ديوان الشاعر/بدر بن عواد الحويفي الحربي

اللي فقدنا من نبات ونواوير=ماهو على المولى صعيب رجوعه
الله من قلب هجوسه طوابير=ميعادهن بين العتيم وهجوعه
قالوا تفكر قلت عندي تفاكير=أشوف شئ من خطانا وقوعه
قلت الحقيقة يالوجيه المسافير=قلبي ليان وشاف شئ يروعه
شفت الجفاف مكسر القشع تكسير=والنفس ماهي من قضاء الله جزوعه
وادي الرمة جوه عجاج ومعاصير=يبست جراجيبه وماتت قشوعه
حمضه عليه من السوافي عثامير=يا بعث الأموات تبعث جذوعه
مدهل مجاهيم تلاد ومغاتير=وحمر مرابيها هدايد افروعه
يوم الوسوم تنثر الوسم تنثير=والعشب ينبت ماتكامل اسبوعه
ويوم القلوب نظاف مايقف الخير=يطيح وسم ولا تقطع تبوعه
واليوم وبل الغيث مثل الطباشير=قامت تلوث بالمناقع انقوعه
الشكوى لله صار بالجو تغيير=دايم كتام وغير الجو نوعه
واصل الخطا منا تهاون وتقصير=قليل من يحسن لربه ركوعه
نشقى ورى الدنيا وهي مابها خير=والموت يدني للنفوس البشوعه
وعند المحاسب ماتفيد المعاذير=ينشف جما العاصي وتطفي شموعه
واللي غناته سحت وموال تزوير=له ساعة ماذاق حلوه يزوعه
يدري بها لودعوه الحفافير=والقبر ضكه مع محاني ضلوعه
في ساعة مابه تقدم وتأخير=يفقد بها الرحال مجالس ربوعه
وعن ماعمل ماله مفر ومعابير=ما ينفعه جمعه وهيبة جموعه
قدامه الجنة وقدمه زمهرير=والله يعلم وين يكتب نجوعه
يارب تهدينا على حسن تدبير=نطلب عظيم الشان خوفه وطوعه
يالله يارازق عوج المناقير=ياكافل رزق النفوس القنوعه
يامن بتقديره تكون المقادير=ياسمع الداعي وخالق سموعه
تزيل شدات السنين المعاسير=يامن لك المسلم يوجه خشوعه
تمدنا يارب رحمه وتيسير=غيث يعم المملكة في نفوعه
يارب من قل المطر نشفت البير=نشف الثرى والدرع ماتت زروعه
ومات الخشاش وضاق في عشه الطير=يشكي على رب السموات جوعه
والبل مصارفها نخاله وشعير=واحوارها بالشبك تذرف دموعه
مثل السجين يلوح بين المواصير=والا البهايم للمقدر خضوعه
حاطت عليه اذنوب ناس مباصير=حاله صخيف وحنة أمه تلوعه
ذنب الأوادم له عواقب وتأثير=والعمر فترة والحياة مخدوعه
وحنا بشر مالله خلقنا تصاوير=واللي يخاف الله يطبق شروعه
والله محذرنا عن الكذب تحذير=والحسد والغيبة وكبر وميوعه

والله يالولا غايتي ما انقل الطير=مانقل على كفي خفوق الجناحي
أبي اليا فزت تقل شعف معصير=وقفت تعقد مع سهال فياحي
ليا تلني واقفى يخطرف له السير=جايع وحاديه والزعل من صياحي
لا طقها بالصايدين المواخير=طاحت تدوس ونجم الطير صاحي
وليا حصل جول رتوع ومخامير=في ماقع عن نشر الأدباش زاحي
وتركزن له تقل شول معاشير=وغزن غلبهن عقب ماهن مطاحي
منهن علق باللي مثل بكرة الظير=ونكد عليهن عقب ماهن ضواحي
وجيته يمزرها على القاع تمزير=يشلق معلق ثديها بالجناحي
هذيك والله منوتي يالمناعير=ان كان انا مجنون وان كنت صاحي
وكل برايه له تصرف وتدبير=ولأحد على الدنيا جلس واستراحي
وأرزاق خلق الله وهايب وتقدير=ورزقي على مجرري هبوب الرياحي
ولا ينقص الرجال كثر المخاسير=لصار دون الوجه ماهي سفاحي
والقل ماعذرب رجال بهم خير=والمال ماعز الرجال الشحاحي
مار اتركوني يالوجيه المسافير=هذا الذي وافق عليه اقتراحي

ياللي طلبتم نبذة من قصيدي=عن واقع المفعول لا أنقص ولا ازيد
انا غرامي وانبساطي وعيدي=تفريعة القرناس بأرض بها صيد
لا شطب الصيحان روس الزبيدي=والعشب جاله بالمثاني عناقيد
والبدو مايبدي لهم بالشديدي=تسعين ليلة ماحكوا بالمواريد
ضيق بهم در الغنم والجميدي=مايشربون إلا حليب المجاديد
والبل وبرها طار وأبدل جديدي=وردوم على الفاطر سوات المجاليد
من فضل ربي كل يوم تزيدي= قامت عشايرها تسن المفاريد
والفجر تسمع للطيور اتغريدي=ليل الشتاء طوله عليهن سراميد
هذيك والله منوتي ياعضيدي=لا جابها الله من صدوق المواعيد
ماكفه الدير لرجم المفيدي=وذوب على خشم الخدار ومشاحيد
مجهود من نو الجبه السديدي=وحصل لها قبل العقارب تماديد
غثوه على روس الشجر والهضيدي=وساق وتساقي للنفود وتخاديد
وفيض على فيحان ريف البعيدي=نبي لنا بشعاف لوقه مطاريد
على اسوق مقربات البعيد=من فوقهن يازين مزح الأواليد
لا فرع النادر وطلعه وكيدي=وحول على جول الحبارى تقل حيد
وسلط على الخرب النشيط العنيدي=حاسه وداسه والحباري ملابيد
يقضي بها الصقار يوم جديدي=في ساعة مابه وجيه مقاريد
هذا هوى بالي وهذا رصيدي=سوق النظر بين السهال الجراهيد
لوكان من طرد الولع مستفيدي=فتق بقلبي واعذروا يا الأجاويد
نومي تحت طل النجوم الجليدي=عن كنب ومنجد زل تنجيد
لو لامني خطوا الغشيم البليدي=طرد الولع مابه عليه مناقيد
وشف الفياض المخضره يالحميدي=وشمة ذعاذيع الهوى عندنا عيد
وللكيف ذوق ولاستماع النشيدي=لا قلطوا رسلان والا بغاديد
ثنتين هيل وثالثتهن عويدي=وكل على ماتطلب النفس وتريد
وقدوعهن من طلع هدب الجريدي=احسن نمونه من نما شرع الغيد
وسوالف ماقيل فيها جحيدي=بالصيد لا نمة ولا هي هرابيد
ساعات نقضيها ويوم سعيدي=ولادامت الدنيا لعامر وابا زيد
الدايم الله والفنا للعبيدي=والرزق عند منزل الدر بالديد
محي الهشيم اللي عروقه هميدي=رزاق ماتحت الصخور الجلاميد
والله يدبرنا على مايريدي=وصلوا على اللي وحد الدين توحيد

ارسلتلي خط كتبته بيمناي=سلام وجه من من صديق لصديقه
ملفاه نايف طيب العرف والراي=اللي هناديب الشكاله طريقة
عد الروا ماهو ضحاضيح رواي=شط الفرات اللي اغروقه عميقه
ليا قرأ خطي وبرق بدعواي=ملزوم يرقا بالطويل ويويقه
حيث أن قلبه بالمراقيب شقاي=نايف وله بالنايفات اتعليقه
ياللي لصلفات المعاشيرحماي=لانشف من بين الشفاتين ريقه
أنا صويب وناقل داي برداي=قلبي غداء من مابجاشي حريقه
واللي ذبحني واحد من دناياي=والصبر والله يابن عايد ماطيقه
يوم استتم وجاء على الكيف ومناي=صالف ولاوافق طريقي طريقه
ارهيت به واقبل على الجم مدلاي=وتقطعت منه الحبال الوثيقه
يوم اقتعدت وللهدف زان مرماي=عودت يانايف خفيف العليقه
واليوم وش رايك لياصرت شكاي=عطني مساندة الرفيق لرفيقه
ودي تباصرني وقل لابت غزاي=بالليل تنحاني عن النوم ضيقه
اما عذلوني وقنع النفس بغضاي=والاترجا والطلب في لحيقه
شكيت يوم الغلاء جاب قصاي=ماخوذ مالي منيفك الوسيقه

يوم المولع واق في راس شمحاط=حول علينا من جبل طي بمقوط
حاديه من حب العماهيج مخباط=اللي بحرهن للعشاشيق زاروط
اللي نباهن للمعاليق معاط=ونظراتهن ترسل عباريد ومشوط
صبن علىقلب الرديعان زقلاط=ودارت به المكره علىسير مشحوط
واسند علي ابيات جزلات ونشاط=مثل الذهب واحد وعشرين مشروط
عملة ذهب ماهي دنانير وانواط=من شاعرآ ماهو بالامثال خربوط
وسكر على الطاروق ضبه وصقاط=حيل الله اقوى كيف باحتال وانوط
حي الجواب اللي محنط تحناط=جاءمن ابراهيم الرديعان مصفوط
هدف وتهديفه طريقة تشطاط=واللي عطاه الراى رجال مضبوط
خطط له الخطة من الناس خطاط=قصده يسدد كل الانفاق ويحوط
وافق وركز له قريحة بحرف اط=وشاور شويره واستساره وقال أوط
وطاعه برايه ونتهت سبع الاشواط= واشر عليه باصبعه باخر الشوط
وارعد وجا سيله مع الحزم جلاط=وفاضت معابيره على خبت وشطوط
الله يكافينا كفاحه ليا شاط=وقعه برد ماهو من السطح ناقوط
لقط عناقيد القريحه تلقاط=وخلى غصون من الورق بيض وملوط
واخذت مع دربه على الشوف مشواط=عساي احوز ارضاه ويكون مبصوط
ونا معه جندي وهو صف ضباط=تحت الاوامر لو حصل ضغط وضغوط
مادامها لعبة حويلا ومزقاط=ماني مع الصاحب قصاوي ولابوط
مهما حصل من بيننا مزح وأغلاط=الحبل ماهو بين الاصحاب ممغوط
وان جت علوم ماتلفز بالاضباط=على بحر ماني علىجال حابوط
لاعط لاصوات العماليق عطاط=اعرف جواب اللي عليه ضرب شوط
ماني من اللي ينطمع به وينهاط=وصفة علاجي للطماميع حانوط
ولاقول انا فارع طويلين الاشواط=ببحور فيمان الشواعير ماحوط
وان جنبتني ماتورط توراط=مالي بوضع الناس قارط ومقروط
عنها أبتعد بعد الجزائر عن أرهاط=ماني مثير اسباب ومعقد أخيوط
هذا وأبأرسل للرديعان خياط=يخيط قلب من قسى الحب مشعوط
العاشق اللي في بحور الهوى غاط=قلبه ليان ومن كراسيه ممعوط
شايب وقلبه بالولع سلك مغاط=من شوط تيار الغناديرمشلوط
وعشقه خطا الله لايصلط تصلاط=كيف الغناوي حالته حال مزنوط
مادام له ملفا ومثبا ومقلاط=عبيرنجدوعنبر الشام مخلوط
يلعب على حبلين وافراش واصماط=كلش جديد ولا بهن همل وأصفوط
ثنتين عنده يعملن كحل وأمشاط=عفايفن مالامحن كل شمحوط
لو يسمعنه ولعن فيه شخاط=وتناوبنه بينهن قرص وعروط
قامن عليه وشلطنه تشلاط=ياشينهن عند الزعل موطهن موط
وعيالهن معهن بعصيان وأسواط=حتى الصغير اللي على الديد زعطوط
وقالن توقع لاتخبط تخباط=مأنته وغد رأسك من الشيب مشموط
يابو حمد بالك تفرط تفراط=أقنع برزقك وأنت رجال مغبوط
خل الهوى للي يفحط تفحاط=يطيح مع دربه كفرات وجنوط
حذف الحصى قفوه تقل حذف نباط=ومن الحيا وجهه مجرد ومقشوط
اللي ليامنه شبع بالهوى شاط=عشقه مع الحارات لفات وفحوط
عشقه خيال وفيه رجه وخراط=عقله نمط سيكل مسامير وبلوط
لويازونه مازون ربع قيراط=مثل الذي ريشه به أرناق ونقوط
اللي على روس المراقيب نغاط=يطير ويوقع على رأس زربوط
وألا أنت صاحب عرف راوي وفقاط=سباح ببحور العماليق وتغوط
مأنته وغد تعطأ حلاوه وشقلاط=العرف له عندك مطارات وهبوط
بالعرف لك قيمة وبالشعر عملاط=وبالطيب مناهجك بالأمجاد مربوط
شاعر وعندك ذوق لأشعار الأنباط=لاتختبرني مع ملفات وخطوط
خل السوالف بيننا بصط وأبصاط=العقل كنز وذارف الحب ملقوط
والناس كل له محيط به أمحاط=المتزن واللي من العقل مفروط
وترى الثقه بالنفس من خير الاشراط=وكل حسابه في سجله ومفقوط

سمعت لي كلمه وانا رجل حساس=كلمة شجيع لسان فارس حكايا
ووجهت له كلمه بها سم نداس=اشتالها بين الضلوع الحنايا
عن لابةبأفعالها ترفع الراس=دنيا ودين ومعجزات ومزايا
حربي ولي من فهرس المجد نبراس=وسلوم من خيرة سلوم النحايا
رغمن على اللي مايبينا من الناس=ضعاف العقول اللي جداهم زرايا
كذبان خلق الله بلاعيم الانجاس=اللي بهم تحت الملابس كوايا
مامجدنا حبر مزيف بقرطاس=تمليه رغبات النفوس الغبايا
يوم اليدين تمد وتحد الاضراس=نرد مردود البراء للبرايا
تشهد لنا عوص النجايب والافراس=وشلف تعلق بالخصيم الهوايا
مانرمي الا لابس الدرع والطاس=اللي تذرى به خدور الشوايا
وحزنا مناهل نجد بالعزم والباس=ماجاتنا بعروض مال وهدايا
سقنا الشيوخ اللي على الخيل فراس=اللي يعشون السباع القوايا
زحول الرجال اللي لهم بالفخر ساس=حماية الساقه سهوم المنايا
على النقا يوم ان الارياق يباس=على ظهور معربات السبايا
ماهي سوالف كل مبغض وهلاس=على صحون من الفواكه ملايا
اليا شبع راد البخت طب ماقاس=سيفه لسانه والغماد الشفايا
ما اوجس سموم ولا شكى ضيم الاتعاس=بظلال حكم محكمين القضايا
اللي تفوق مجدهم كل الاجناس=بالسيف الاحدب رادعين الخطايا
سواعد الاسلام قاده وحراس=ويخشىمهابتهم غشيش النوايا
سادوا بحكم الله وقطاع الانفاس=اللي يخلي عظم الاعوج شظايا
ملوك يفوق قياسهم كل مقياس=وعمت مكارمهم شعوب ورعايا
ال السعود اللي بهم عطف واحساس=ومن محكم الفرقان معهم وصايا
تخضع لهم روس بها زوم وعطاس=ونفوس من وضع العداله طنايا
ولولا العداله تردع العي بركاس=تجاوز المغرور سور الحجايا
الله يعز اللي للاسلام حراس=اللي على التوحيد فيهم حمايا
اللي لهم في قمة المجد مجلاس=ورفرف علمهم فوق مدن وقرايا
راياتهم تلفح على روس الاقواس=رمز الجلاله فوق عال البنايا
قيادنا لاصار للحبل مساس=وحنا بخدمتهم جنود وسرايا

يالله انك ترحم اللي يشتكي لك حاله=وادعه سن الشباب وعاش شايب
عايش(ن) في مجتمع جيله وتقل لحاله=الهدف غير الهدف والكيف ماهو طايب
والبشر كل(ن) على طبعه يحب أمثاله=سنة الدنيا وأهلها المعتدل والعايب
والنهايه كل شخص(ن) مرتهن بعماله=الله أعلم في عباده والخطاء والصايب
وكل شخص (ن)لآخر الدنيا يشد ارحاله=الحكيم اللي يفكر بانتظار الغايب
لوتفاخر صاحب الدنيا بكثر أمواله=ماعلى الدنيا قرار وما عليها ذايب
ماعلى الدنيا يزول ولا يدوم ظلاله=الحظيظ اللي عن الزله لربه تايب
كل عبد (ن) لاتوفى له حسيب يساله=الجزاءنوع العمل مقبول ولا خايب
هايم العقل الضعيف بغفلته واهماله=والعمل دقه وجله له رقيب ونايب
كم فقيد(ن) فارق الدنيا وشوف عياله=فارق الدنيا وأهلها واحترامه سايب
وين سكان الكيان وجولته وأجياله=هادم اللذات مزعهم شباب وشايب
تضحك الدنيا لأهلها واسمها الختاله=الحلاوه ضدها ذوق المرار الرايب
في طريق اللي تغره تنصب المحباله=ويسلم اللي من عواقبها مخيف وهايب
غرت اللي في مكاسبها عرف مدخاله=متعته مرت وراحت مازهرها دايب
كان مكسبها حرام احسابها غرباله=السوال اللي يوجه بانتظار الجايب
والسوال احساب عن دق العمل واجلاله=وخاسر اللي باع بالدنيا ثواب(ن) ثايب

تمرنـا الايـام مـانـدري بـهـا=لوكان هي تطـوي لنـا الاعمـار
تمضي دقايـق بيـن يـوم وليلـه=وبنـودهـا للغافلـيـن اقـصـار
تحكـم بنـا الغفلـه وبعـد امالنـا=ماكـن بـه جنـه ولابـه نــار
تغرنـا الدنيـا وهــي غــداره=تسقـي عسـل لكـن وراه أمـرار
تضحك وخافـي غيبهـا ياساتـر=تسقي من الحنظـل نكـد واكـدار
نقراء ونسمـع والخطـاء ندريبـه=لكـن نحـط الواجبـات ايـسـار
لـو نعتبـر بجدودنـا واسلافـنـا=غابـو وغابـت عنهـم الانظـار
غابو وحنا مـع طريـق الغايـب=راح السلـف واللـي بقـا عبـار
حكمـة تصاريـف الالـه بخلقـه=وأمر (ن) نفذ بالرسـل والابـرار
لكـن ماكنـا نشـوف ونسـمـع=بالوعـظ والتحـذيـر والتـذكـار
وهذا دليل مـن الضعـف بعقولنـا=وايامنـا تطـوي لنـا الاسـفـار
لوكـان نحسـب للحيـاه الزايلـه=كـان انتبهنـا والأجـل غــدار
نسمـع ولانعقـل كـلام الهـادي=ماتقـل نسمـع موعظـه وانـذار
وانا ماعـم النـاس والله رقيبهـم=واجـد وجيـه الخيـر ولاخيـار
لكن بعض الناس لوكـان مبصـر=يضيـع لوهـو بـأول النـهـار
الآخــره ماينتـبـه لحسابـهـا=يـوم الجـوارح تنطـق الاسـرار
وكل (ن) يجازى حسب وزن اعماله=مافـيـه لاحـجـه ولامـعـذار
ماينفع الاهمـال قلـب (ن) قاسـي=عند النهايـه تشخـص الابصـار
الله ايكافينـا حصـايـد اذنوبـنـا=وتعمـنـا بالسـتـر يـاسـتـار
يالله يارحمـن تـرحـم ضعفـنـا=وانـت الالـه الـواحـد الغـفـار
هذا وابنصح كـل عبـد(ن) مسلـم=في طاعـة اللـي سيـر الانهـار
والكذب والغيبـه وغـش المسلـم=والكبر لـه عنـد الالـه اصغـار
العز بالتقـوى وصـدق المنطـق=وتجنـب المنـقـود والاشــرار
ومن لـم مـال ولاوفـا بحقوقـه=عليه صـار المـال عـار ونـار
لاجـاه يومـه مايفـكـه مـالـه=يقـوم غيـره بـاجـرة القـبـار
ويحصى العمل لوكان مثقـال ذره=تدويـن كاتـب ماعليـه اغـبـار
وكل(ن) رصيده من حصيد أعماله=مابـه مجـال برغبتـه يخـتـار
جف القلم واللي حصل من حضـه=يالعبـد ماعقـب النذيـر أغـرار
طع مايقـول الله ووصابـه النبـي=عسـاك فـي الحسـاب امـجـار
تمت وصلى الله على سيـد البشـر=اعداد مـن فـوق البسيطـه سـار

قال الذي جّرب وشاف وشاهـد=وقاسى من الدنيا فرح وأحـزان
خمسين عام اللي حواهن فكـري=مرن تقل ساعـه مـن الزمـان
لا رتحت فيهن يوم الاخرشطـه=واليا تريـح خاطـري كسبـان
اليا ذكرت أجيال ناسـن راحـو=اطوتهـم الأجــال بالأكـفـان
راحوا من الدنيـا ومـن لذتهـا=واللي بقي مع دربهـم عجـلان
هذا وأبا أبدى في نصيحة شايب=تهدى من الشياب إلـى الشبـان
أخص من يدراء الشرف والسمعه=اللـي يجنـب سـرة السفهـان
اللي علي حفظ الشرف به غيـره=ويميز الصاحي مـن الخربـان
اللـي يعـز النفـس ويقدرهـا=مايندفع فـي منهـج الشيطـان
يد الفرايض والحقـوق الواجبـه=اللي فرض ربي علي الانسـان
ومن لاحفظ دينه ونزه عرضـه=هذاك لـو انـه بشـر حيـوان
ومن احترم نفسه وضيـع دينـه=مسكين في طيش الجهل غرقـان
له ساعتن لابـد تدنـي رحيلـه=ماينفعـه مالـه ولا الـخـلان
ماله من الدنيـا سـواء ماقـدم=في ساعتن ياقف بهـا عريـان
ان كان قدم خيـر يلقـى ثوابـه=من قدم الحسنه جـزاه احسـان
وكلن رقيبـه مطلـع بأعمالـه=يبي يشاف الربـح والخسـران
الله يهدينـا ويرحـم ضعفـنـا=في ساعتن ينصب بها الميـزان
يحصى العمل لوكان مثقـال ذره=ويسـلـم المـديـون للـديـان
وتشهد جوارحنا علـي مانعمـل=بأمرالالـه الخالـق الرحـمـان
علام ماتخفي الصـدور وتبـدي=منـزل الـتـوراه والفـرقـان
الله خلقنـا لـه عبيـدن نعـبـد=اللي ذكر فـي محكـم القـرآن
ماهو بحاجتنـا وحنـا بحاجتـه=الله غني لاكـن بنـا لـه شـان
يالعبد دامـك بالسعـه متعافـي=حاذورك التفريـط والعصيـان
لاتحسب أنـك بالكيـان مخلـد=الدايـم الله ومـن عليهـا فـان
مادامـت الدنيـا لحيـن قبلنـا=ويـن الأبـا والعـم والجـدان
مابقـي الا أثارهـم واذكارهـم=عبره لمن عنـده فكـر وايمـان
لكن وين اللـي يفكـر ويعتبـر=نشـوف مـار قلوبنـا عميـان
الإ بتجميـع الحطـام الفـانـي=مثـل الذيابـه نجلتـد وذهـان
وان كان ماندي زكـاة اموالنـا=بالاخره تصـرف لنـا نيـران
وتدوسنـا بنحورهـا وأقدامهـا=وتعضنـا بالضـرس والنيبـان
ولايسلم الا من عرف حـق الله=وأدى زكاتـه واطعـم الجيعـان
ماهو ريا يرجي ثواب الهـادي=اللي فرض للدين خمس اركـان
وترى الربا لوشاف راعيه زوده=من باع به من مكسبه خسـران
لاجـا حسابـه مايسـره مالـه=لوهو يسيّـل بالذهـب وديـان
لاصار بطنـه بالربـا متحمـل=السحت في بطنـه ربـا ديـدان
وايضا البخيل بحالتـن مذمومـه=ومخاشره في رزقـه الشيطـان
يلمهـا ولايـعـرف حقوقـهـا=ويموت منهـا مكسبـه حرمـان
يركض بها المسكين ناشف ريقه=وينعم بها غيـر وهـو تعبـان
وغير الكفن وش مكسبه من ماله=يمكن يموت من الرهق عطشـان
ولا لي بطول الشرح مع خلق الله=الله رقيب الكـون واللـي كـان
وأنا الحقيقه معترف بقصـوري=ماأرجـي الله وأطلـب الغفـران
والله يهدينـا بهـدي الـهـادي=ويجعل لنا في طاعتـه عنـوان
تمت وصلى الله علي محمدالنبي=عداد ماهز الهـوى الاغصـان

يارجل ياللـي فـي غيابـي تكلمـت=علمك علـي بالـي ورزمـك فهمتـه
ياللـي بحجـه مستحيلـه توهـمـت=حولت حظـك وسـط بيـر وهدمتـه
سيلك تدفـق مـن شفـاك وتخرمـت=ليتك عن اللـي مـا استحقـه ردمتـه
وأن كان هادف لك هدف يوم هاجمـت=العقـل شـوري والتزامـك بصمتـه
وكان الجهل سيطـر عليـك وتقدمـت=ماظـن يثبـت قولـك اللـي زعمتـه
وأن ضعت مع طيش الطواري وهايمت=بركـت للحـق المصيـب وغرمتـه
غادي وخيّـل لـك خيالـك ورهمـت=وسم الحنيش لـو تلحسـه ماجغمتـه
غروك نـاسٍ مـن نسمهـم تسممـت=واللي عطى الله لـو تبـي ماحرمتـه
انصحـك وإلا ماعلـي لوتقحـمـت=دام أحتمـل زلـت رفيقـي حشمتـه
ونصيحتي وجهة نظـر مـا تغيشمـت=شبحي بعيـد ومـن غـدا ماغشمتـه
شبحـي بعيـد ولاأستعديـت نظمـت=والشوك لاجاء فـي طريقـي دقمتـه
وليـا بغيـت أهـدي هديـه وقسمـت=ماهـس بالميـزان قـسـمٍ قسمـتـه
أنـا ليـا منـي بالأوضـاع ساهمـت=أصـوّر الواقـع نـظـر لارسمـتـه
ماني غشيـم مـن التجـارب تعلمـت=وأن مـال ميـزان القريحـه حكمتـه
لامعنت بأسلوب المعانـي وخاصمـت=خصمي بجـزلات المعانـي خصمتـه
بلحـام سكـرت الملاحـم ولحـمـت=وعلـي منافيـذ المـلاحـم برمـتـه
لاسقت طـاروق القريحـه وصممـت=حذفي علـي اللـي يستحقـه رجمتـه
وبعض الكلام أخيرمـن رده الصمـت=وأن جاء من الجاهل غلـط ماجرمتـه
وعن بعض مانسمع ويهـرج تشيمـت=وسلم الرجال أهل السلـوم احترمتـه
ولوكل ماثـارت عجاجـه تحيزمـت=تهت الطريـق وكـل عايـر صدمتـه
مهما حصل بأسلوب عقلـي تحكمـت=ورأي الحكيـم المعـتـدل مالطمـتـه
لوكان به نـاسٍ توجـه لـي الشمـت=مهمـا يـقـال بغيبـتـي ماحلمـتـه
بعض الكـلام اليـا سمعتـه تلطمـت=وفيض المجالس ماأزعجتنـي نغمتـه
طبعي علي تأديب الأخـلاق داومـت=ومن ضاع عن درب السنع مادعمتـه
لابس حرامي من شفا السيل وأحرمت=والعلـم بالقلـب المفـتـح حزمـتـه
وحقيقـة الواقـع بـهـا ماتحلـمـت=مـن مصـدرٍ ماثـوق سـر وكتمتـه
ان شافهـا وإلا نصيـتـه وسلـمـت=وحددت لـه مرسـام حـد ووسمتـه
ودليـتـه اليـمّـه وبالله تعصـمـت=الا أن تراجع صاحبـي عـن وهمتـه
ظنـه ظنيـن اليـا قريتـه وترجمـت=بالحـق وأسنـاد الوثايـق هزمـتـه
وأن ضاق صدره من كلامي تبسمـت=وأن مد لـي كـف الرضـا ماشتمتـه
ماني سفيه اليا أحترك عـود برعمـت=واللـي مجنـب سيرتـي ماعزمـتـه
وان دار دولاب الهواجيـس وأبرمـت=معناي عن نقـد العـوارف عصمتـه
مابعت في سوق الضغايـن ولاسمـت=ماأخطي ومـن ميّـل عليّـه خزمتـه
ماأفطر علي تشويه الأوضاع لاصمت=وراس الصديع اليا أعترضني حجمتـه
وبسلوم لزمـات الرجاجيـل لازمـت=أسيرمـع سلـم الرجـال ولزمـتـه
وليـا سفهـت التافـهـه ماتنـدمـت=وماعـون خـلاق المشاكـل خدمتـه
وأنـا مـع اللـي يفتهمهـا تفاهمـت=ومـن لاتطـرق منهجـي مازهمتـه
وأن حدني حـادي قوامـه وقاومـت=سبحت مع مـوج البحـر وأقتحمتـه
جهـزت نفـسـي للعبوروتولـمـت=عمق البحر لوهـاج موجـه دحمتـه
وجهتهـا بيضـا صريحـه وحكمـت=أحكمت مضمـون الجـواب ونظمتـه
تم الجـواب اللـي نضمتـه وتممـت=والوصل مـن راع البريـد استلمتـه
وصدرتها بأسلوب هـادي وترجمـت=ومن لاظلم نفسـه حشـا مـا ظلمتـه
أدخـل علـي الله بالخطـا ماتذممـت=وحـق العبـاد وقدرهـم ماهضمـتـه
وجـو الصداقـه ماسجتـه ولغمـت=معرض عن الغايب ولا أكـل لحمتـه
ودام أمتلك نفسي عن الظلـم حرمـت=لوكـان تجذبنـي لشخـص أتهمـتـه
لبستهـا ثـوب المناعـه وسجـمـت=وأرجي عسى الجاهل يوطي رضمتـه