لاتستغل ضـــروفنا ياخلـــــــــي = وتروح تنقض عهدنا وتخونه
خل الخيانــــه يالحبيب تـــولــي = ترى الخيانه عندنا ملعونــــــه
إرجع ورى بالذاكره وأرسلــي = منها شواري حبنا المصيونـــه
يوم أننا ننقز بظهـــر الهلــــي = ونسوقها قدم الفريق بهونــــــــه
خوفٍ يفطّن صوتها المتجلــي = شخصٍ يطيّر بالغريــب عيونه
ويوم أبتعدنا قلت لي بالملــــي = (حبي بقلبك يافهد وشلــــونــــه )
قلت المحبه برجها متعلـــــــي = وبيني وبينك سيرةٍ ميمونـــــــــه
أنا الوفا ياصاحبي من دلـــــي = أقف على روس الركب من دونه
لاتحسبني بالهوى متســــلـــي = قلبي عشقك وكلمتي مضمونــه
ورديت لي في وقتها متحلــــــي = (أنا بحبك يافهد مجنـــــــونــــــه )
(أفتح نوافذ غرفتي وأطلــــــــي) = (كني بداخل غرفتي مسجونـــــــه)
(وإن لحت لي فز الخفوق ايهلي) =( ومع فزته أرسل جديد فنونــــــه)
(شوقي على بنك الغلا متولــــي )= (ولاظن شوقي يشتكي مخزونــه)
قلت أتفقنا وأقبليني كلـــــــــــي = والي يخون نمسكّه حنحونـــــــه
واليوم أشوفك يالغضي متغلــي= تمشي و بعض عهودنا مركونــــه
وأخاف بكره تنقلب متخلــــــي = عن الوفا والسيــره الميمونـــــــه