ياللي تخاطبني بزين اللحوني = لاشفت خطي قلت تسلم اياديك
كلامك المعسول حرك شجوني = واصبحت انا بالحيل متولع فيك
قلبي تولع بك لحد الجنوني = والعقل تايه في بحورك واراضيك
والنوم يالمحبوب حارب عيوني = والقلب هايم في خيالك وطاريك
ياطير ياللي في علو الغصوني = الخط شفته بس انا وين الاقيك
ابغى جوابك والعرب يسمعوني = عطني دليل امشي مع الدرب واجيك
ابا اشري اللي بالغلا بشتروني = اللي ليا شاف الغلا منك بغليك
بالهاتف المحمول هم كلموني= قالوا سلام وقلت ربي يحييك
رد السلام وبعدها ودعوني = ماقال انا بايع ولا قال شاريك
واصبحت انا حاير واقسم ظنوني = بين الصحيح وبين نفي(ن) وتشكيك
واقول للي بالهوى ولعوني = احذر تكلمني ولا عاد نوحيك
نفسي ما انزلها الوطا والطموني = ما احطها فالبهذلة والشرابيك
انا ما احب اهل الفسق والمجوني = حبي لمن هو بالشريعة يجاريك
اليا اتفقنا والعرب يشهدوني = انت تناديني وانا دوم اناديك
ماتطلبه لو كان غالي يهوني = اطلب وانا ياساكن القلب باعطيك
وان كان فنك مايوافق فنوني = انسى وانا شفني من اليوم ناسيك