يا أبو علي لولا الولي ثم لولاكـ = رحنا زبد سيلٍ تحدر مسيله
صكوا علينا كل منفذ وشباكـ = وتسكر الموضوع بأسهل وسيله
مار أنت هذي ميزةٍ من مزاياكـ = رفع الضرر والظلم عنا تزيله
تاقف بصف اللي إليا جاك ينخاكـ = يا فزعة الخايف إليا باد حيله
الله يمهل لك ليالي ويجزاكـ = بالخير يا راع الفعول الجميله
يا كاملٍ بأمور دينك ودنياكـ = أنا اشهد إن أوصاف مثلك قليله
ما ظنتي والله تسوى سواياكـ = خصٍ بحل القاله المستحيله
ولا أقول ما به واحدٍ مثل شرواكـ = الناس كلٍ قي هواه وسبيله
ما أنت تفرق عن هذولي وذولاكـ = وعندي سلوككـ كل أبوها جليله
أنته مثل هداج وصفك ورؤياكـ = كلٍ يدله ما يبي له دليله
هداج تيماء اللي على دور الأتراكـ = تفوح أنا بيعه ويزداد سيله
ما أنته برسٍ كل من جاك خلاكـ = رسٍ وروده ضاريه بتعليله
الرس يمه لا تعدي ضماياكـ = وش عاد لو كبرت عليه النثيله
مالك ومال اللي ليا جيته أضماكـ = الرس لو ينضح قليلٍ حصيله
عليك بالمنهل إليا عمسن أرياكـ = إنص العدود وخل عنك الثميله
مثلك يأبن عساف والا حلاياكـ = اللي لهم بالمجد باعٍ طويله
يا كامل الأوصاف لعل يفداكـ = خطو البليد اللي حصاته ثقيله
بالفعل ما ينفع وبالهرج نماكـ = هميصعيٍ بس يومي شليله
لو هو ولد شيخٍ مفوه وفكاكـ = إليا صار ما ينفع عسى الله يشيله
وإلا أنت حصلت المراجل بيمناكـ = أخذتها من راس راع الطويله
أبوك يوم أنه على الطيب وصاكـ = صنت الوصاة وزدت بالصاع كيله
ما خاب يوم أنه غذاك وترجاكـ = وخلاك يا سليمان عقبه وكيله
تنعم ببيت العز والعز يزهاكـ = بيت الشيوخ اللي يزبن دخيله
بيتك مشيد والرجاجيل تنصاكـ = دايم وعصمان الشوارب تجي له
ولولا فعولك كان كلٍ تعداكـ = مار العرب يتلون ضو الفتيله
وأنا افتخر باسمك وذكرك وطرياكـ = يوم أنت من ربعي خذيت الكحيله
أخذت بنت اللي لهم فعل فتاكـ = قبيلةٍ يا ويها من قبيلة
حربٍ هل التوحيد ما هو بيخفاكـ = سم على كبد العدو حنظليله
ربعي اللي إليا دارت دواليب الأفلاكـ = يشدون موجات البحر وسط ليله
وأن صار للخوة مساليك وأسلاكـ = إنشد نويشي يوم قصة زميله
والناس كلٍ دون حقه إليا صاكـ = مثل ما قالوا كل جيلٍ وجيله
من قال أنا كيد الرجاجيل كلاكـ = الناس كلٍ فيه دم وفصيله
تمت وأنا ما أنسى جميلك ولا أنساكـ = وحقك عليه فرض ما هو نفيله
أطلب لك التوفيق من عند مولاكـ = الواحد اللي كلنا نلتجي له