قصيدة الفخر ... في حفل قبيلة الزواهرة من حرب

قصيدة ( الفخر )

في حفل قبيلة الزواهرة من حرب

لأبنهم الشيخ /

مساعد بن هليل الزويهري الحربي



للشاعر /
فواز بن محسن بن لاحق الزويهري الحربي


🌿🌿🌿🌿🌿🌿🌿🌿



باسم الله الراحم الرحمن رب البشر*
له المحامد كريم الوجه قادر غفور

رب الشعر والبيان إن قلت بيت الشعر
فالله ربي وربه والشعر له ظهور

منهو بدا فساحته يصبر لمس الجمر*
ولا كل من جر صوته نال كرت العبور

سجيت ساري في هاجوسٍ سقاته سحر*
سحر البيان استهل وصاغ سبك الشعور

سبكٍ سما فالسما سمو الوجيه السُّفُر*
نفعه *سحاب ن سقا وسيله يسر الصدور

نقوة حروفه نقاة اللي لكيفه *بدر*
لبلاد خولان وجاب البن خالي قشور

حتى ليا منّ حمسه زان ... لونه شقر
دقه في نجرٍ طرب صوته بعث للسرور

ولقمه في دلة *الرسلان فوق السمُر*
والهيل هندي على الدلة مدشش وفور

والزعفران اصفهاني والعويدي بهر
كيف يقدم شعر يرقا لذوق *الحضور

الليلة ... الليلة .. *المعنى بسطح *القمر*
عالي فمقاماتكم شيخان ينصى وجبور

ياضيوفنا حضوركم فالحفل سر الصدر*
وأوفى الكرم والقرى زين القبل والبشور

يامرحبا رحب مزنٍ بارقه من بحر*
لا هل وبله كما الهداج يمحي الدهور

ويامرحبا مثل شهدٍ من علُوَّه سخِر*
من وقب في نايفٍ ما راده الاَّ الصقور

وأعذب من الما.. ليا من جاك جاري بنهر
وأزكى من الزهر وأطيب من صنوف البخور

ترحيب من قلب **ولسانٍ **بصدقه **جهر*
يليق بضيوفنا ويبقى بطول العصور

وإن حان وقت الفخر فحنا رجال الفخر*
نفخر بدار السعود .. المجد فينا فخور

باخوان نوره هل العوجا عيال الصقر*
اللي جمعنا على توحيد خالص ونور

هذا الوطن دونه الأرواح خطه حمر*
منهو تعدا حدوده **و *الله إنه **ثبور

الشعب كله جنود إن جات ساعة صفر*
يردع بعزمه خفافيش الجهل والشرور

نعالج الفكر وندعس فوق راس الخطر*
ولا همنا الناعق اللي محتجي فالجحور

تبقين يا دارنا *في *أمن **بحرٍ و بر*
يا دار *سلمان *عزك هايبته البحور

والليلة ليلة و طن شعر وثناء وشكر*
ونخصها لابن هذي الدار نمر النمور

ابن هليل كريم اليد عالي القدر*
اللي لخدمة بلاده خط حرف السطور

في كل ميدان له بصمه ... ونحت بحجر*
سفير حسن النوايا فالأمم له جسور

في مجتمعه ابتدر من خير كسبه درر
والله يزيد الذي بالخير دايم شكور

ويابن هليل حفوك الربع فخر و ظهر
ربعك زويهر رجال الصدق وقت العسور

لابة كما الموج لا هاج البحر واستطر*
منهو يرد *البحر لا للبحر صار فنفور

يضرب على البر وإن البر ما كن عمر
وفالسلم جوفه كنوز وخير للي وقور

أهل الكرم جودهم مثبوت بنيو حجر*
يوم إن راع الخدر بالورد *ماله صدور

من حرب كسابة الأمداح فعل وذكر*
مغلين الأسعار بانين المنازل قصور

فكاكة الحيل فالوقت القديم الغبر*
في وقت ما تمتلي لهل المراجل قدور

سيف الملك للوطن شلفا تجز النحر*
ولنا مع أخوان نوره بيعةٍ *ما تبور

ولنا شواهد على حسن الولا والجسَر*
الأبرق بجدة يوم أم الفتايل تثور

مع المؤسس قبيلة حرب سيف الظفر*
جند الوطن والفخر برجالنا فالثغور

كلام شاعر حروفه مثل عذب المطر
منطقه مثل العسل من جلب نحل الزهور

صلوا على أحمد عدد ما الورد خن العطر
واعداد ما عقرب الساعة بوقته يدور

〰〰〰〰〰〰〰