الشاعر فهد مطلق السليمي
بالله ي لحن القصيد الي يسريني وراه
أبسط جناحك للهجوس الساريه وأشتالها
الي تصافقني من البارح على كل اتجاه
مثل الهبوب الي تصفق بالمقيض اخيالها
*أحيان تنحاني على شين من ضروف الحياة
و أحيان تصرفني عن ضروف الحياة أمالها
و بالحالتين الأدمي مخلوق و الدنيا شقاه
و الحاجة الي في ضميره لو نحت يسعالها
أما ظفر فيها مثل ما تظفر جموع الغزاه
و الا كسره الوقت و الدنيا عطته احثالها
بالهيه الي عقبها اما فقر و الا غناه
و الا قناعة تقنع نفوس العرب من حالها
أحدن عطاه الله و لا عده من الدنيا عطاه
لو هو غني له حالتن بين العرب يرثالها
وأحدن فقير و يحتمي ماجوب ربعه واصدقاه
كنه يضارب مع هوامير البلد بأموالها
ولا يندم الوافي على درب الوفاء لامن مشاه
ترى ما يبقى للبشر غير الوفاء بأعمالها
كم واحدن مبطي وهو تحت النصايب في ثراه
ما زال تنقل سيرته للناس عبر أجيالها
يارب قدرني على علمن يجملني صداه
عند الكرام أهل الوفاء الي طوال احبالها
لو العرب بالوقت هذا عندها قل أنتباه
أكبر هموم الناس تصدير الثناء لأفضالها
اول يخفي راعي المعروف معروفن بداه
و هالحين لا بالله يبا الحسنه بعشر أمثالها
هذا هو التيار والي يعكسه ياخذ جزاه
قسيمتن من دون لا يشعر بها كد نالها
مفهوم و المفهوم ما تفرز صوابه من خطاه
الا تجاريب الليالي و السنين و فالها
لكن انا لي صاحبن وافي و لا يلحق وفاه
يا جعل تفداه الخبول الي يغث اخبالها
مواقفه بيضاء بياض الثلج ما فيها اشتباه
*كم واحدن وده يحصلها و لا هو طالها
ضلعن ماغير*صافق الغربي ولاالشرقي حصاه
درع القبيلة عزها حرن يشيل اثقالها
هذاك ابو تركي سعد والله ما نلحق ثناه*
الي سواته تنحذف له غترتي و اعقالها
حقه مثل شمس الضحا على المطانيخ الدهاه
ان قصرت بعض اليماني لا تمد جزالها
و الا الكرام كرام مثل البحر ما يلحق مداه
والله خلق خلقه و ميز بالحياة أخصالها
و الناس قالو يرفع الرجال للعليا نقاه
والا القبيلة ترفع أسهمها فعول ارجالها
رد الشاعر
سعد المحمدي
بديت بسم اللي اليا ضاقت على عبده دعاه
والناس يعلم جل شانه مايدور ابالها
سامع دبيب النمله السودا على حيد الصفاه
والارض ماهدها ورساها بشم اجبالها
من بعد ذكره حي ابو مطلق وحي الله نباه
عدالحجيج اللي لبيت الله تشد ارحالها
شاعر وشعره يطرب السامع وعالى مستواه
يختار جزلات المعاني مايجيب اهزالها
فصيح ماينشب لسانه لاتكلم في جماه
الطيبه من طيب راسه لاعتلت يرقالها
لاهل الوفا والطيب لابار الزمن سترة نجاه
الله يجيره من صدوف ايامنا واهوالها
يادرع جنبي لارفع خصمي على راسي عصاه
في يوم يعرف فيه خواف العرب وابطالها
مدحتني وكثرت في مدحي وزعلت الوشاه
سود القلوب اللي على الهزله تهز اذيالها
ياكم واحد وده ايحرك على حبي رحاه
لو مايخاف الحربه اللي صعب يلقى ادوالها
ماكل راعي يافهد بندق يعد من الرماه
ياكم بندق خانها عند الطلب نقالها
من شاطي الدمام لين اتعد بجبال السراه
الناس حسب افعولها ماهي بكبر ازوالها
عيني على الصفوه مافكر بالهلايم والرعاه
شوحي سما ونزل اهل الطيب في منزالها
اليا فعلت الطيب المعروف مادور جزاه
ومقطع عروق الشجره اللي عشت تحت اضلالها
عقب صبين بالسعه يضرس وتطلع له لهاه
ويدس راسه في نهار الجد وسط ارمالها
ليت الردي لاهل الوجيه البيض بالدنيا زكاه
اقولها والغير من قبلي وبعدي قالها
خذ علم مثل النقش يابن العم في جنب الحصاه
الحمل عن حشون هزيله في ظهور اجمالها
رد الجمايل لهلها واجب مثل فرض الصلاه
يارب جملني وحرب الله يجمل حالها
كلام شاعر يافهد مايجهل البير وغطاه
ويعامل اهل السوق حسب اجنيهها وربالها