ديوان الشاعر صالح بن حمود القويضي العياضي

بسم الله الرحمن الرحيم
السلام عليكم ورحمة الله وبركاته
يطيب لي أن أضيف ديوان شاعركم : صالح بن حمود القويضي العياضي العمري

وأتمنى من أبن العم الغالي : أبو راوان النويمي وضع هذا الديوان مع دواوين الشعراء وأنا سوف أوافيكم بجديد أبو بدر أطال الله بعمره

.

ونبدأ على بركة الله

قال الشاعر هذه القصيدة في قبيلته قبيلة " العياضات

::

الله من قلب تهيض وهاضي=وهيّض غرام القلب له ماضي ماض
ماهو غرام معسلات اللحاضي=شوف الرسوم وعقبهن شوف الانقاض
وليا طرو لي كاسبين البياضي=بحلو الكرىة ماهملج الجفن بغماض
ماني المريض اللي عظاه المعاضي=من برد دمه مالقى عرق نبّاض
اللي بطرفه عن عيب نفسه غضاضي=ونقاد لمنهو للملازيم حفّاض
وياهيه يامكثرين اللضاضي=ماهمني لايض الهرج وان واللاض
وياناشد عني تراني عياضي=ولي الفخر اليا تسميت بعياض
من لابة يكوون كي النجاضي=لياصار للحبل فاتل ونقاض
يوم " الاحيمر" وسط " ربدا" يحاضي=جاه العديم اللي على الخصم قضاض
من كف " أخو علثا" عظامه شضاضي=وامسي عليه الحوم للريش نفاض
" وابن حمد" يبا الطمع والتقاضي=ومن ضربة " عليثه" سليل النفس فاض
وشلنا " الدخيل اللي عليه اعتراضي ="بجنابنا يامن ووسط العرب راض
علم صحيح ولاييجي له نقاضي=ماينقض لو تنقض خمس الافراض
ولا همنا خطو الذيوخ الجحاضي=خدام للمبعد وللشين لفاض
ولياذاق من خطو الرويب الحماضي=وليا امتلى بطنه على الناس حراض
ويشوف نفسه شيخ ندوة عكاضي=القول قوله وللقوانين فرّاض
خله بغله بالمجالس يضاضي=لاجازل دلو ولا خادم حاض
وصلو على الي مابقلبه فضاضي=عداد مابرق بجنح الدجا ناض

[line]ورد عليه الشاعر بعيجان بن منور العياضي بهذه القصيدة ::

يامرحبا باللي جدوده عياضي = خمسة قرون وكلها جدك عياضي
أفعال ربعك ثابته يالعياضي= الله يرحمهم تحت ذيك الأنقاض
فكاكة البل في نهار الركاضي = كم واحد طشوه في تلك الأفياض
وزبن الدخيل اللي عليه اعتكاضي =صحيح ماقلته ولافيه نقاض
وربعك عباة دافية يالعياضي =ولاني مساعد واحد منكر عياض
ولايهمك اللي عامل شيخ قاضي = اسم استعاره ينقصه حكم الألفاظ
لو تطلبه شي من العلم فاضي = درك ضماء لوكان تملاله الحاض
بعض العرب يزعل على غير راضي=ويعجز اليا وردوا على العد قياض
من ناشكم نوشوه لايروح راضي = وصديقكم داروه حتى لايغتاض
وعزي لمن لاله مع الناس ماضي= عزي لمن لاله مع القوم مركاض
شد الأمانه شدها يالعياضي= ولايهمك اللي فالدهاليس قراض
ولانته بمرسال يجيب المقاضي = ولانته كما منهو على الغلب غماض
أنت القويضي لك من المجد ماضي = شلت الحمول اللي كما السيل فاضي
وأنا يابو نايف أبا الكل راضي =حتى صغير القوم مابيه يغتاض

هذه القصيدة للشاعر / ناجي بن سعد الصندلي السبيعي وهي في قبيلة حرب

رجم على كل المراقيب نايف=مايعتليه إلا نوادر صقورها
رقيته ثلاث ايام واليوم رابع=من العصر لين الشمس ينزاح نورها
تقودني يمه هواجيس خاطري=كما قاد زيزوم السرايا سبورها
ابي عسى المرقاب يبرد لواعجي=وفيه اتخيّل مامضى من عصورها
مضى لي ورى الشعرين عشرين مثلها=وعشر تخالط سودها مع غتورها
ولاعاد للخفرات يمي سوارح=لوكان لاقفاها تقفي نشورها
راح الهوى العذري وقفت ركايبه=وحظت به خفافيش تمشط شعورها
قوراش توال اليل نوامة الضحى=وعن الفضايل قاصرات شبورها
بارد حماض الجوف همه على امه=بعد صلاة العصر يبدي فطورها
يالله لاتجعل للانذال وارث=تمحا عناصرها وتمحا بزورها
حيث انهم صبخا على الارض مره=لوكان تسقى من شواطي نهورها
ياليت بوجيه المطاليق شاره=عسى لهم في كل دار سرورها
اهل الندى والشيمه العنقريه=مثل ليلة قمرا تلالا بدورها
الاجواد يافراج تحمد صفاتها=تنبت نواميها وتزهر زهورها
عسى دار "حرب" من الحجاز الى السهل=يمطر عليها من سحايب بكورها
وعسى دار" حرب" الى اجدبت كل ديره=تعلو منازلها وتشمخ قصورها
وعسى دار" حرب" الى قصر كل مبنى=يوضي على النجدين بالعز نورها
وعسى دار" حرب" الى دجا داجي الدجا=تخضر مسايلها وتخضروعورها
وعسى دار" حرب" الى اخضرت كل ربوه=رجال توقرجارها من وقورها
كله علشان النواحل معارفي=اهل مرحبا بالضيف لاجاء يزورها
كله علشان النواحل هل العطا=تبذل يمانيها وتفرح صدورها
كله علشان النواحل هل الوفا=اللي وفاها نابت من جذورها
نواحل ياوي والله قبيلة=لهم مع التاريخ والعز دورها
ونواحل ياوي والله نوادر=حرار شرق تنجلي من وكورها
عليهم سلام عد ماذعذع الهوى=واعداد ماهلت مقادم شهورها
واعداد ماغنى على الروح شادي=خلج الحمام اللي تلاحا بخورها
عرف الديار وعرف اهلها مكاسب=قوم تعرفها ودار تزورها
وصلو عدد ماناض للوسم بارق=واعداد غيد مايلات حثورها

[line]

وهذا رد الشاعر صالح بن حمود العياضي على قصيدة السبيعي علماً بأن هناك الكثير من شعراء قبيلة حرب ردو على السبيعي ومنهم الشاعر غريب ابن ناحل

بديت بالمرقاب وابديت ماخفى=وهاض الفؤاد وهيضنّه سطورها
سطور قيفان غوال تقافت=كما يتقافى من السحايب بدورها
ابيات نظم للسبيعي نظمها=نظم الجواهرمحكمّات سيورها
لولو ومرجان من ناجي هدية=جابها غواص البحر من بحورها
بحور شعر ماخاضها كل سابح=ويصعب على غير ناجي عبورها
وساعة لفى بحي " حرب " رسوله=زاد الفرح بقلوبهم مع سرورها
قالو : هلا حيت ماناض نايض=نوض البروق اللي سامرات سمورها
يامرحبا حيت ياطارش الوفا=من ديرة ماشكى الجار جورها
اللي فدت بالجار غالي الضنا=من خوف شيئ مع القبايل يعورها
من ديرة سبيع كسابة الثنا=اللي على الفضايل طايلات شبورها
مروين حد السيف في حومة الوغى=وليا اختلط عج الرمك مع كتورها
نزالة للضيف في عالي النبا=وساع الرفاف اللي مشرعات كسورها
رد الصنايع بين القبايل فضيلة=بالفعل وإلا بالقول تنشر نشورها
قلته مثل ماقال الناحلي في مقاله=نيابة عن " حرب الحرايب" بدورها
اللي فدو بالجار والضيف والخوي=سته ويمنا من يمنى " نويشي " عثورها
والبلالي فدا عن روح جاره بروحه=روحه عن اللذات زارت قبورها
وهذا صحيح القول وللقول شاهد=شهدها " الشمري " بماضي عصورها
وصارت مع العربان مضراب للمثل" =دخيل ونويشي " سوروها بسورها
يشهد على ماقلت ماقال غانم=" الغضوري " رد الثنا في حضورها
اربع سنين والجرب في ركايبه=وسط " حرب " مايذير ذيورها
وان ركبو هدف المقام وتجاوبت=صوت المحوص والدلي في حدورها
يقلط على صافي المقر ذوده=وقطعانهم تقهر لين يصدر صدورها
ترتع المرتع ومن دونها القنا=بضف " ابو جلال " تقطف زهورها
ليا صاح " ابو جلال " بالصوت واعتزى=تشبع بمركاض " اخو حسنا " نسورها
اللي بدس الطير ثنا بسابقه=بوجيه خيل معطياته نحورها
وتماوجت صم الرمك ماثنت له=خوف من " الفسقان " يبتر ظهورها
" وخلف ابن ناحل " ليا عدو اهل الكرم=مع لوذة المسعروقاسي دهورها
صينيته يشبع بها كل جايع=وباطرافها الرملاتسقم بزورها
هذي فعايلنا على اللين والقسا=يفخر بها وسط القبايل فخورها
ولاهمنا منهو للافعال جاحد=اللي يشوف بحول العيون وعورها
وتمت وصلى الله على سيد الملا= اعداد ماشعت الكواكب بنورها

هذه قصيدة فخر في بني عمـر

الله يامجري الينابيع من الصفا=بأمرك بعصى مسى يجري زلالها
ياجالي عمى يعقوب من ريح يوسف=ويامنطق الهدهد يفهم سؤالها
نطلبك قول ليا قلت ماقيل كاذب=وتجعل لنا عن عوج المسالك عدالها
ياناشد عني خذ العلم مني بحاضر=من الراس مايحتاج ناس تسالها
انا من عوجان المراكيض عمري=لاطار عن جرد السبايا جلالها
من لابة تضد الضد في حومة الوغى=لاشرعت بنحور الاعادي سلالها
عمور وان عمّر الجو بالدخن=كم شيخ قوم داسته وانحى لها
يتلون عقب عقاب حماية الضعن=لاجاوبت ذياب لذيب عوالها
نطاحت الصابور بحدود صارم=ليا قضع اللويصق بالجماجم وشالها
من دون خور العمور نثارت الحمر=مدلالات بالريف تزهى دلالها
ترعى طنف بحدود شلف تلضى=ولا قيل للفتال افتل عقالها
لاورحت من خايع من الوسم طانف=تنف بخشومها وهفت اذيالها
وان حافهن الحواف نادن محمد=وضيف الله ومن فوق مشمر استوالها
ليا سيقت العطفه وانعطف كل جادل=وقامت تلاعب بجدايلها وتنخى رجالها
من ضربهم سرّج الخيل مرّج=وكم مارج بالكون تسحب حبالها
هم شيوخ عمر من العامرات الخوالي=لانشفّت من جم البلايل بلالها
يشهد على ماقلت من قال ذمه=بشيوخنا اللي من بعيد منالها
من حرب الحرايب لادارت الرحا=ترسي كما ترسي شوامخ جبالها
كم سربة بنحورهم غرها زايد الرها=لين اعذرت بغيها مع عيالها
ضرب البواتر بتّر حبال جمعهم=وراحو شتات مع شاسعات سالها
يوم نجد ميادين الطراد بالثرى=بصيحة تعيد من السنين سمالها
واليوم غشاها غاشي الامن والرخا=وغنتبها الورقا بوارف ظلالها
بحكم السعود ثبت الله حكمهم=القيادة اللي مارضينا بدالها
اللي لعزة شان الاسلام همهم=بأمانة على الكاهل ثقيل احتمالها
عسى لهم من سامك العرش نفحه=بعز وتمكين تبلغ آمالها
يمّكن لهم تمكين ملة محمد=لحيثهم انصارهم ومن اهتدالها
وملوكنا خدام للدين سلاطين العرب=غصب على عدوان الشريعه حثالها
وكل القبايل عن مسلك العيب والردى=بطيب الفعايل طايلات سبالها
بالسيف والمنسف والجار والخوي=تافي وتوفي ووافي مكيالها
ادرى على الحظ ماعرّض الحظ هفوه=والناس يعرف صدقها من مقالها
اشير واشاور لمجرب الوقت عارف=وآخذ نوادرها ومصادرها عقالها
واسباب ماهاج القريحه وهاضني=شوفي على الهزبري تطاول ثعالها
لو هم بزمان لاصاح صياح النذر=لقيتهم بين العذارا لابسات شيالها
قالها العمري يوم عمّر القاف وانتظم=نظم القوافي يوم جاله جالها
واعداد ماهلت غر المزون وركزت=ذعذع بها النسري وسكّن شمالها
صلو على المبعوث للناس رحمه=محمد اللي لدين ربه دعالها

وهذه مرثية الشاعر بوالده المرحوم بإذن الله الشيخ حمود بن محيميد القويضي العياضي

يا الله ياللي حجزت البحر بأمواجه=عن البشر من دون حاجز وجيلاني
يا وامر من صدوق المزن ثجاجه=يبرق ويرعد ويهل الوبل وداني
يامن جعلت القمر والشمس بأبراجه=كل يسير وينير ولا يدرك الثاني
يامجري المغتسل لايوب بعلاجه=وبريح يوسف ابصرت بعيون عمياني
يامن خلقت السما و الارض وفجاجه=انك بمنك على التوحيد تقداني
لسنة نبي تنبا عقب معراجه=بسنة خليل الولي بخمس الاركاني
وبسدرة المنتهى انتهى يوم السما داجه=السدرة اللي غشاها ريح ريحاني
ياالآدمي لو فرشت الارض ديباجه=لابد من عقبها من بيض الاكفاني
لو انت طير يطير وياخذ ارواجه=تسبح بوسيع الفضا وتكفخ بجنحاني
لابد راسك نثيل الترب مدحاجه=عقب النظر تغضي وتغمض بالاعياني
بساعة لو رفعت السور وسياجه=سلبك راع القضا وخلاك عرياني
تسكن وحيد بوسط القبر وتواجه=السين والجيم وما بالخفا باني
كانك على ملة محمد ومنهاج=هطه نبيك ودينه خير الادياني
ابشر بخضر بريح المسك نجاجه=ومع الرضا خازن الجنات رضواني
وان كان رجلك عن التوحيد مواجه=زليت درب النبي واصبحت خسراني
ماوراك نار تهيل القلب وهاجه=ومن حرها ذاب الحجر لو كان صواني
يالله طلبتك سريع الامر بأفراجه=ياواحد مادعينا دونه الثاني
تفرج لعين تهل الدمع زعاجه=باسباب من فارق الدنيا وخلاني
هليت دمعه على الخدين مدراجه=اظن دمعي يبرد لوعة احزاني
والله لو القلم من دمعتي زاجه=ليمل ويكل ماكل وجداني
عليك ياعمود البيت وسراجه=يابوي يوم القدر بفرقاك فاجاني
والله لواني عطيت الملك مع تاجه=فيك العوض يارفيع القدر ماكفاني
ماانته من اللي يزوم وينفخ اوداجه=على رفيقة يلوم ويفرح الشاني
ياعنك ماقالو عنك بالشين هراجه=حميت عرضك عن فلان وافلاني
وان جاك هرج النقيلي وناقله عاجه=تازن جوابك ومن لسانك بميزاني
واطلب من اللي تزور البيت حجاجه=يثبت جوابك بقبرك راعي الاحساني
ويصب من رحمته ماصب هداجه=على قبر ساكن به راس حياني
وياقلب اطلب وليك وبالدجى ناجه=يفض غيض يكظ الفيض باجفاني
وعداد واط وطى فوق الوطا وباجه=صلو على المصطفى من نسل عدناني

قال الشاعر هذه القصيدة بالأخ / عليان الطهيمي بمناسبة دخوله زيان الابل بأم رقيبة

:

بأسم قبيلة حرب شكر وتقدير=مني ومنهم للطهيمي علسان
اللي بنى بيته مشيد مثل " كير= "والبن الاشقر يتبعه قرّح الضان
نشكرك يالحربي زبون المخاسير=ياريف من جالك على الكيف ضرمان
تقدم لهم فنجال صفر مباهير=يبرى لهن العود من غال الاثمان
يارعي الطوله طويل الاشابير=تنشر لك البيضا على راس مابان
والبيت بأطرافه نشوف المغاتير=وضح كما مزن طفح فيه ربّان
عسى لهن بيوم المزاين تباشير=وتباشرو بالفوز من عالي الشان
والفوز فوز ويهيّض الاشجان ويثير=عذب القوافي من غريبات الالحان
حتى يزين الكيف كيف المناعير=ويغرد بها القمري على روس الاغصان
وعداد مارف الجناحين من طير=صلو على اللي ماعبد دين الاوثان

هذه القصيدة قالها الشاعر في الشيخ / جازي الوسوس الفريدي رحمه الله تعالى :

امس الضحى عديت روس المشاريف=واشوف دار الشيخ شباب ناره
دار الصخا دار بها يكرم الضيف=قولة هلا حييت دايم شعاره
ثولة هلا ودلال صفر على الكيف=في مجلس مابين ضيفه وجاره
"جازي " ولد " هجاج " ريف المهاجيف=وهيف الردوم اللي كبير قفاره
من دون تنشد شوف بيته ليا شيف=يزمي كما تزمي مع الصبح صاره
عساه يسلم ماتجيه الصواديف=بجاه من يتبع بليه نهاره
جعل السحاب اللي بروقه رفاريف=يمطر على " طلحه " ويخضر خضاره
ترتع بها وضح النياق المشاعيف=اللي على الطرقي دروب حواره
يزهن " ابو نواف " وضح مواليف=ومع ولفهن للصوت فيهن صطاره
يندب لهن " جازي " ويجنه محاريف=مثل النعام ان شاف زول وذاره
واعداد ماهلت مزون مراديف=صلو على طه نبي البشاره

هذه القصيدة قالها الشاعر في " النواحل :

مع التحيه للنواحل هديه=رمز الوفا من صلب " حرب " الحريبه
يوم القصا والجوع والناحليه=مضرب مثل يوم السنين الصعيبه
خلف على مر الوقوت القصيه=وسط العرب بالضيف كل درا به
اهل البيوت النايفات الذريه=وصدورهم للضيف دايم رحيبه
قصيرهم مايوم جاته شكيه=وافعالهم بالجار ماهي غريبه
بأسبابهم عم القبيلة سويه=مدح على روس الخلايق شديبه
ولا والذي بالطور ناجي نبيه=علام ماتخفى السراير بغيبه
ان عيني على " طولات ربعي شقيه ="ويفز قلبي لاسمهم واعتزي به
وترى حلاة القول ياهل الحمّيه=ليا صار عذبات المثايل مصيبه
وصلو على المبعوث خير البريه=عداد ماسال السهل مع شعيبه

طاش ماطاش

الله من شيئ بخافي الحشا جاش=واحر من لاهوب لفح السمومي
والجفن عن طير الكرى فيه نهاشا=سهر وساهر ساهرات النجومي
صارت مجالسنا على طاش ماطاش=وإلا هدف هداف عجل الهجومي
قالو تعلل قلت : نسهر على ماش=مايبري المجروح فلم الرسومي
قالو : عديم الراي والفكر منداش=تسهر وتنعي ماضيات العلومي
ياناس انا كيفي معاميل وفراش=في مجلس والضيف فيه محشومي
لوكان من قبلي لها الوايلي حاش=مشعان ابن هذال راعي القحومي
يابدر خلك للمسايير بشاش=ويضحك حجاجك ليا لفوك القرومي
وليا لفو بيتك مضاريم وعطاش=قدم لهم فنجال ريحه يعومي
مع سفرة يرمى بها حيل واكباش=ماهو ريا يابوك دون اللزومي
وتعيش بالدينا بعرض كما الشاش=ويثني ثناكم طيبين السلومي
وإلا الردي بعروض الاجواد حشاش=شذاب للعرقوب بأكل اللحومي
وعداد ماموج البحر بالبحر طاش=صلو على المختار خير معصومي

جتماعيه

البارحه ماذ قت للنوم لذات=والجفن عن طيب المكرى به نواتيب
طار الكرى وجريت بالصدر ونات=ومن ونتي ونت ضلوع محاديب
يالله لاتفرح عدو وشمات=صدقان بالظاهر وعدوان بالغيب
كم واحد بنفسه علينا حزازات=وقلبه من البغضا تجيبه لواهيب
شيئ برا حالي وجاني من الذات=واثر على قلبي جروح معاطيب
جداوي من صدري كثير التنهات=وارجي الفرج من عالم السر والغيب
والله يا لولا مبداي روس الطويلات=لاجاب والورقا على الغصن واجيب
واجيب من خافي المعاليق زفرات=يذوي بها ذابل الرمش ويشيب
شفت الحسد والبغض بين القرابات=تركض ورا المقفي بشذب العراقيب
وان قدّر المولى على الحال خلاّت=كل على ماجاك يشناك ويعيب
ويفرح ليا شاف الدهر فيه ميلات=يركض بها المبغض وينقش بها الجيب
" والصبر مفتاح الفرج كل الاوقات=ومن لاصبر راحت حياته تعاذيب "
وعداد مالبو ولجو بالاصوات=من على الهادي صلاة بترتيب