ياهل البـل يارجاجيـل الشدايـد=يارجاجيـل الشدايـد والشكالـه
ذكركم بالطيب هو ساس الفوايـد=والرجل كلمة نعم هي راس مالـه
إن كان فيكم عيب هو حب المزايد=بكل شيءٍ فيه نومـاس وجمالـه
سجلو مني بكم جـزل القصايـد=حسب عرفي والهدف لوح مجاله
مدللين البل على الحـد المحايـد=بظل حكم اهل المكـارم والعدالـه
قالو العقـال درب الطيـب كايـد=مايتهيـا لكـل واحـد بالسهالـه
يشتهربه من على الصعبات قايـد=والشدايد هي موازيـن الرجالـه
الرجال عزوم وسلـوم وعوايـد=وكل شخص بمنهجه يرتاح بالـه
وبالتعب مجد الرجال اهل الفرايد=ومن شبع بالنوم ماسنـع حلالـه
والبل البل للعرب عـز ومجايـد=البـل ايـةٍ قالهـا جـل حلالـه
حبها عند العرب ماهـو عقايـد=مجدهـم فيهـا بحلـه وترحالـه
هي وسيلة نقلهـم يـوم المدايـد=وهي مصادر رزقهم في كل حالـه
دورها في مجـد العُـرب رايـد=ودورها الحاضر لها حب وقبالـه
بكل زينة وصف جرسان وقلايـد=عند راعيها مثل غالـي عيالـه
وإن نظرها خلف قعدتها سرايـد=كن له بالعاصمـة بنـك ووكالـه
بلحظـةٍ ماكـن هالكـون بـايـد=واقعه غطى مع المنظـر خيالـه
ياهل البل دام للماضـي شرايـد=جيلنا الحاضرلكـم هـذا سوالـه
ليش ماينشر بصفحات الجرايـد=كل شيء لـه علاقـة بالاصالـه
الهدف ماهـم مكبـرة الوسايـد=الرساله واضحة لاهـل الرسالـه