اناعلى كثر مااشوف البنـى ماهزنـي ميـل= لوزانت أوصافهـا والبسوهـا دايـم مجـدة
ما غير بنت مولعنتـى هواهـا زود بالحيـل= في كل يـوم يتزايـد حبهـا شـوق ومـودة
ماالد في ام الجدايل والعيون اللـي مكاحيـل= كـل النظـر يمهـا والـد لـده بعـد لــده
بنت لك الله معي طول الدهر ماطالها الطيـل= حتى بعد شاب راسي هي شبـاب ومستجـدة
وان جيت في مجلس تبقا معي وسط الرجاجيل= دايم معي ماتفارقنـي رخـا وإلا فـي شـدة
ام الجمايل يشرف نقلهـا فالصبـح والليـل= وان نمت حطيتها مابيـن راسـي والمخـدة
مكانها مجلسي لاجا اللـزوم اشيلهـا شيـل= وتقول خذني معك مالي عن الماجوب صـدة
لاجات ميلة من العقـال والا مـن جهاهيـل= اللي نقـل مثلهـا فايـز ولا ينبـاح سـد ه
هي عزوة اللي تعزوى في نهار العدل والميل= ترزم رزيم الرعد وقـت الشدايـد مستعـدة
ماتشكي الجور صبارة ولو زو د لهـا الكيـل= أرسل ولدها على قلب الهدف وان جات ضدة
واليا طرى القنص والمقناص رحنا بالتساهيل= أخذتهـا محتسـي ماتطلبـه حسيـة وعـدة
ركبت جيب مضـرى للمسـاري والتهاويـل= ماينهزع يوم سواقه علـى العسـرة يحـده
اروح يم القرى ثـم اخـذ الديـرة بتفصيـل= امشي مع الحرة اللي مابهـا درب و مجـدة
الصيد يبغى ولد نشمي على الشدات حلحيـل= ضاري لقطع الفيافي لانـوى مااحـد يصـده
وليا لقيت السمين اللي لها الحـرة مداهيـل= ارمـي علـو الكحـال ورميهـا كـل يعـده
واخذت مايقسمه ربي وما جا من محا صيـل= وان قام حظك خدمك وجاك كل اللـي تـوده
رجعت عند المهيـد وثـم دنيـت المعاميـل= شبيت ناري ومن جا للشبـب مااحـد يـرده
وسوي القهوة اللي مكرمـة بالبـن والهيـل= والطرقي اللي يبي من صيدنا قسمـه نمـده
نجلس نسولف تحت ضو القمر نضرب تماثيل= ماهي سوالف جهاز ماعرف مزحـه وجـده
خوياني بريـك وابراهيـم ومحمـد مشاكيـل= الكل منهم مـدرّك فعـل ابـوه وفعـل جـده
يعجبك سبع الخلا لاراح يقنص يذبح الحيـل= ماهو كما اللي ليا راح الخلا دمعه فـي خـده
الناس تبغى السفر وتروح يم الهنـد والنيـل= وانا تمشايتـي فالبـر ماهـو سـوق جـدة
عسى يجيها هليل الغيث ثـم يعلهـا السيـل= ويزين مرباعهـا والخيـر ماينقـاس حده
واللي يحب البداوة ماعليـه مـن الغرابيـل= يالو بنى قصر فالحـارة مـن البكـرة يهـده
ولي طلبة منك ياربي وانا باختم بهـا القيـل= الخير جيبه لنـا والشـر نطلـب منـك رده