الصدر ضايق والهموم اسهرنـي=واقـــول لله يـاعــرب مشتـكـايـه
ياغير اسلـي خاطـري واستكنـي=وارمي سبايب ثورتي من ورايه
أصارع افكا ري وفالراس جني=واصـبـر النـفـس الشقـيـه معـايـه
ماهو غزل وسهوم عين ذبحنـي=ولاهو فقر ضاوي وسبب عنايـه
ولاهي وشايا حسـد ثـم جرحنـي=ولاهوبعـد ربعـي تقصـر معايـه
ميقافهـم واضـح وعــزوه تهـنـي=ولاقول فيهـم نقـص كـل اقربايـه
العلـم ياصاحـب تبـا العلـم مـنـي=ودك تعـرف السالـفـه والحكـايـه
بيـع العـرب فيـه البـلا والتجـنـي=وقلب النوايا صار مقصد وغايـه
أحـدن يبيـع جنيـه بجنـيـه علـنـي=تاجر وله مكسب وفوقه وصايـه
وأحدن بكـاره جـرب مايربحنـي=يـبـي يــدور للمـكـاسـب خـفـايـه
في معطفه ثعبان ماخـاب ضنـي=وليا حسبته ضيف ويـش النهايـه
ياليت ناضر صورته وارجهنـي=ودور مـن الله مغـفـره والهـدايـه