السلام عليكم ورحمة الله وبركاته
اليكم هذه القصيدة التى تشرفت بألقائها في حفل قبيلة حرب لدعم الشاعر الكبير علي بن عبيد الحصني بالرس 26/2/1436هـ واتمنى لبو فارس التوفيق واشكر قبيلة حرب على الاستقبال والحفاوه والترحيب . والطيب ما يستغرب من هل الطيب
الهجوس اللي تزاحم به فرائد =وده يترجم معانيها قصيدة
ياهجوسي وانت لك فيني عوايد=ترسم الإبداع في جملة مفيده
ماطلبتك غير في وقت الشدايد=في مثل هاالوقت والهقوه بعيده
موقفي حساس والميقاف كايد=والمقام اكبر من بيوت القصيده
ياسلام الله لكم يا اهل العوايد=ياالرجال اللي مساعيكم حميده
حرب لا عدو وسيعين البنايد=نعرف ان حرب الدول نار وقيده
الشجاعة والكرم والعز زايد=طاعة الرحمن ومحمد أكيده
والسلوم الوافيه واصل الحمايد=والوفاء والطيب والارياء السديده
غيض من فيض وانا شاعر محايد=مجدكم هايل وهيبتكم شديده
جيت متعني وازف أحلى القصائد=في مقام يجعل الأنفس سعيده
ماخسر من حطكم ضل وسنايد=حفلكم طيب ووقفتكم فريده
ياعلي ياصاحبي ارقى سنايد=دامك معنز على حرب الرشيده
عزوة تاريخها ما هوب بايد=شامخ مثل الرواسي فوق بيده
وانت سيف في الرخى والا النكايد=ماندم من حطك حزام وعضيده
لك سنين اطوال في الميدان رايد=دون لابتك القريبه والبعيده
باذل ٍ جهدك وللطاروق قايد=تحكم المعنى وف الموقف وليده
أشهد انك جامع خمس الفوائد=الوفاء والطيب والسيرة مجيده
والجناب الزين كل ٍ فيك شايد=والكرم عاده ولا تمد الزهيده
اخوكم / مطلق بن عبيدان السبيعي