك مقام بحسبة الربع الادنين
تسقط لدامك علة(ن) للكبودي=وتولـّع البارود بين الفريقين
تبغى تفرقنا وفينا تسودي=لكن ّ يابوم الخرابات تخسين
عليك حضرت القلم والشهودي=والقاضي اللي ماكلامه بشكلين
حتى تثبّت تهمتك والقيودي=ونحط بلسانك عن الهرج قفلين
وتعيش يانسل العفون امحدودي=فاللي بقالك من حياتك بمترين
وان صحت من سبة غرام العنودي =مالك عليّ الا اردف البيت بيتين
يابنت ياللي تنقضين الجعودي=ياللي خذيتي من ضبا نجد ثنتين
عين المها لابرّقت بالجرودي=واذعارها لاحسّت بوقش رجلين
لا تاخذين المستبد الحقودي=عليك بالطيّب طليق الحجاجين
وان ماحصل لاتنكثين العهودي=تبقين عانس خيرلك كان تاعين

الاياخال ابوسعران ليتك تعرف اللي صار=لفتني كلمة ٍ بالنفس تجرح من يداويها
وانا خابرك حر ٍ مركزك يالقرم روس شهار=ولانفسك تنزلها ولااضنك توطيها
كريم النفس من ربع ٍ لهم بين الرجال اذكار=ليا جاطاري العربان سمْوها باساميها
سلايل مجد ماهم من سلايل مايق ٍ هذار=فعايلهم على وضح النقاحاضر وماضيها
واناماامدح سوى اللي يستحق المدح يالبيطار= واعرف الناس وادري مين صايبها ومخطيها
ماهيب هروجنا زينه ليا زانت لنا الاخبار=اقول الحق لومالنفس تسمع علم يرضيها
واناماني بمخطي يوم اجنب سكة الثرثار=وكلمة بعض خلق الله حشاماني براضيها
لكنْ ابين علوم ٍ خفت عن ساير الاقطار=ولايدريبها الاٌ واحد ٍ يفهم معانيها
يقولون العرب سم القلوب الهرج لامن جار=وانادمي من اللي قيل واصل مع حراويها
مضالي وقت مانوم ٍ لي بسود الليالي زار=احسٌب كلمة ٍ نفس الردي من وقت تخفيها
وانا ماني بهاب ولو تعرض بالدروب اخطار=ولامتعود اسمع كلمة ٍ شينه وامشيها
تعودت اني بحلق الخصيم احطلي مسمار=واذوقه المهانه لين يشبعها ويشنيها
لكنٌ اخطيت يوم اني له دروب السعد عمٌار=وهويهدم وانا اللي بالخفاله دوم بانيها
أجامل بس في هذي حشا ماجامل الغدار=اروم العاليات الشامخه وانزل بعاليها
أشوم ولاعلي امن العلوم اللي بدون عيار=ولوفيهايماري ساقط ٍ نفسه يمنــْيها
وحناحرب ياخالي ليا شب الحريب النار=لنا عزوه على طول الزمان وعزنا فيها
وحناطيب للطيْب وحنا شر للاشرار=ولاطيبه لنا ياكود حربتنا توازيها
ولامنا شكا عابر سبيل ولا تشكـــٌى جار=ولافينا دني ولابنا منقوص يغديها
لناعادات وسلوم ولو ان الوقت فينا دار= حشا ماهومغيرهاولاضيع مرابيها
وكانه ماذكرنااللي على وزنة شبيه حمار=ترى ماغاضنا يبقى بهاولاٌ يسرٌيها
ترى حنا مثل شعله على راس العلم من نار=ولاحنامن رجال ٍ تضيْعها طواريها
وانا يوم اني اسوق المدايح ماعلي غبار =معزه أوطناخه أوعلى كيفك تسميها
واذاقلت القصايدفالقصايدقالوا الشعْار=ولوماامدح قبيلة حرب ليه ابدع قوافيها
((لساني بااقطعه واعطيه انا مجان للجزار= قوافي ماامتدح ربعي بها ليه افتخر فيها))
لناتاريخ معروف ولنا رايات ماتنهار=بنا الفرسان والشجعان والظفران تحميها
ومن عنا عمي ياعل عينه مايجيهاابصار=ياعله للرمد لين الرمد يطغى ويعميها

يـامــن يعـزيـنـي بـفـقــد ابــــن عــــواد=وانـا مـن امـس محـارب الـنـوم عيـنـي
تبـكـيـك يـاصـيـاف ربــعــك والاجــــواد=ويـبـكـيـك ود(ن) بالـضـمـايـر دفـيــنــي
ياحصـان حـرب اللـي اليـا قــال مـاحـاد=ياشـاعـر المعـنـى بـقــاف(ن) سمـيـنـي
تشـهـد لـــك العـتـبـان ومـطـيـر شـهٌــاد=وتـشـهـد جـهـيـنـه مــقــدم العـارفـيـنـي
وتشهـد سليـم بحـلـة الـربـع مــن غــاد=وهـذيــل تـشـهـد والـعــرب شاهـديـنـي
علـيـك عيـنـي تــذرف دموعـهـا ابـــداد=ولاالــــوم عـيـنــي يـابـلـيـس اللـعـيـنـي
الـمــوت حـــق وكـلـنـا بـنـدخـل الـحــاد=والـمـسـعـد الــلــي حـازدنـيــا وديــنــي
مااحد(ن)اليـا جـت حزتـه لحظة(ن)نـاد=لاشــــك يــذكـــر غــفْـــلْ والافـطـيـنــي
وانــا بـطـاري قــاف والـقـاف لــه جــاد=صـيـاف ابـــن عـــواد طـلــق اليمـيـنـي
الملعبـه مــن عـقـب ابــو مفـلـح انـكـاد=قـامــت تخـاطـفـهـا ســبــاع القـطـيـنـي
مــن صغرسـنـه مامـشـى درب الانـقـاد=ولـمـقــارع الـشـعــار مــالــه عـويـنــي
صـيــاف يارمز(ن)لـلاشـعـار واســتــاد=يـالـلـي لـفـقـدك قـــام يــنــدى جـبـيـنـي
حملـت رايــة حــرب يـاعـرْب الاجــداد=وابـلـيــت زيــــن ولاتـلـفْـظٌـت شـيـنــي
لـك ماقـف(ن) مابـيـن مـصـدر ومـيـراد=ومـثـبْــتــه راع الـــكـــلام الــرزيــنـــي
يافـخْـرَنـا وســـط المـحـافـل والاعــيــاد=يـادرعـنـا الـلــي قـاســي (ن) مايلـيـنـي
تـاريــخ حـافــل بالـمـعـالـي والامــجــاد=مـــن مـثــل ابـــن عـــواد ياسامـعـيـنـي
لاعــاد يــوم(ن) غــاب صـيـاف لاعــاد=عقـبـه محـاجـر نـاضـري شــوك تيـنـي
مــابـــه مــنـــام ولاتـهـنــيــت بـــرقـــاد=والـعـيـن تــدمــع والـشـقــا زاد فـيـنــي
وانـــا ادري ان بـكــاي فـرقــاه مــافــاد=لاشـــك مـابــه حـيـلـة(ن) فـــي يـديـنـي
مـالــي جـــدا كــــود الـبـكــا والـتـنـهْـاد=يـسـراي تصـفـق مــن فـراقــه يمـيـنـي
الله يـبـيـحـك عــــد مـايـنـطـق الــضــاد=اليعربـي .. بلسـان فصـحـه .. يبيـنـي
عسـى ان لـك فــي جـنـة الخـلـد ميـعـاد=وبــك نجتـمـع مــع سـايـر المسلمـيـنـي
وعـسـى بقـبـرك بــارق الـنــور يـنـقـاد=عـســاه جــنــه وردهــــا لــــه يـزيـنــي
مرحوم ياتاج (ن) على الراس واضماد=مـرحــوم يـاذخـر(ن)لـنـا كــــل حـيـنــي
عسـى البقـا فـي حـرب شـعْـار وافــراد=وعـسـى آخـــر الاحـــزان يامْحزْنـيـنـي

ياحرب ياحـــــــرْابة اجيوش الاحـلاف =يااهل الرماح اللي تشق الدروبي
يااهل السيوف اللي بها العز ينــشاف =من فعلها ملك الجدود امـــــــهيوبي
لكم على الطالات مركز ومشراف =يوم العرب غصـّاب والا امغصوبي
يشهد على قولي حكي شيخ الاشراف =ماحرب غير بحرب وقت الـــكروبي
يوم السنين ابلا قوانين واعــــــجاف =ميقافنا بين الجميع امحســـــــــوبي
والشعر حنا له موارث وعـِــــــــرّاف=ومن قام منا باللوازم يـــــــــــنوبي
حنا هل المعنى مخاليف واســـــلاف =نقاضة ٍ للقاف ندرى الـــــــــــعيوبي
إبن سند بالنضم والــــــــــرد صياف =ولليوم ماهو من طرفنا امحجوبي
ياحرب شرْفنا ( بدر ) بادع القاف =ويقول هبت يالنشاما هبوبي
تكفون منا لايجي صوبه اجحاف =لاتذخرون اللي بوسط الجيوبي
وان صار بالدعوى حميْه وميقاف=بااذن الله البيرق نصيب الحروبي