مرحبا بالزائر اللي بالمحبـة نحتفـي بـه=من قلوب مخلصه حب وولا لاشـي ثانـي
ضيفنا الغالـي معزبنـا بالايـام العصيبـة=درعنا لاثـاروا الفتنـة مقاريـد الزمانـي
مرحبا مليون فـي مليـون مافيهـا غليبـه=الغليبه لو يشح الشعـر بجـزال المعانـي
والله ان جيتك مثل الغيث جعـل الله يجيبـه=ذاك غيث الارض وانته غيثنا سر وعلانـي
الليالي كل ما دارت تجلـت عـن مصيبـه=والخطر قام يتحول من مكان الـى مكانـي
والمصايب حجمها يكبـر بالايـام القريبـه=ويتغيـر مستواهـا بالدقائـق والثـوانـي
واصبحت بالثانية تطلع منه حالـة غريبـه=كلها من ناتج الاحلام فـي وقـت الامانـي
كثرت احداث الزمن والوقت ما نعلم بغيبـه=مير حنا كلنا دون الوطـن حـب وتفانـي
ان دعا الواجب ترى جندينا ينطـح كتيبـه=ديننا ثم الملك ثـم الوطـن والعمـر فانـي
تحت راية فهد ابونا قائد الشعـب وحبيبـه=يحفظه من نزل الآيـات والسبـع المثانـي
الولاية والـولا للـي حمـا مكـه وطيبـه=ما على الشعب السعودي من فلان ولا فلاني
عطر الله قبر ابوك الفارس اللي نعتزي بـه=اشهد انه شامخ الهامه ولا يرضى الطمانـي
كلنا ندعي عساها مـا تمـس النـار شيبـه=منقذ شعوب من اسباب الجهل كانت تعانـي
بعد ما كانوا فئات وكل حزب فـي شعيبـه=والتحدي بينهم دايم على كسـب الرهانـي
اصطفق فيها وشاف الظلم وامـور عجيبـه=لا يقيدهـا نظـام ولا لهـا مبـدا كيـانـي
ووفقه ربه وهذا مـن صفـا قلبـه وطيبـه=وابتدى الرحله على ظهر المطيه والحصاني
مسلم يسعى للـم الشمـل ويجمّـع ذهيبـه=مير لم الشمـل لازم بالسنـان وبالعنانـي
السلامه ما تجيبه والتفـاوض مـا يجيبـه=ما يجيبه غير شيل الروس من تحت الاذاني
والغريب ان الخطيب اللي دفع مهر الخطيبه=اتفق معها على الزفه قبـل عقـد القرانـي
هي تبيه وهو يبيها ميـر دعواهـم رهيبـه=ما على الغائب دليل ولا على الدنيا ضماني
تنتظر يوم اجتماع الشمل ويقـول ابشريبـه=الوعد من بيننا بالفطر من بعـد ارمضانـي
بس قبل العرس ساعه للفشق فيهـا حطيبـه=ينتصر فيها الشجاع وينهزم فيهـا الجبانـي
والخطيبه مملكة من مطلع النـور المغيبـه=والخطيب معزي الله يسكنه خضر الجنانـي
ونصره ربه وحصلها وصارت من نصيبـه=وادرك المقصـد ولله الثنـا والامتنـانـي
وابتدا في رحلة العمران والمصحف بجيبـه=يصنع التاريخ للاجيـال ويعمـر المبانـي
حكم القرآن وانهى كـل طـلاب وطليبـه=وارتفع فيها منار الحق مع صوت الاذانـي
والفتـن وسبابهـا سوالهـا قبـر ونصيبـه=والحضاره عمت اطراف البلد قاصي وداني
واستقرت بعد ما مرت مراحلهـا الصعيبـه=واصبحوا فيها ملايين البشر مثل الخوانـي
ثم سلمها رجـال مـا بهـم شكـه وريبـه=كلهم نقوه وطيب الاصل من طيب المجاني
ان دعاهم واجب الاسـلام وقفتهـم عريبـه=وان دعاهم واجب الجيران طلقين اليمانـي
اسسوا دوله لها بين الـدول قيمـه وهيبـه=من دخل بحدودها قالوا وصل بر الامانـي
يحفظ الله من بحزات الشدائـد نلتجـي بـه=الزعيم اللي يدير امورنا فـي كـل شانـي
ويحفظ الله ساعده ومساعـده واللـي ينيبـه=قائد القوات بر وجـو واسطـول الموانـي
بسم من شارك بحفل المنطقة واللي دعي به=كلنا يا سيـدي نهـدي عبـارات التهانـي
والسلام اختام نبدى بالسـلام وننتهـي بـه=والتحيه ريح عود وريح هيـل وزعفرانـي