الشاعر مرزوق الهبيري
ياسعد عديت رجمٍ ذيبه الأسحم عوا
وغنيت فيه النادرات من البيوت الوافيه
وشاق النظر نجمٍ سماوي مرسله ربي هوا
على عفاريتٍ تقلبها الظنون الهاوية
بعض الشعور لمهجة الشاعر ليا منه غوا
يترك مساحات المجامل والتعامل خاوية
ومن لايدله عقله لمعقول هرجه لا نوا
يصبح ويمسي مايجيب الا العلوم الهافيه
وانا ليا غنيت ماغنيت من قل وخوا
لا والله الا املك كنوزٍ بينات وخافيه
واللي يكبر لقمته بين العرب ماله دوا
لابد ماتنشب بحلقومه ولو هي دافيه
......................................
رد الشاعر : سعد المحمدي
يابو مفرح ياصليب الراس ياعد الروا
يالوافي اللي دايم اعلومك تشوق و وافيه
خل السوالف من حدود الشام لعيون الجوا
يجهل هدفها من يحاول يصعد الاكتافيه
الجرح باقي مابرا والكي باقي ماستوا
والناس يامرزوق تتبع سفتي الاسعافيه
احذر من اللي لاسرح يابو مفرح ماضوا
رجليه من طرد الهمل بالقيض سود وحافيه
خلك سياسي وانتبه من ناس في وادي طوا
الحر يفهم بالاشاره والاشاره كافيه
انظر لصابع يدك ماهي ياولد عمي سوا
والسوق سعره يختلف والفرق بالاصنافيه