خيرالأدب قول الكلام بركازه=وعقب الخطاء ياقل نفع المعاذير
والحق واضح للفتى كان رازه=يسير به والناس حصن مناكير
اخلاف ذا سار القلم في مزازه=حبراَيصورناتج القاف تصوير
حطه على جيباَ جديداَ طرازه=فيه الدبل مركوز في جانب القير
يشبه بروج الصبح مقدم قزازه=واللي خلافه يكشفه بالمناظير
سلك اللويلس ثابتاَ في جهازه=وبالطقس تعطيك المحطه مناشير
موزناَعن رجفته واهتزازه=وروس المواشي برشمت بالمسامير
ان شغله راع الولع ثم هازه=يخلف هوى مثلوث عوج المناقير
سيم السليتر داس فوق البنازه=وضغط البساتم زاد مع صرخة السير
ضرب الحصى بمحركه يوم لا زه=صفقات بزرا مرسلاَ من شراشير
حوالب البنزين مثل البزازه=وعين الطرنبه تدفعه بالمواسير
قدح العوادم مع خطاة الجرازه=برقاَ لمع بالساريات الحوادير
ماينتظر راعيه كتب الأ جازه=ممشاه حروضارياَبالمشاوير
خذا الحوايج من بقالة طبازه=من خوف لا يحصل من الوقت تأخير
هو الدليل وسايقه بالمفازه=لو العواصف تتبعها معاصير
ممشاك خطاَ من جنوبي عنازه=وساحة طبرجل مبتدأ وجهة السير
ورمال عالج والنفود الغرازه=على اليسار وغرب قور المظاهير
وسمر الجبال الراكزه في حجازه=يمين ويسارك طعوس مزابير
تمر داراَ عاش فيها الجنازه=ببلاد شمر مكرمين الخطاطير
اذا استوى خطه مع القار وازه=وتنصى القصيم أكفيت شر العواثير
وان شفت قصر الرس بين اشرازه=وأنوارها مثل النجوم المشاهير
ملفاك بيتاَ في محيط العزازه=مسوراَ في راية الطيب تسوير
راعيه فيه عن الرذايل نزازه=ونال الشرف في عسرها والتياسير
هواش حاز المدح والمدح حازه=وعلى المراجل دربوه المناعير
صديقنا في ساس حرب ارتكازه=بين القبايل من طوال الأشابير
عريب بالعرق العريق اعتزازه=يسقيه كهلا ن العرب من شفا البير
اسم الكرام مدونأفي جوازه=من شاف رمزه يفهمه دون تفسير
زودأ على المعروف زاد امتيازه=في قاف يعرف به كثير الجماهير
يخاف شره من بنفسه حزازه=أيضا ويشهد له كبار الشواعير
الطيب ماياتي بسيد وفرازه=منحه من المولى بحسن التدابير
قله جواباَ مختصر في انجازه=وارفع بصوتك يسمعون المسايير
ياخزام خشم المعتدي يانحازه=قصد الزياره لك محبه وتقدير
لولا سلا مك مالفينا بعازه=زاد الريال ونوط حمر الدنانير
أخير لحظات الزمان انتهازه=وناتيك قبل المقبلا ت المدابير
من طيبكم والطيب صعبا مرازه=ونشكر جنابك كل مارفرف الطير
يوم ان غيرك مقفلا تاَار زازه=مدحتنا والناس صفاَ طوابير
ومن حط بك معروف بالمثل جازه=يالأ خ تذكرك الشرارات بالخير
وصلاة ربي كثر رمل المحازه=على نبياَ نور الحق تنوير