رد الجمايل بالقصايـــــــد له أسنين = والمدح لأهـل الطيب مابه زريه
يمدح كريم الذات مبطـــي وهالــــحين = وحنا نسوق أمع الطريق المطيه
وافين ونقــــــــدر رجـــــالً وفيين = ومن طبعنا شكر الرجال الوفيه
والطيب والتقديــر عملـــــه بوجهيـن = يكتب ورقها بالقلوب النقيــه
وأنا مُدان ولا أقدر أطلــــع من الدين = للطيّب الى زاد طيبه حميــــه
أهدي عليه من الـــــروابـــع مضامين = وأحس بالتقصير رغم الهديـــه
هذا محمد وقفتــــــه بيـــــن قوسين = ( صعبه على بعض العزوم القويه )
لجل إنها لو حولـــــت بالمــــوازين = تميل كفتها وتازن طميــــــه
عندي على قولي ثبـــــوت وبـــراهيـن = وقولً بدون إثبات يصبح خطيــه
وإليكم التفصيل عقب العناويـــــــن = بالموقف الي زادني معنويـــه
للي تحرك وأتصل قبـــل شهــــــــرين = عقب الخطاب الي شرح له قضيـه
وقال أعتبرني معك بالماقف الشيـــــن = وبالزين مايحتاج هرج ولغيــه
ثم أستوى للعلم نــــــاسً رفيعيــــن = يسعى محمد والمحاصيل ليــــه
كلم أخوه وقال مابه خيـــــاريـــــن = هذا الرجل يستاهل المقدريــه
وقدام خمس أيام صار إلتقائيــــــــن = الأول أقدم وأزهل الي عليــه
والثاني أبشر ياسليـــل العزيــــزين = أنته رزين ولا تبيلك وصيــــه
قاله سميي وأسمعوه المواليــــــــن = وتشاوشو تقل الهروج أنكريــه
صحيح مايعرف سلـــــــوم القديميـــن = إلا بدويً من عروق أبدويـــــه
وفهد ولد يملك مع العرف عرفيـــــــن = قليل تلقى بالمناعير زيــــه
لقيت فيه الطيب والحزم والليـــــــن = والناس ماهي بالمزايا سويــه
وشلون مايفرق وربعه بـــــداريـــــن؟= قومً على الطاله تشب اللظيــه
ركاب خيل وبالمــــلاقــــا شجيعيـــن = يوم الزمن شيب عيون البـريـه
وللضيف والرحال دايـــــم كريميــــن = من الهجير يقلطونه بفيـــــه
ورجالهم يفزع لجـــــاه البعيـــديـن = تقول فازع بالزمن مع خويـــه
ولاهو بلازم عندهم نظــــرة العيـــــن = يقضي لزومك مايبيلك جزيــــه
وأكبارهم من يوم كانـــــو صغيريـــن = فيهم نعارة قوم ماهي رديـــه
وأكبر دليل من الدلايــــل شقيقيــــن = أعيال عبدالله رجال الحميـــــه