*اليا دعاني من هل الطيب رجال*

*اجيه لو عني بعيده دياره*

*ضاري على قطع المسافه بالاميال*

*ماني بضبن جرته حول غاره*

*يامرحبا ترحيبتن فال وعقال*

*فيها من البن اليماني حماره*

*ولذ من طلع النخل كل مامال*

*على الجريد اللي خطير انكساره*

*تعم كل اللي حضر قدر وجلال*

*ابدا بها من طيب راس ونعاره*

*عن شايبن للضيف والجار مدهال*

*يدل هتاش الخلا ضو ناره*

*اعقيل اللي له محبه ومنزال*

*غالي وعالي عند ربعه وقاره*

*العزوه اللي لعتزى كل خيال*

*فيهم على العدوان نوف وجساره*

*واليا رجعنا للقدايم والاطلال*

*لهم بواد الحمض مدرك وغاره*

*مهما بصبيان اليزد صغت الامثال*

*ابقى مقصر في صريح العباره*

*لهم معي ماقف يسجل للاجيال*

*ماقف وفاء ماهو هياط وعياره*

*الصدق نفتح به صعيبات الاقفال*

*ونبني على حسن النوايا اجداره*

*والكذب سلعة كل فاشل ومحتال*

*مافيه مر وماب دمه حراره*

*ياسامع اسمع قول شاعر اليا قال*

*الصدق في دنياه دايم اشعاره*

*الحر مشرافه على المرقب العال*

*يبعد عن الدار الوبيه مطاره*

*والبوم وشباهه من اطيور ورجال*

*عن الشواهق بالوطا والجحاره*

*بالقول ماخصيت عاذل وعذال*

*تاكيد لمحب الفتن والاثاره*

*ياضامن الدنيا ترى الوقت ميال*

*بعد الحلا لابد كاس المراره*

*ماحي فيها مقيم ياساتر الحال*

*يالله سترك يوم كشف الستاره*