مااجرح شعور النّاس مااتحاقر النّاس=طبيعيتي من يوم ربّي خلقني
حسّاس واتعامل مع النّاس باحساس=والله من امراض التغطرس عتقني
امشـي مع الطّيب ولا اخاوي انجاس=والصّدق من عمر الطّفوله عشقني
واوزع البسمه وانا اواجه الباس=اكتم همومي لو زماني خنقني
مااشكي على مخلوق لو عشت بافلاس=اشكي على اللي بالتّوكل رزقني
والجاهل اللي دقّ للشّر مرواس=عنه آتغاضا لو بشرّه لحقني
ابحث عن اللي فيه مفخر ونوماس=وحبل المراجل بالوراثه وثقني
ولا اقبل عليّ الليل في ظلم ودماس=والوقت في نار المئاسي حرقني
اللقا سلايه بين حبرٍ وقرطاس=لاقمت اعبر عن عذابٍ عمقني
اسري بهوجاسٍ واعوّد بهوجاس=وعن واقعي شعري حشا ماسرقني
ولا اسب في شعري ولا اعادي النّاس=وهذا الفضل والمنّ للي خلقني