سلام تسليم الرضى من هاجس بالطيب جاشي=من لابة تاريخها معروف مايقبل نقاشي
تنصى عوانينا على سبل الوفا والمد كاشي=مد الصداقه ما يقدر بالذهب ياهل النجيبه
والثانيه ويش فكركم في سوق ماهو تو ناشي=ياكم ربح فيه الذي فالفقر طول العمر عاشي
فيه الربا حلال تحليل القراح من الرشاشي=هذا عجب والسوق مابه شك ولاب السوق ريبه
والثاله الدنيا حقيره مثل جنحان الفراشي=والجار ننظرله بعين صافيه والقلب شاشي
ساس الصداقه بيننا ثابت ولا نبني الهشاشي=وحنا لفينا ياعوانينا على وزعه وطيبه

يامرحبا ترحيبة الصدقان مافيها غشاشي =ياهل الوفا ياللي منازلكم رفيعه ماتناشي
ترحيب نو دن رعده واستهل من المناشي =نقولها ونطولها وقت الحضور و فالمغيبه
والثانية ياللي تقول السوق هذا السوق ماشي=سوق مع على الله ماتسلم عملته مرشي وراشي
ماهو بسوق البورصه فيها القيادي والخشاشي =فيها الريال يجيب سبع اميه وغيره مايجيبه
الثالته دنيا البشر فيها لهم زاد ومعاشي=مدبره رب الملا والطيبه ما هي بلاشي
نبني بيوت العز فوق الصخر ما نبني العشاشي=وانتم لفيتوا والعلوم الطيبه ماهي غريبه