ردي على الشاعر صقر المراقيب

شعري منزّه عن غثا الشتم والزور = مالي هدف ياغير كسب الجزيله
فيه طبيعه ماعرف الفّ وادور = والغدر ماجيبه ولا مشي بحيله
وضح النقا ماشي كما شعة النور = واعز نفسي وافتخر بالقبيله
حنا عيال اكرام والصيت مشهور = نصخي عطانا مانمد القليله
سلام ياعيسى على الطيب مذكور = ياصلك مني ياعشير الفضيله
من بعدها بشرح لك العلم مجبور = وانته ولد رجعان حامي دخيله
لك صاحب ٍ بالود مبلي ومقهور = نجم السما عني تحجبه مخيله
اللهم يغزيني وانا قوله غور = لهجة اهل النيل ترعى الحسيله
واليوم ياعيسى لنا سته شهور = ننطر خبر من يم نافل جديله
سافر وخلّى القلب يصلا بتنور = واجر وناتي ثلاثين ليله
لو ابتسم ياخوك ماني بمسرور = اخفي ورى البسمه هموم ٍ ثقيله
من خوف يشمت بي من الناس خنفور = يفرح الى من شاف عيني مسيله
كتبت لك خطي ترى الوضع مخطور = ومن لا عرف مثلك عليه الفشيله

الشاعر صقر المراقيب

هلا هلا عداد مايبلج النور=بان الصباح وزاح مسودّ ليله
يالاحمدي تسلم بك الطيب مخبور=وربعك بني سالم ونعم القبيله
دفانة الركبه ليا جا لها زور=الحرب يوم النذل يلقط شليله
عرفت وضعك وانت شاعر ودكتور=وان غرني عرفي جهل لاتشيله
قلبك خضر توه من الحب ممطور=واجتاح مع هدب المعاليق سيله
عزالله انك يابيض الوجه معذور= واللي تعذب بالهواء عزتيله
ياما وياما من هواء البيض محرور=من حبهن تشويه نار المليله
كم عاشق من قاتل الحب مقبور=باسبابهن دموا عليه النثيله
عينت قيس بن الملوح له اعصور=العامريه سالفتها طويله
وعينت وافي مات هائم ومقهور=من حب شيمه والعيون الكحيله
وعينت محسن وبن عدوان مذكور=في معجم التاريخ وابحث دليله
وقلبي مثل قلبك من الحب مدمور=اهيّم لاشفت العنود الجميله
واللي يلومك داله البال مسرور=يفطرعصيده ويتعشى بليله
جاك الجواااب وكان جت مني اقصور=بالرد خذ ماطاب وارم الهزيله

عيسى العوفي