عند ربع"ن"لهم بالطيب صوله وجوله=كل علم"ن"يشرفنا مقاله نقوله
والدروب مخبوره والجمال معقوله=مايروس النجوم الا سهيل اليماني
الا ياسفر سو العلاقه مع المطران=ترى الوضع يستوجب علاقات سريه
يقولون في وقت"ن"مضى كان ياماكان=تلين الجبال من النجوم السماويه

عيدكم ياهل النبقيه سنين عايد=نعم ياعزوة الصلاح وقت الشدايد
طيبين الفعول وكاسبين الفوايد=مايروس النجوم الا سهيل اليماني
انا والمطيري بالدير كلنا جيران=علاقاتنا بشهود وحدود شرعيه
سلامات يامحمد ورى خاطرك زعلان=انا ما اخبر اخلاق الشبابي تجاريه

لاتقول الامور مدبره ومحكومه=السوالف لها شده ورده وقومه
مير ابنشد سفر تال السنه عن علومه=مايروس النجوم الا سهيل اليماني
الا ياعتيبي ماش شعله بلا دخان=وانا شايف الاوضاع ماهي طبيعيه
ترى يضحك الشبان مايزعل الشيبان=ولافيه راحه دام الاوضاع مقفيه

الامور محكومه وانت خلك مريح=لاتصيح على روس العرب لاتصيح
اثر عندك بلا وانا احسب انك صحيح=مايروس النجوم الا سهيل اليماني
تبى تشتكيني روح دور حقوق انسان=واذا صدقو لك هات عسكر ودوريه
بعد ما امتلى بطنك من الخوخ والرمان=تبي لك مطار"ن"عالمي بالشماسيه

من يقود البعير شعيل ولا يسوقه=كل واحد يفكر في نتايج طروقه
وانت واقف تلفت بين برقى وروقه=مايروس النجوم الا سهيل اليماني
تناظر ببن سلمي وتضحك لابن عتقان=وتنصب بثوبك والصناعه محليه
ترى كلها دعوى وطنيه رفيعه شان=مطار الشماسيه مطار البجاديه

كان ولياه للمعروف والطيب ناكر=سفرو حظرة ابن عبيد من صبح باكر
وازهلو كرسي الرحله وقص التذاكر=مايروس النجوم الا سهيل اليماني
محمد يفرقنا وحنا نعيش اخوان=تشيع وانا ما اخبر في حرب شيعيه
انا اخبرك هاك الوقت شاوي وراعي ضان=وش يعرف الشاوي حياة الرفاهيه

لاتسوون ياحظرة عتيبه سوايا=لو نفتش قضاياكم ياكثر القضايا
تقلبون الصحيح وتتهمون البرايا=مايروس النجوم الا سهيل اليماني
ترانا على سنة محمد نسل عدنان=ولو من كلامي يزعلون الحراميه
وانا أعرفك ابن برقى مثل طير ابن برمان=ما سنعت قوم ولا تسميت برعيه

القضايا تشرف والفعايل تجمل=يوم بعض العرب ينوي وهو ما يصمل
حطبه ما يكمل والجمر مايكمل=مايروس النجوم الا سهيل اليماني
ياحربي ياوجه الخير لاتقرب العتبان=تراهم ذرى"ن"لك كان هبت شماليه