سلمي لي على قلبك كثير السلام=ثم قولي ترى قلبي يسلم عليه
وادري اني عقب فرقاك ماصرت انام=لين ادور علاج النوم ثم اشتريه
واعناها عيوني كل ماجاء الظلام=لاقبل الليل هلت دمعها ماتبيه
تسهر الليل كله والاوادم نيام=والسبايب قسا قلبك عليك اشتكيه
كيف يقسا بعد مالان هذا حرام=ليه يقسا على قلبي وهو مهتويه
قلبي اللي تولع فيك صابه هيام=كم حاولت انصحه وانهاه وازريت فيه
ياحبيبه ترى ماني على مايرام=حاولي في علاج الحال لاتتركيه
مايفيد القصيد ولايفيد الكلام=مير شوفي لنا حلٍ سريع ووجيه
وعذاب المولع من سهوم الغرام=لو تصدا لها لابد تقضي عليه
ماتطيب الجروح ولاتروح الالام=لين خله يداويها بلمسة يديه
مير خلي قسا وانا علي الحرام=ان قلبي عليه اشفق من امه وابيه
لي ثلاث اسنوات احس ماني تمام=والسبب من حبيبي حسبي الله عليه
ليه يقطع حبال الوصل دون اهتمام=في هوانا وانا قصدي وشعري نزيه
قفّل ابواب حبه ليه بأية نظام=يقطع الوصل مع محبوبه اللي يبيه
والله انه له بقلبي مكان ومقام=فاتحٍ باب قلبي له على مصرعيه
اقري اقري بيوت الشعر قبل الختام=واعرفي وش هو المطلوب ثم احفظيه