ارسل لي احد الاصحاب بيتين وقالي انه طبخ افكاره ومشاعره ويبى مني رد على البيتين واعجبني البيتين لسلامة الفكرة وصعوبة القافية
فرديت على صاحبي وجاريت الابيات وبعد ان وصله الرد قال ترا الابيات ليست لي ولكن اعجبني واحببت امزح معك واستحثك على الرد فقلت له الرد جاك وكأنك انت القائل والشك زائل والمشاعر كريمه......



رسالة صاحبي



أتعب على الطيب ترا رفقته عز****والا الردي ما فاد نفسه يفيدك

الصاحب اللي لا لمح جيتك فز****هذا الذى لازم تعده عضيدك



ردي ومجاراتي



اطبخ مشاعركم على هادي القز****واليا انتهت طبختك عطني جديدك

واليا لفاني منك قول(ن) تجهز****ابشر برد(ن) فيه نتحف بريدك

أحرص على الطيب وعن الردي جز****حيث الردي قربه يخسر رصيدك

اعرف ترا الطيب يذخر ويكنز****والا الردي ينقصك ما هو يزيدك

احرص على اللي دايماً فيه تعتز****ذخر الزمان اللي مع الوقت عيدك

اللي على جرحك له قلب يهتز****كنه يغذى من وريده وريدك