ليا أخذت لي مع جرهد القاع مرواس = أدله وعن قلبي تخف الحراره
مع خايعٍ ما به تزاويل وأو ناس = ما يعترض لي فيه ضو الأشاره
من فوق جمسٍ يطرب البال هواس = ليا ارتفع زوره خطيرٍ طياره
هذا هواي وكل راسٍ به أعطاس = وكلٍ على كيفه يوجه قطاره
ما همني يا منيف مدقوق الألعاس = اللي صفاره مختلط مع عفاره
يا منيف قم عطني من البوك قرطاس = عجل عليه لا تضيع العباره
عجل ترا فكري من الهجس منحاس = يقدح به الهاجوس مثل الشراره
سجل لنا بيتين من هامة الراس = بنات فكري مابهن أستعاره
هديةٍ مني شجاعة ونوماس = للي براسه للمراجل نعاره
عوين خير وللمهمات مدباس = شيخ الشيوخ اللي قديم اعتباره
ما شيخته شيخة موسوس وهلاس = اللي على ما قيل شيخة سماره
وإلا أنت يا ريف المناعير عفاس = حرٍ فرس من ماكره بالصقاره
يا ريف من مسه من الوقت مساس = عليه من سود الليالي غياره
تمشي به الدنيا على غير هولاس = يمشي وياقف بين حاره وحاره
لينه وصل بيتك بعيدٍ عن الياس = أقفى دجا ليله وشرف نهاره
بيتٍ يزورونه طوابير وأجناس = اللي على ميعاد واللي زياره
وأنا ليا جاني من الهجس هوجاس = سيرت لمحمد على جال ناره
جنبت عن هابس وخليت هباس = مالي ومال الناس كلٍ بداره
لي عند أبن عساف عادة ومجلاس = على ثلاثٍ مالياتٍ وجاره
صفرٍ مهاديفٍ على النار جلاس = فنجالهن عود القماري بهاره
يحوفهن بوجارهن تقل حراس = كنه عليهن ماسكٍ له خفاره
من فوقهن صفراً مثل صافي الماس = ليا جاه راع الكار يزهد بكاره
ما ظنتي موجود مثله مع الناس = وإن كان هو ماجود يوجد ذماره
بالطبع متواضع وفاهم وحساس = يفرق على غيره بعرف وشطاره
فيه الوفاء والدين والعرف بقياس = ونفسه عن الهفوات فيها وقاره
يستاهل التمجيد والفوز بالكاس = على بعض ناسٍ تحب التجاره
هو الأمير اللي على ذوق وأحساس = أمارة ماهي بأمارة خساره
أمارة الناموس والعز والباس = تسلسلت من راس نمر النماره
من راس أبوك وكل شيٍء على ساس = ثبت على ساس المعزه جداره
وأنت لذوي عساف يا أمير نبراس = لو ما بهم عندي من العيب باره
شيوخ عقب شيوخ قدام قرناس = رافعكم التاريخ من فوق قاره
رافعكم التاريخ عن كل لولاس = واللي يطيح من الطويله وداره
ما يختلف ضلعٍ عليه القدم داس = وبيت الشرف تبقى عليه الطهاره
تمت وأنا ماني على الناس جساس = الناس كلٍ له سفير وسفاره
وصلاة ربي عد ماهب نسناس = على نبيٍ كمل الله شعاره