عديت وقت الضحى في راس مزمومه = فيها الذعاذيع تقبل بي وتقفي بي
وبانت لي البينه والنفس مزحومه = وهبت هبوبي وسجلت المكاتيبي
وهاضت هجوس الحشا اللي فيه مكتومه = وشفنا هدفنا وسددنا المضاريبي
وعاداتنا ندفن الرقبه على الثومه = وناخذ ونعطي ولا نطيع الزواريبي
وهذي وهايب من الإله مقسومه = لنا و علينا تجي بحضوض وتغيبي
ويا موتري شد عزمك وأصبر اليومه = نبي عليك نتلمس للمعازيبي
ليا صار رجلي على المشوار ملزومه = أبيك يا موتري للشيخ تمشي بي
الشلمخ اللي قباله يبري السومه = اللي جوابه أليا جينا تعاجيبي
نفسه عن الهرج والهراج معصومه = ما هو من اللي بهم شذب وشواذيبي
يستاهل اللي يسوي فيه منظومه = قولوا وأنا أقول يا حضوف اللواعيبي
كلٍ يعبر حسب عرفه ومفهومه = والمدح يستاهله من فاز بالطيبي
اللي مثل حجر بن ناحل على علومه = اللي تسر العرب يم الأجانيبي
شيخٍ يحوز المراجل حوز بعزومه = حوزة ركايب قناطيشٍ جلاليبي
عطاهن اللي حداه الوقت وسلومه = وحدوه ربعه على شين المشاريبي
الحربه اللي براس الضد مسمومه = أعني بها عقاب ما عنها تجانيبي
أبن ربيعان يوم أنه ترك قومه = عنز على أبوك يا حصان الأطاليبي
عنز على واحدٍ ما بار بقدومه = حياه وأغناه من بين الأصاحيبي
هذي علومٍ بلوح المجد مرسومه = ما هي علومٍ تولفها الكذاذيبي
يشهد بها الحاكم اللي غابت نجومه = تعطون وتحذون لو ما أنتم كساسيبي
ما شاله طيب العرفان بكمومه = شهر ثناكم على روس المراقيبي
الشامه اللي بكم ماهي بماشومه = عذروبكم يوم يطرون العذاريبي
ليا حربتم حريبٍ فز من نومه = واليا عطيتم عطيتم شمخ النيبي
واليا حضرتم مجالس شر وخصومه = أنتم من اللي يفكون النشاشيبي
أنته تفك السجين اللي بمحكومه = يا مزبن اللي رماه الوقت بالسيبي
تفك من فكه الله وأنت زيزومه = تفزع بجاهك على الأجواد ويصيبي
جاهن عطاه الولي تقدير وحشومه = نوح بوجهك على اللي داخله ريبي
مثل الرشيدي زواه الشر بهدومه = وأذعن لجاهك عقب ما جاه تأديبي
نصرٍ من الله معك يا طيب الهومه = تفعل وفعلك على برهان ومصيبي
قدرك وجاهك يصيب الماس بسهومه = راعي عوايد وماضٍ لك تجاريبي