ديوان الشاعر سالم ضعيان السامود المخلفي

ماكل من صوت له جاب الاصوات=ولا كل من جيته لحاجـة قضاهـا
ولا كـل ورادٍ حبالـه رهـيـات=ولا كلٍ مـن دلـى دليـه ملاهـا
ولا كل من غامر يحصل سلامـات=ولا كلٍ من يبغا السلامـه لقاهـا
ولا كل من يرقا طلـع بالطويـلات=ولا كل من هاز الطويلـه رقاهـا
الطيب صعبٍ والمراجل عسيـرات=من دونه الرديان تابـس اشفاهـا
ولو هو بسوق المشترى والمبيعات=ريال بعض النـاس ستّـر رداهـا
لاكن وهايب من ولـي السمـاوات=كرامـتٍ للعبـد ربـه عطـاهـا
ومن لا على قده مشى بالخطـوات=تهف به هف الدلي مـن رشاهـا
ذا قول من عنده عن الوقت خبرات=مجـربٍ مـر الليـال وحـلاهـا
والتجربه برهان للرجـل وأثبـات=بأهل التجـارب تستـدل اعلماهـا
ولا أقول انا الكامل بكل الكلافـات=الكامل اللـي عالـم فـي خفاهـا
لاشك أخذت من الليال اعتبـارات=درست مع ليـن الليـال وقساهـا
والناس كلٍ لـه معرفـه وميـزات=عرفي وخلق الله صعيب رضاهـا
الناس واحد مير فيـه أختلافـات=أنضارهـا متفاخـتٍ مستـواهـا
ناسٍ نضرهـا شايـحٍ للبعيـدات=وناسٍ نضرها قاصرٍ عن أخطاهـا
وناسٍ ليا ضاقت فجوج الوسيعات =مثل الجبال اللـي يـذري ذراهـا
وناس تطيب مع الليال الرخيـات=ولا امتست الشدات قصـر مداهـا
وناس ليا شافت جيوبـك مليـات=تغليك لو إنك عـدو مـن إعداهـا
وإن قل مالك لو من أدنا القرابـات=لقتك عرض أكتوفهـا مـع قفاهـا

ليا انفتح لك بـاب لا تصيـر طمـاع=ترى الاهانـة بنـت عـم الطماعـه
قبـل دخـول البـاب فكـر بمطـلاع=الصوت بعد الفـوت مابـه شفاعـه
الادمـي نفسـه ليـا طاعهـا ضـاع=كنـز النفـوس وعزهـا بالقنـاعـه
والله خلـق للادمـي عيـن واسمـاع=واعطاه في فهـم الامـور استطاعـه
عن ماصعب نولة ترى فجوجها اوساع=واللي خلـق خلقـه كفيـل امتاعـه
ماقـدره مالـه مـن الخلـق منـاع=والـرزق بامـره جيتـه وانقطاعـه
والوقـت لـو زانـت لياليـه خـداع=كـم غافـلٍ بيـن العشاويـن لاعـه
وقت بها اللي كامل العـرف مرتـاع=من ما يشوف مـن التهاويـل راعـه
شره ما يسلم منه لحـاس الاصبـاع=إلا رضيـعٍ مـات ماكمـل رضاعـه
تغيـرت فيـه المذاهـب والاطـبـاع=ولاعاد يعـرف مقدمـة مـن كراعـه
شبعت به ابساسٍ وجاعت به سبـاع=واللي تطيع اليـوم صـارت مطاعـه
والبـوم جالـه بالطويـلات ميقـاع=والحر حول تحـت عقـب ارتفاعـه
وقت تومر به علـى النـاس صنـاع=والعبد لو يزعـل علـى العـم باعـه
هذا وانا لو طلت في عرض الاوضاع=في شرحها ماكفـت ثمانيـن ساعـه
ابي انشد اللي بالمهمـات لـه بـاع=رجلٍ جمـع بيـن الذكـا والشجاعـه
اللي يجازي حفنت الطيـب بالصـاع=مرهي علـى مـد الجزيلـة اذراعـه
يابن سمير انشدك عن عـدة انـواع=اشوفهـا تـال الليـالـي مضـاعـه
الاولــه للهيــل مـافـيـه زراع=واللي زرع ضاعـت عليـه الزراعـه
والثانيـة راحـت ولا فيـه مرجـاع=مـن بعدهـا كـلٍ مشـى باختراعـه
والثالثـة لعيالهـا مابهـا ارضــاع=وش ذنب طفلٍ منه يوخـذ رضاعـه

اليوم عن يوم امس يابعد فرقـه=يفرق بساعات الزمن والدقايـق
يابعد غربه عن مطاليـع شرقـه=تبينـت لانظـار كـل الخلايـق
ياقشر لفاتـه وياصعـب طرقـه=مابه طريق إلا يجي فيه عايـق
وقت أوله درقـه وتاليـه درقـه=زمانكم ياهل الـرداء والبوايـق
ياللي تبيعون المواقـف بعرقـه=قول وعمل وأصل العمل غير لايق
يضوي بسرقه من سرحله بسرقه=ولا طال عنقه غير يوم إيتوايـق
يابن سمير تجيك قصـه بورقـه=يسوقها من واقع الصدق سايـق
وانته من اللي رايهم فيه درقـه=في ساعتاً فيها تبيـن الحقايـق
والراي له زرقه والرمح زرقـه=وانته من اللي رايهم له وثايـق

ياللي ترجى فزعة النذل ضايـع=اخير لك من ما رجيت القطيعه
خلك عزيز النفس لو مت جايع=لا تستعين أهل النفوس الوجيعه
إمشاركت بيض النسا بالطبايع=ماهي كفو بالطيب تفعل صنيعه
ذا قول من لاعه إمن الوقت لايع=ذاق المراره والقسا والفجيعـه
عوج الليالي شفت منها الفنايع=هوايلٍ منها تشيـب الرضيعـه
وغديت انا والهم شاري وبايـع=ليا عصيته ردني ليـن اطيعـه
ولالي معين إلا ولـي الودايـع=مافيه غيره من يحفظ الوديعـه

بسم اللذي لأمره نصوم ونصلـي=اللي خلق كل النفـوس وكفلهـا
بديت في مـردود خـطٍ وصلـي=ماجابـه المرسـول ودى بدلهـا
يامرحبا مـن خاطـرٍ مسفهلـي=برسالت المرسل وباللـي حملهـا
رسالـتٍ طالـع بهـا مرسللـي=طرايفٍ عن كـل مدخـل قفلهـا
يقرب من الزلـه وهـو مايزلـي=وينشد عن القصه وهو ما جهلها
يقول انا بنشـدك ياصـاح قلـي=وش غيّر العذرا وسبـب زعلهـا
وشلون تنشد وانت ياطالع اللـي=تقودهـا بخطامـهـا وتعقلـهـا
وانا ماعرف اللي ماهو واضح إلي=والبنت يدفن سرها عنـد اهلهـا
وبالله ياطالع لـو انـت امحلـي=وانا راع الدعوى واقول انت قلها
انتـه تزيـد العقـد والا تحلـي=للـي يـزود كحلهـا فـي عللها
ويابو طلال الهرج كثـره مملـي=وكلٍ يموت وغايته مـا وصلهـا
ودنياك هـذي يازبـون المتلـي=مافيه مخلـوق سلـم مـن زللها
تدرج رحاها فـوق رمـان بلـي=على البشر يقفي ويقبـل عجلهـا
تقبل بناس وناس فيهـم تولـي=جيلاً رحل منهـا وجيـلاً نزلهـا
يرتاح فيهـا قلـب ثـوراً مفلـي=اللي مواجيب الرجـال اعتزلهـا
من نعمة الله دايـم البطـن فلـي=ولا حاذفٍ حذفـه ولا محتملهـا
ولو ينقطع وارد رضـا بامجلـي=والله ماغيره على الزقـم اكلهـا
يصيبه اللي صاب راعي حولـي=تضيق فيه ابحورها مـع سهلهـا
ويابو طلال الناس الايـام ذلـي=معاد يعرف عورها مـن حولهـا
وقت الفضا والعولمـه والتحلـي=فيه امتساوي روسها مـع ذيلهـا
ماراح من عمري ماهو راجع إللي=والنفس يعلم من خلقهـا بأجلهـا
ماهمني كم بالعمـر باقـي إّللـي=واللي عوج بعض الامور أيعدلها

دام فكري خذاله بالقصيد اجتوالـه=ودي أسأل هجوسي يوم محدٍ سألها
ساعةٍ مشغل فكري جميع أتصالـه=ليلةٍ من فرحها لبست أجمل حللها
يوم الد النظر واشوف ربعي قباله=ربعي اللي ينومس بالمحافل عملها
يارجالٍ تعرف الطيب ليا جا مجاله=يوم ألايام مالت بعـد بيـن خللها
وردوا الماء ورود اللي طوالٍ حباله=قومةٍ خلت ألاعداء تبيـن زعلهـا
ساقوا المال كـلٍ ماتغـالا حلالـه=يوم جت ساعة المدات ياكثر أهلها
الله انه يجمل من يحـب الجمالـه=الحمول الثقيله مالهـا إلا جملهـا
البليهي ليا حطوا له الحمل شالـه=لو تحط الوساقه فوق حمله حملها
المراجل تراها ماتيجـي بالسهالـه=لو تجي بالسهاله كل واحد فعلهـا
من يخلي على ربه جميـع اتكالـه=وفقه لين يعطي من دروبه سهلها
يفرج الله همومه كل ماضاق بالـه=كل ماجات في نفس رضيه قبلهـا
وكل ضيقه تراها ما تطول طوالـه=الله اللي خلق كل النفوس وكفلهـا
حكمه الله تبدل كل حالـه بحالـه=من ترك حاجةٍ لله عـوض بدلهـا
ودي أشكر بعد ربٍ عزيـز جلالـه=كل ربعي ومن حل العقود وفتلهـا
ربعي امخلف اللي كل طيبٍ تنالـه=بالوفا من قديم الوقت محدٍ جهلهـا

ياعاذليـن القلـب مافيـه يكفيـه=خلوه فيـه مـن العـذاب الكفايـه
والله لـو تـدرون عـن مايخفّيـه=مافيه منكـم مـن يـرد الحكايـه
لو تكثرون الهرج ماهـو اموحيـه=وهرجٍ ماهو مسموع راعيـه تايـه
ترى الحكى زوده سماجـه لراعيـه=من لا طلبـك الـراي خلـه برايـه
منته بـربٍ لـه ولا مكلـفٍ فيـه=ولاهو عليـك مقـدمٍ لـه اشكايـه
القلـب لولايـه ليـا زاع اهـديـه=قطّـع معاليقـه وغـادر حشايـه
اسباب مـا بالقلـب وقـتٍ لياليـه=قامت تقلب مثـل شمـس المرايـه
قامـت تصافقبـه تسنـد وتنحيـه=وقصت عـراوي حبلهـا بالنهايـه
وخلت عليه الريح تـذري سوافيـه=بمصيبتـه يالله تجـبـر عـزايـه
عزي لمن عيـت توفـق مساعيـه=وايـس بعـد ماشافهـا بالقفايـه
من ضيق صدره ضاق كل الفضا فيه=ودنياه صارت كبـر كـم العبايـه
والحمل عجـزىً لا يشيلنـه ايديـه=اصبح على امتونه ثقيـل ارتكايـه
ولامن صديق الى شكالـه يشكويـه=ولو يشتكي ماهو محصـل احمايـه
نـادا القـراده والقـراده تنـاديـه=وحطت لهـا قدمـه ثمانيـن رايـه

قصيدة رثاء بالشيخ يوسف بن درع رحمه الله ::

يالله يالمعـبـود وال المقـاديـر=يابانـي الكعبـه للإسـلام يمـه
ياوامر عيسى وهو تـوه اصغيـر=يخاطب اللي بالسؤال احرج امـه
انت اللذي في يديك كـل التدابيـر=وفي قدرتك لامـرت بامـر تتمـه
نزل جسد يوسف منازل هل الخير=وسع على جسمه لحـودٍ تضمـه
يالله عساه ابرحمتك عن زمهريـر=وشفاعـت امحمـد نبيـك تعمـه
مرحوم ياريف الاهل والمساييـر=وريف الضعيف اوكل من رايح يمه
مرحوم ياللي ماحسب للمخاسيـر=له مجلـسٍ دايـم كثيـر ملمـه
يمه وجيه الخير ورد أو مصاديـر=أو هداج تيماء ما تناقص مجمـه
مرحوم يانسل الحرار المشاهيـر=اللي مواقعهـم علـى راس قمـه
اهل المواقف والسيوف البواتيـر=لا عقدوا فـوق المهـار الاكمـه
لاغطرفأ للحرب بيـض الغناديـر=عدوهم يشـرب قراطيـع سمـه
يوم القبايل بيـن فـزاع ومغيـر=وكـلٍ يفـادي دون مالـه بدمـه
فعل الدويله في جموع الطوابيـر=يشهد له اللي معه امانـه وذمـه
لفعولهم تشهد مع اعتيبه امطيـر=وابن رشيد اللي جموعـه امهمـه
له كلمتن تشهد عليهـا المناعيـر=ماقالهـا مزحـه ولاهـي بنمـه
الدرع امير وله مهابـه وتقديـر=مع طيب راسه طيب خاله وعمـه
ساق المراجل كلها واكمل السيـر=طواء على طيب الخصايل معمـه
ولا مات امير امخلفٍ بعده اميـر=وهذا مثل معروف مع كـل الامـه
الحـر ورثلـه حـرارأ فواعيـر=مافيـه لاهفـوه ولافيـه زمــه

ياحلو مر الحاجة اللـي أتعرفـك=باهم سـرٍ تجهلـه قبـل تحتـاج
عرفت ما عند اصدقاك ومعارفـك=ساعت تلاطم بالبحرهوج الامواج
يا غلى صديق تغشني في تلطّفـك=تاقف بك الصحبه مواقيف الاحراج
بيّن لي الخافي نتايـج تصرّفـك=وامر وادها اللي مخفى بـالادراج
والله ما مـرت عليّـه وصايفـك=جرثومتاً تنقل مرض مالها اعلاج

وقفت بي ضروف ودرهمت بي ركايب=والهدف فوق مابين القمـر والثريـاء
الهدف ساقني له سوق عوص النجايب=هقوتـاً مايرديهـا قليـل الحمـيـاء
يوم رفت جناحين السعـد بالهبايـب=قلت للي مسك يمناي بالـدرب هيـاء
وارجي الوقت ساعاته يجيبن غايـب=فرحتاً ماتموت وفرصتـاً مـا تهيـاء
فرحت الشفق بالمطلوب تطف اللهايب=فرصت العمر ماتترك تفوتـه كذيـاء
ولا تعلا على سطح العلا كـل هايـب=والمراجل صعيبة ما تجـي بالمنيـاء
المراجل تبـي رجـل يسـد النوايـب=لا وصله المجال يقـال فيـه الكفيـاء
مايردّي بهقواتـه قريـب الحضايـب=عن دروباً تطمن هامت الراس عيـاء
لقصرت نظرت اللي بس بين القرايـب=هن سوى كذا وفـلان سـوى كذيـاء
من شبابه يالين يشيله الموت شايـب=ما يحيي بضيف ولا حداً فيـه حيـاء
مقصدي بيني وبينه طـوال الجذايـب=طرقتاً بينـي وبينـه تبـذ الخفيـاء
اتصبر لاكـن الصبـر ماهـو بثايـب=زاد همي وصبـري مابقيلـه بقيـاء