سلام مع باقه بها الورد فوّاح = ممزوجة(ن) بالود مع كل تقدير
للشاعر اللي للجزيلات لمّاح = نظم القوافي هو لها دايم ايدير
وازيّنه بعد التحيّات بوشاح = من نور شعشاع القمر زاد تنوير
وبرسل له ابيات(ن) بها الراس قدّاح = ابيات شعر(ن) تنشد اليوم تفسير
يا بو طلال الفكر بالحال سوّاح = حال البشر من حولنا شايفه غير
البارحه في غيهب الوضع سبّاح = واليوم في دربي علامات تحذير
حال(ن) غدا مابين الاجناس ياصاح = فيه الخطر مكتوب في وسط تقرير
شي(ن) يخلّي صاحب العقل شوّاح =هي فتنة(ن) ولآّ حساب(ن) وتطوير
ثورات قامت بين صايح وذبّاح = في ديرة الاعراب فواحة الكير
وكم راس بعد العز ياصاحبي طاح = وامسى سجين(ن) بعد صفوه بتعكير
وفي ليبيا بالحرب كم راحت ارواح = وفيها النساء صاروا ارامل بتهجير
وقذّافها جرذ(ن) توطّاه تمساح =جاثم على خشمه بالاقدام تعفير
عساه في نار(ن) تلظّى وتلفاح=ويحاسبانه منكر اليوم ونكير
و في سوريا دم البشر بالثرى ساح=واخبارهم مابين قتل(ن) وتدمير
وناس(ن) على السنّه تحت بطش سفّاح =واطفال مثل الزهر تقطف بتنحير
نبكي عليهم بعد ما تنزف جراح = شعب(ن) فنى من دون مانشوف تغيير
عامين تمضي والمشابيح تجتاح =ارض وعباد وشمخ(ن) راسها يطير
وارض المجوس تمد طاغوتها سلاح =والفيتو من دار الحمر صوته ايغير
وقلوبهم بالغلّ تخطيطها فاح = رسم الخميني للمجاوير تصدير
وبعون ربي الفرج بيرقه لاح=في جيش حر واثق الخطوه ايسير
ويقطع لنا راس المجوسي وينزاح=وتخسى شياطين(ن) زبنها بتنصير
وفي تونس الخضراء تهاويل ونياح =خلّوا حراميهم بالاموال ايطير
حال(ن) غشاها من العسم يلزم ايضاح=ومن شرقها للغرب تحتاج تطهير
وارض العراق اليوم بالظلم تجتاح = طوايف وفتنه صحت بعد تخدير
والموت فيها بالهويه والاضراح = وحضارة(ن) ضاعت بليات تعمير
وارض الكنانه مابها الناس ترتاح = متجمهرين بوسط ميدان تحرير
ضاعت مباديهم ورآ كل شبّاح = ثورة جياع ولاجنوا خبز وشعير
حتى اليمن صارت تدوّر للاصلاح = متسلحين بجوع من دون تبصير
تقاتلوا كلن يدوّر للارباح=وضاع الامن فيها وتحتاج تجبير
واهل الكفر اعلامهم بالردى فاح = يستهزءون بديننا بدون تفكير
والقلب من غبنه صرخ دون صيّاح = حزب له ينّدد وحزب(ن) بتكسير
ونبينا محشوم من رسم فضّاح =ومن كل فاسق تابع لكل شرّير
ويحميه رب الكون من كل نبّاح= ومنهو تطاول عالنبي يموت فسعير
واستغفر الله كان بالوقت افساح = يغفر لنا زلاتنا وكل تقصير
ويالله يارب(ن) خلق حزن وافراح = يامنزل القرآن للخلق تبصير
تخزي نفوس(ن) شرها صار نزّاح = وتكوي بنارك كل ظالم بتحقير
وتحفظ لنا دار(ن) بها العز جمّاح=دار السعودي ولانبي غيرها دير
ومن حبّها نخفض لها الكف بجناح=نرخص لها الغالي وفدوه لها يسير
هي ديرتي ولو صار بالوقت مرواح =على الشريعه ماتزحزح ولآ تدير
شعب(ن) توالف مع ولاته وبسماح=فيه الوفاء من عالي الرجم للبير
وصلاة ربي عد نجم(ن) لنا لاح = على الرسول بأجمل الوصف تعبير