حبيبي لو نويـت تغيـب ليلـه=ترى يا للأسف مالـك وسيلـه
فراقي صعب جـدا يـا حبيبـي=ومن يقوى على هجر الأصيله ؟
تغيب شهـور وايـاام وليالـي=وبن الشـوق مخلـوط ٍ بهيلـه
وحالك ضايق ٍ والخافي أعظـم=وحملك ما قـدر متنـك يشيلـه
علامات الأسى من فوق خـدك=كأنك شايـب ٍ مـا فيـه حيلـه
قسـم بالله مـا تقـدر فراقـي=ولا تلقـى أبـد مثلـي حليلـه
أبادلك الغـرام بقلـب صـادق=وتكحّلك العيـون اللـي كحيلـه
ويحرسك الهدب من كل عـاذل=ولو ماله ترى غيـر الفشيلـه
واذا ضاقت عليك الأرض دايـم=ترى قلبي هو اللـي تشتكيلـه
اغطيـك بحنـان الكـون كلـه=إلين الهـم مـن قلبـك أزيلـه
وعنوان القصايد فيـك وحـدك=ولو عارض على قولـي قبيلـه
أحطك في صدر بيتي وعجـزه=واصخر لك بيـوت ٍ مستحيلـه
وأحطك فـي كتاباتـي ونثـري=واحطك فـي مقـالات ٍ جميلـه
واحطك وين مدري وين احطك=بوسط القلـب ؟ لا والله قليلـه
لاني من كثـر شوقـي وحبـي=فمهما قلت احس انـي بخيلـه
فلا تنوي تغيـب اليـوم عنـي=لانك للإسـف مالـك وسيلـه

على لحن الوجود اللي يبي لـه=حضور ومفـرداتٍ مستحيلـه
سـلام يوقّـره كـل عـاقـل=مجال الشك لايمكن يجـي لـه
على مهر الحصان اللي مؤصل=أبـوه وشدّنـي يمّـه صهيلـه
لأنك في عيونـي مثـل إختـي=وجسّـاس يتفاخـر بالجليلـه
يقـدّم لأجلهـا مالـه وحالـه=إذا حمْي الوطيس وشْـد حيلـه
عسى الله يحرسك من كل حاسد=ويبعد عنْك أصحـاب الرذيلـه
ويحفظْ لـك حبيـبٍ تعشقينـه=لأن الفانيـه جــدْاً ضئيـلـه
وإذا ناور وشاور فيـك نفسـه=على أنه بس يلقى لـك بديلـه
ورب البيت مايفقـه ولا هـو=من اللي يستحقـون الأصيلـه
أنـا والله مـا أعرفـك ولكـن=ردودك تنسبك لأهل الفضيلـه
فراسه والفراسـه فـيْ فطـره=على نهج الرجال أهل الجميلـه
ولا أرجي منك لو حتى ثنائـك=لأن القلب يخشى مـن نزيلـه
ماهوب خوف لكن عهد قاطـع=على نفسي خذيته فـي سبيلـه
لأن الحب لو له وصف ممكـن=أنا أشهد إنها هـي سلسبيلـه
أنا آسف على مجارات شعـرك=لو إني قلت لك مافيـك حيلـه