هذه قصيدة مقدمة للأخ والصديق / عابد حمود النافعي الحربي وذلك بمناسبة حفل زواج ابنه /حمود أسأل الله أن يبارك لهم و يجمع بينهم في خير وأن يجعل حياتهم عامرة بالأفراح والمسرات

سلام ردية ومن غير تحديد
تضفي على كل الحشود الغفيرة

فالليلة اللي كنها ليلة العيد
فرحوا بها كل الاهل والعشيرة

ومنّي نيابة عن رجالٍ صناديد
كسابة الطالات في كل ديرة

يامرحبا باللي لفوا في المواعيد
ماهمهم طول الطريق وقصيره

يامرحبا مليون باسم الاجاويد
اللي لهم في صفحة المجد سيره

فعل عيال حمود كلّن به يشيد
لهم مواقف فالنوايب كثيره

اليا عطو مايدوّرون المراديد
ولا مثل جيرتهم مع الناس جيره

من ساس اهلهم مااخذو المجد تقليد
من طيب أهلهم طيبين السريره

والشيخ فالح فالصعيبات ميحيد
يقدم مايرضى بالصفوف الاخيره

وعابد عضيده يوكد العلم توكيد
وفعولهم عند النشامى شهيره

وبيوتهم لضيوف ربي مقاصيد
فاليسر والّا فالليال العسيره

تلقى بها صفر الدلال المناضيد
وحلو النبا والعود فايح عبيره

والليله اغني واردّ الاناشيد
بحمود فرحتنا تراها كبيره

واقول له مبروك مليون وازيد
في ليلةٍ مثل البدر مستنيره

الله يعطيه العيال المراشيد
ويكتب له التوفيق طول المسيره

وانا هنا شاعر وبااصحابي آشيد
لهم عليّ حقوق صحبه وجيره

يوبي ولا يلحق خويّي مناقيد
احول دونه مثل درع الجزيره

من لابة لاجل الوفاء تقطع البيد
لو كـان من دونه بحورٍ غزيره

(((عباس مرزوق الحربي)))