السلام عليكم ورحمة الله وبركاته
من عاش بالدنيا سنينه عطنه
دروس غطى نفعها كل مضمار
دروس مدفوعه ثمن غصب عنه
ودروس مجاني بلا سابق إنذار
ومن جرب العالم خذ العلم منه
لابد ما كـون قناعـات وأفكار
ومهما خفى خافي ترى يكشفنه
مستقبل الأيام لا زاحت ستار
بعض الحقايق فالبداية مظنه
كانت تداول بيننا وجهة أنظار
والبعـض عنده للمـراجـل أعنــه
ضاريبها تنقاد له كيف ما اختار
والبعض مايلحق عطاياه منـه
ذكره سبق فعله توافيق وأقدار
والبعض لو جيوش بقعاء غزنه
ما ينحني ياكود للنافـع الضـار
والبعض ريف اللي ظروفه حدنه
مدهالـه مشـرع لضيفـه وللجـار
والبعـض يفـزع للمدنـدن بدنـه
ماله من أمره شي فصغار وكبار
والبعض منهم بين بدعـه وسنـة
مابين حق وزيف يقضون الأعمار
والبعض يرفع سقف الأحلام كنه
نسبة ضمان وصولها تسعة أعشار
والبعـض هقـوات هقـا ورطنـه
أبعـد مداها وأنقطع دونها وخار
والبعض لا واجهك يدغم بغنة
ويملك لسان فالقفا حد منشار
والبعـض لو بيديـه نار وجنـة
الثلـث فالجنـة وثلثيـن فالنـار