من اخر قصائد الشاعر الكبير ملفي الغيداني

هذه قصيده موجهه من الشاعر ملفي الغيداني للاخ العزيز /سالم مقبل الوهبي
وفيها رد ثناء للشيخ الدكتور / ايوب بن حجاب بن نحيت حفظه الله

يابن وهـب يوم اللتوى حبـل الانشـــاب = وأصبحت خال وصرت للحق مجلوب
وضـاعت علوم اللـي لاودا ولا جــــاب = (اللي مواعيـــده مواعيـــــد عرقوب )
دورت لك عـن فـزعت اللاش مجنــاب = ونصيت شيخ(ن) بالـمواقيف محسوب
شيخ(ن) طويـل ذراع في حـزم كـــلاب = وليــا وقــف بالـلازمه يـقضي الـنوب
ابن نحيـــت اللــي للامجــــاد كـــــساب = وللطيـــب وامـجاد الصنـاديد مـنسوب
في كل ماقـف طيب يحسـب له حســاب = وكل المواقـف دون عن ماقـف أيـوب
شبـل(ن) جمع طيب المزايا والالقـــاب =وتقــدير من ينصــاه في كل ماجــوب
جيتـه وضنـك فا ابيض الوجـه ماخــاب = يوم(ن) حبـل المشكلة صــار مكروب
فـك السجين اللي مكلـبش وراء البــــاب = أطلق سراحـه وانتهــى كل مطــلوب
بالمـــال سـدد كــاش لااقــفا ولا غـــاب = بدد همــوم اللــي من الــوقت مذنـوب
لو كل شي (ن) يابـو لافــي له اسبـــاب = واللــي حصــل كـله مقـدر ومكتـــوب
لكــن من الـواجـب ومن حســـن الآداب = إشهار طيب (ن) عم بيضـان ووهوب
ورد الثنــاء لايوب عرفـان واعجــــاب = حيث الثناء في سـلم الاخيار مرغـوب
انشـر له البيضــاء مع أصحاب وأجناب= اللــي صنيــعه حــل بصـدور وقــلوب
ويوم(ن) وضــعك كاد ماجــاك طــلاب = قــدر ظروف الوقــت وأيامه الــعوب
لا شرهة(ن) جاتــك ولا كلمـــة عتــاب = عاملك في معروف واحسان وأسلوب
وعقب اكتشف منك الوفاء زاك الأنساب = ونـك وفي لكــن من الوقـت مغلــوب
ماعرضــــك شامـــت وناقــد ومغتـــاب = سامـــح وقال بحـــل وهبـه لموهوب
ولاهــي غريبــة طيــب الراس لاطـاب = راسه على كسب الجزيلات معصوب
وريث مجد (ن) مشتــهر بين الاقطــاب = مجد(ن) تليـد وبالنوامـيس مصحــوب
مايجهــله يــاكــود من يجــهل حجـــاب = شيخ(ن) مافيـه من العذاريب عذروب
معتـــق بمــاله بالقســا خضـر الارقـاب = وبالجـــاه ابو ناصر مقــدر ومهيــوب
درع(ن) لنـــا في الضــيق لاكلـح الناب = وطود(ن)يظــلل عن سنــا كل لاهوب
ذخــر الشيوخ مطوعة روس الاصعاب = بيوم(ن) نهاره ليل والنــور محجــوب
وجوه مصــادم خيــل وسيـوف وحراب = وشلف (ن) تفج نحور وتسوي دروب
نحايته بـــالـــحرب تخشــى وتنهـــــاب = عدوهـــم قلبـــه من الخــوف مرعوب
يكــره لقـــاهم خــوف ويصيبـه ارعاب = يــوم البــرا مردود والحــرب مشبوب
لــــهم بهامــات المعــــادين مضــــراب = في ساعة(ن) فيها احمر الدم مسكوب
مدقالـــهم تخشــــاه عكفــــان الاشنـــاب = وفنجــال غازيهم من القــوم مشروب
تــمت وجعـــل أيــامـك سنيــن ياحجاب = يامن ذخرت لـحرب من صلبك ايوب

قصيدة جزله ورائعه

صح لسان الشاعر وسلم قلب الناقل

::

دمت بوافر التقدير

شكرا لك على نقل هذه الدره للشاعر المعروف ملفي ولاهي غريبه مثل هذه القصيده العصماء
ويستاهل ايوب00
بانتظار جديد الشاعر ملفي الممتع00
وتقبل تحيتي وتقديري00

يستاهل والله الشيخ ايوب ابن حجاب
ويستاهل ابوه حجاب ابن نحيت المدح والثناء
ابيض وجه اخوي الواثق
والله يعطيك العافيه على نقل القصيدة
صح لسان الشاعر ملفي الغيداني
كفى ووفى ولاهي غريبه عليه
دمتــم بخير

الواثق

بيض الله وجهك نقل رااائع

لقصيده متميزه

لشاعر كبير

صح الله لسانه وبيض الله وجهه

ويستاهل النحايته

بيض الله وجيههم شيوخ واهل مواقف وذكرهم خير دليل

ونعم ومليون نعم

والله يعطيك العافيه

تقبل تحياتي

بيض الله وجهك ياالواثق
وصح لسان الشاعر الكبير ملفي الغيداني
والشيخ ايوب يستاهل

اشكر الجميع على المرور العطر