سر ياقلم وكتب من الشعر ما لاق = جواهرٍ فيها من اللول عينة
اكتب سلامي بالذهب فوق الاوراق = مني لبن دواّس عجلٍ بحينه
إقراء سلامي يابو سامي ولاشواق = على عيال العم ومثمنينه
سلامٍ أحلى من العسل حلو الاذواق = واعذب من الماء من شهاليل لينة
ساق الخيال وفي هوا خاطري ساق = سوق السحاب اللي تقصّف غشينه
وندبت مطروقٍ تمركز بالأعماق = نسيم غيثٍ عانق أوراق تينة
نعمٍ بكم يأهل المكارم ولاخلاق = ياللي دعيتم ربعكم بالمدينة
ياما صخرتم للقاء كل ما شاق = علوم الرجال الوافيات الثمينة
أزريت لحصي ما نظرته بالأحداق = عيا جزيل القاف يعطي سمينه
مليون شكر مقلّداتٍ بالأعناق = لكم علينا يا نوادر مزينة
طبتم ووفّيتم على الطيب بوساق = والطيب يرفع منزلة كاسبينه
الطيب ماهو بالموايد ولاطباق = الطيب بعقول الرجال الرزينة
ياعيال عمي طيبكم باللقاء فاق = مجدٍ مع الايام طويت سنينه
قولٍ على برهان نوره بالآفاق = يسقي معاطيش الظماير معينه
و قولٍ بلا فعلٍ مصيره للإحراق = يرجع صدا قوله على قايلينه
الطيب ما يشرى ولا يباع بسواق = وهبة من اللي كلنا نستعينه
ياربعنا ياللي على الجزلة اسباق = يأهل المواقف قايدين السفينة
لكم عليّه ما انجلى الليل بشراق = قبة وفى فوق الكواكب حصينة
تمت بمدروسٍ على سبع الارناق = درة مشاعر بالضماير مكينة
فيها دليلٍ للمواجيب براق = يبني جسورٍ للمحبة متينة