بيني وبين الشاعرالكبير سداح العتيبي

سلام عليكم قصيدة موجهه للشاعر الكبير سداح العتيبي

يقولون سداح العتيبي يثير الشوق=بصدر الهجوس للي من الله موهوبه
ومن منطلق ماشفت يالشاعر المرموق=سرى هاجس الافكار وافتر دالاوبه
قريت القصيد للي معه كل فكر ايتوق=قرايح خيالن عذب مابعده عذوبه
ياحلو القصيد للي يهيظك للطاروق=اذا الجزل له مندوب سداح مندوبه
انا شاعرن معجب بشعرك من المعلوق=يازين الصحيح وكلمة الحق محسوبه
قطفت الفرايد مثل مايقطف الزملوق=وبنيته من الجزلاات طوبه على طوبه
مثل ماحمو ربعك عتيبه خيار النوق=حميته عن الهزلاات واوفيت ماجوبه
ياكثر القصيد للي نشوفه ولا له ذوق=الايام مختلفه ولااوضاع مقلوبه
سلعة(خم وانطل) زودو سعرها بالسوق=وهي في عيون الحق والصح مضروبه
رسايل على الشاشات والسر فالصندوق=ومن شفه المفتاح يرهي من اجيوبه
غدا ثلث راس الشعر بعد ابتلوه افلوق=يصبون منكوسه على راس مسحوبه
ياابلفيت عفريته يخرج وسيع اشدوق=ياحاول يطير ضلع (ابانات) بسلوبه
يغرد من الطاقه من الشوق للمعشوق=يجرد حبيبه كل ماظاق من ثوبه
يعاني جروح الصد من غيبت الغرنوق=وامن النعمه للي فيه مايلتن اجنوبه
وعن مايكن القلب عبرت في طاروق=وكلن يعبر ياولد روق بسلوبه

علوم العرب لاجات مـن مصـدر ٍ ماثـوق=عليها السنـد ماهيـب بالزيـف مكتوبـه
بعيده عـن التلفيـق والحنشلـه والبـوق=ومن دونهـا البيبـان بالصـدق مضبوبـه
مثل ما حقوقي ثابتـه .. للرجـال حقـوق=ومـن يجحـد المعـروف قلبـه بلغبوبـه
أشوف الطريسي ساق كل الفرايـد سـوق=يتلّ الذوايق ليـن تمشـي علـى دروبـه
لقيته يجر الصـوت فـي قمـة الشاهـوق=ولـدّوا نظرهـم مبعديـن النظـر صوبـه
و وقفت أتوحّى فيه .. وأرفع عيوني فـوق=وخدّر هجوسي لين راحت فـي غيبوبـه !
هذا والله الإبـداع فـي معجـم المنطـوق=قوالب ذهـب بالسبـك والحبـك مصبوبـه
تمّلك عليهـا مثـل حكـم الملـك فـاروق=على أرض الكنانه يوم شعبـه تنـادو بـه
وانا خابره شاعر عن الغيـر فيـه فـروق=ومن لابة ٍ مـع سايـر الخلـق محبوبـه
عسى الله يعوق اللي يدوّر عليـه العـوق=له النعم فوق النعـم .. والـلاش والكوبـه
فداك المبابي يا ابيض الوجـه والخثـروق=يبا يلفت الانظـار .. لكـنّ وش هوبـه ؟
يلـوّح ورا المذيـاع ويسابـق المسبـوق=وبعد طاح صاح .. وحكّ ظهره بعرقوبـه !
لا يزعل على الدكتور غسّان .. بدر صفوق=لجان الشعـر فـي تالـي الوقـت لعبوبـه
لكنّ المثل صـادق ومـن ينكـره مفهـوق=ترا الشمس بالمنخـال ماهيـب محجوبـه
تقبّل جوابي يا الشبابي .. وأنا أبـن روق=مع أصدق تحيّه بأجزل الشّكـر مصحوبـه