ربعي قبائل حرب للعز وراد ....

هذه قصيدة قليلة في حق هذه القبيلة وبعض شعراءها

قال المثل ماينفع الصوت لو زاد = لصار هرجك مالعرب سامعينه
وانا بقول الصمت لاعاد لاعاد = لاعاد يومً به نشوف الغبينه
اليوم بعلنها على روس الأشهاد = قدم القلوب الصاحيه والفطينه
ماهمني بالناس حاقد وحساد = ماهمني من كان يكثر رطينه
واللي على الزلات يرصد بالأرصاد = مايدري أن الشعر داره حصينه
بين الحداري وبين صياف عواد = وابن سند وأيضا ً رجاالله قرينه
ثلاثة ً وسط المقابر والالحاد = والرابع الله يمهله في سنينه
ومن غيرهم عشرين وألاف واحاد = وكلن من الجزلة يدسم يمينه
واليوم هذا يعتبر يوم ميلاد = ميلاد شاعر فوق ظهر السفينه
سفينة بالبحر تمشي وتنقاد = وربانها ماصاد غير السمينه
والجزله ان كانت ورا سوق بغداد = أتعب وراها لين أجيب الثمينه
واثق ثقه ماني على حافة الماد = متجودً لي في حبالً متينه
ربعي قبايل حرب للعز وراد = دوم المراجل في يديهم رهينه
من ماضي الايام وعصور الأجداد = مدون التاريخ تتعب يدينه
أمورثين العز لجيال الأحفاد = جيل ً تقفا جيل متوارثينه
أسود سادو فوق من كانو أسياد = بالطيب وإلا بالسيوف السنينه
لن ركبوا الفرسان بضهور الاجياد = طشو زعيم القوم وإلا عوينه
عدوانهم تشرب على الغبن الأنكاد = كم عين نامت من قهرهم حزينه
في مامضى يوم أنها حرب وجهاد = و ربعي سنام المجد متقاسمينه
وان كانها بالطيب مصدر وميراد = اموردين الطيب ومصدرينه
يوم الكرم والجود من طبع الأجواد = مايعقد الحربي لضيفه جبينه
لوكان ماعنده شرابً ولا زاد = ايقدم الميسور والله يعينه
واضرب مثل للناس توضيح وايفاد = كلام أقوله والعرب خابرينه
حجرف وابن ناحل لهم فعل ماباد = فنجال حاتم بالكرم شاربينه
مداتهم تشفي عليلين الأكباد = ماهي هروجً بالخفا ماستبينه
ولاني على ماقيل للغير جحاد = الطيب كلن ماخذن من معينه
كلن خذا حقه من الناس وزداد = والرابح اللي بالعمل زان دينه
هذا وتمت يوم للعلم نشاد = ماهو كلام الزور يا مدعينه

وأرجوا منكم المعذرة ودمتم سالمين