جيت المطار ويمه الشـوق جابنـي=شوق برى حالـي ودمـر شبابهـا
جيـت اتباهـا وتناسـا مواجـعـي=واثرى جروح الحب يكبـر عذابهـا
امشي ورى قلبي واداري عواطفـي=واعرف دروب الحب واسلك صعابها
عزى لنفس مـا استلـذت بعيشهـا=غـوت غـرام الغاويـات وعذابهـا
قالوا لي انسي من نستك وتزوجـت=وسدت بوجهك تالي الوقـت بابهـا
قلت اعلم اللي صار بينـي وبينهـا=وادري تلاشت " مي" واقفت اركابها
هذي ثمان اسنيـن والقلـب عندهـا=ينزف جـروح ودم قلبـي خضابهـا
ياما مشت رجلي على شوك دربهـا=تتبعني الذكرى وأنا اطـرد سرابهـا
كنت احسب ان الحب يسلا وينسـي=واثـره توقـد بالضمائـر وصابهـا
لي كلمة لاضـاق صـدري وقلتهـا=كلن يحسب مـا وراهـا ومـا بهـا
عفت البشر يوم البشر تاكل البشـر=والحقـد يمنـع وصلهـا واقترابهـا
من قـل مالـه قـل قـدره وهيبتـه=وتكثـر عيوبـه ويتكابـر مصابهـا
ورجله ليا جـت المجالـس تعثـرت=كلـن يحـاول ردهـا واجتنابـهـا
لقيت ناس أجواد والطيـب ساسهـا=والعـوز مـال بشأنهـا والتوابهـا
ولقيت نـاس عفـون كلـن يذمهـا=وزود الغنى والمـال شيـخ جنابهـا
مشيت من همي وطالـت مسيرتـي=في صحصح تاه القدم فـي هضابهـا
وجيت " الحناكيه" وهاضت قريحتـي=بابيات حـزت خاطـري واعتنابهـا
ذا مربط خيولـي وهـذي مزارعـي=عقب اخضرار الغصن يبست اخشابها
وهذي بقايـا مـن بقايـا منازلـي=واطلال يجتـاح الضمايـر ضبابهـا
دار " لنا " واليـوم صرنـا نمرهـا=جنـاب تخشانـا الديـار ونهابـهـا
عقب المعزة بـاول الوقـت والغـلا=اليـوم مـا نلقـى مكـان برحابهـا
عـز الله ان همـوم قلبـي تعامـت=والنار فـي جوفـي يزيـد التهابهـا
من قلت الحيلـه كوتنـي عزيزتـي=مالوم عينـي لـو يطـول انتحابهـا

لاباس يـا دحـام يـا معـدن الوفـا=يابن الرجـال اللـي عزيـز جنابهـا
عاشق ولك قصة طويله مـع الدهـر=والناس كـل لـه ظـروف شقابهـا
ولا انت الوحيد بـه الغرابيـل كلهـا=ولا كـل عايبـه يعيبـك عيابـهـا
تشكي زمان مـا يصالحـك صالحـه=كـن الديـار موجهـه لـك حرابهـا
جيت " الحناكيـة " وجـادت قريحتـك=وفتحت دعوى مؤصد الوقـت بابهـا
توجـد علـى دار مزايمـك حيفهـا=ما تقـل عقبـك عامـري وطابهـا
والدار نزلناها علـى شـرط وقتهـا=واضفينا على الدار العزيزه حجابهـا
وامّنـا مخافتهـا وحمينـا عفافـهـا=وأقمنـا عمارتهـا وزرعنـا ترابهـا
لين أصبحت يخشى عليها من الحسد=خص من اللي قد زرعها ورعى بهـا
اللي تركها يوم هـي غـض عودهـا=بظروف خسايرهـا تكلـف حسابهـا
هاك الحين يوم القنـا يقـرع القنـا=والخيل يـم الخيـل عـوج رقابهـا
اختـار لـه درب يوديـه للسـعـه=عن ضيق مؤنتها وعن شر ما بهـا
تسوقه الغربي وتضحـك لـه الصبـا=وتدعيه نجد الليـل وسـاع رحابهـا
يا بو بدر نفسك تمادي بهـا الهـوى=تحيل البـروق ولا يمـرك سحابهـا
وابحرت في بحر الهوى لين عام بك=بعيـد عـن بـر السلامـة وآدابهـا
لا ارتحت من كيد الروابـع وجرهـا=ولا ادركت "مي" اللي سطا بك صوابها
وأنت تعرف ما طاب لك ما يدوم لـك=ودنيـاك عامرهـا نذيـر لخرابـهـا