هذا هو اللي هد حالي وسمه

ليس كلُّ من يغيب يغيب. . .

أُمي . . . يامن لم يَعُد لي في اقدامِها تَحْتُ. .

عند كلُّ عيد تكون حالي :

العيد فرحه واجتماع وحبايب=وانا من العيد انجرح والزم الصمت
لامن ذكرت اللي عن الكون غايب=تهل عبراتي وانا ماتكلمت
ومن يوم ماحطوا عليها النصايب=لو كنت بين الناس لامن طرت قمت

قصيده قديمه لم ترى النور ظلت حبيسة ذاكرة الجوال من شوال عام 1426هـ , ولم يطلع عليها أحد ,
ليس لشيء ولكن لحساسيتها عندي , رأيت ان اطرحها متعمدآ في هذا الشهر

.

لاتسألوني ليه وش في حيران=وإلا وش اللي هد حالي وسَمّه
ياناس انا للضيق والحزن عنوان=له وقت يسقيني مراره وسِمّه
وللحين انامحزون ضايق وتعبان=تعبت من همي ومن ثقل دمه
شوفوا شرار الضيق بالصدر بركان=عجزت أجامل بين ناسي والمه
ودي افضفض شي من مابي الآن=اشكي ولا حصلت شخصٍ أهمه
فاقد حنانٍ غير عن كل تحنان=وماعاد به حضن ليا ضقت أضمه
من غابت اللي سيلت دمع الأعيان=والكون بعثر في همه وغمه
وشلون أقاوم طيفها كل مابان=لا مر فجر في حشاي المطمه
وتناثرت في داخلي ذيك الازمان=يوم إن ضيقي مابعد شلت همه
وتسري بي الذكرى لياجاء مسيان=واسرح بها والدمع ماجف جمه
جسمي نحل والحال من دان في دان=عزاه لي والله ويرحمك يمه
ولا تسألوني ليه وش في نحفان=هذا هو اللي هد حالي وسَمَّه
أصبحت أعيشه حزن وأصيغه أوزان=واعطيه من نزفي بصوتي وأزمه
وتظهر صدى حزني تباريح الألحان=بحة غياب أمٍ تضيق لها امه
في مثلها فلنذرف الدمع هتان=وفي مثلها فلينزف الحرف دمه
وفي مثلها الضيق الحقيقي والاحزان=وفي مثلها فليصعد الشعر قمه
في مثلها لا سالت الدمعه أحسان=والله ماينلام من يبكي أمه
لا يابعد حب العذارى والأوطان=ولا يابعد حبٍ على غير ذمه
يالله ترحمها إلهي يا رحمن=يامن لياضاقت توجهت يمه