السلام عليكم ورحمة الله وبركاته :
هذه محاوره الشاعر: راشد السحيمي وزيد العضيله اللتي اقيمت امس بمنتدى مطير ومجالس حرب ونقلتها قناة صدى عبر الشريط الخاص بجوال اماسي .
كل الشكر والتقدير لهذه الجهود الكريمة والمميزة ..ولكل من ساهم في هذا النجاح ...
وهذه الأستضافة الأستثنائية الرائعة لعملاقين من عمالقة المحاورة ..
راشد السحيمي وزيد العضيلة .
زيد العضيلة
يا مرحبا بأصحابنا الغالين فالشهر الكريم
على الشبكة العنكبوتية هلا وألف هلا
يا راشد الحربي عساك لبرد جنات النعيم
واللي سواتك يكفل أيتام العرب ما به بلا
راشد السحيمي
فيك البقاء يازيد بن سلمي ياصاحبنا القديم
ياصاحبً ما نشتكيك الا على الرب العلا
عساك بالجنة معي والله يكافيك الجحيم
ويحلي أيامك لو السكر يثوره الحلا
زيد العضيلة
إعمل ترى الحسنة بعشر أمثالها وأجرك عظيم
الخير له ناس عملا والشر له ناس عملا
العام وش سبة سفرك من المدينة للقصيم
انته مسافر من جفاء وإلا مسافر من غلا
راشد السحيمي
الله يهدينا ويهديك الصراط المستقيم
لو كل مجرم يسجنونه يمدي السجن امتلا
تنشد عن أسباب السفر .. هذا سؤالً فالصميم
سافرت اقول لجارنا المنشق ما حنا ولا
زيد العضيلة
انته لو إنك يالسحيمي مثل جيرانك مقيم
ما كان سببت القلق للخاطر اللي ما سلا
إحسب حسابك وانتبه من كل شيطانً رجيم
وإلا ترى من اليوم نعلنها ولا حنا زملا
راشد السحيمي
إن كان شفت حوار ما يرضع وناقة ما تريم
أرحل عن الجيران وأعلنها على كل الملا
وإن كان تبغاها فراق بدون سين بدون جيم
إن قلت الأول قول الأول بس والثاني ولا
زيد العضيلة
قدام خمس سنين عينك كنها عين اليتيم
واليوم عينك من ضحاياها ثلاثين قتلا
أبغيك يالقاضي تعين وصرت يالقاضي خصيم
ليتك تطبق ما قريته فالكتاب المنزلا
راشد السحيمي
خمسين عام أنا الزعيم ولا يزال أنا الزعيم
مؤمن بحكم الله تعالى وأنت مؤمن مبتلى
أرجوك ياشاعر مطير أبعد ترى بالجو غيم
واللي يضيق من الخلا يرضى عليك من الخلا0