يا عل عينٍ ما بكت فرقا الاضعـان=تعطي النويفـج ليـن تذبـل ذبليـا
ليا شدوا العربان من عقب مقطـان=والصبح منهـم جانـب العـد خليـا
وتفرقوا مـن نقـرة العـد سلفـان=أحدٍ رحـل جنـوب و احـدٍ شمليـا
وقفوا وراحوا مع وسيعات الاوطـان=وكلٍ على سفن الصحـاري رحليـا
عليهم الخافـق تقـل فيـه نيـران=وتصلاه غمزات الهواجيـس صليـا
وبكت عيوني مثل همـال الامـزان=مـزنٍٍ تحـدر مـن مناشيـه مليـا
على اللذي له داخل القلب مسكـان=وعليه ما اسمع عاذلي لـو عذليـا
عين الفريد اللـي مرابيـه فيحـان=الريـح لاعـه و استـذار و جفليـا
وسمع الحساس وشاف بالعين زيلان=واستاكده بيـن الوعـر والسهليـا
الصاحب اللي منه القلـب عطشـان=و لاتنجلي حبه عـن القلـب جليـا
اقفوا به البـدوان و القلـب حيـران=وسـود الليالـي ماعطتنـي مهليـا
شدوا وانا من شدة البـدو زعـلان=ولا من وساطه بين اهلهـا واهليـا
وجيته وانا في وقتها كنت مرضـان=مـن شـدة العربـان فيّـه زعليـا
قلت السلام وغـادي الفكـر شتـان=واللي بغيت بخاطـري مـا حصليـا
وانا عليه بسلـم الاحبـاب شفقـان=ومن غير مشروهي فلالـي دخليـا
طافت مشاريهي وانا كنت شرهـان=سنـه صغيـر وغاطـسٍ بالجهليـا
وقلت الوداع وغاديٍ وجهـه ألـوان=متخالـطٍ فيـه الخجـل والزعلـيـا
وذقت الفراق اللي مشاريبه احـزان=وانحـل بحالـي والمحانـي هزليـا
كني كسيـرٍ شملـه ريـح ريحـان=نوبٍ يفيـق و نـوب يذهـل ذهليـا
عليك يالمجمول يا خـدر الاعيـان=سميت حالي ليـن جسمـي نحليـا
والحب مثل النوم والنـوم سلطـان=والله بلانـي فـي محبتـك بلـيـا
وجاني الربيع وربعت كـل الاوطـان=وانـا معاليـك الضمايـر محلـيـا
وطال الرجا واللي مضى تقل ما كان=واللـي بنينـا لغدّنـا مـا كملـيـا
لاشك خبرني عسى ما أنت خسـران=او شايـف اللـي بالطويلـه تعليـا
وأن كان حـدوك المقـرد وعـدوان=ماني لا ابـا زيـدٍ ولا انتـي بعليـا