كرامة اللحية في روس الأشانيب
وبعد الظلام النور يبدي شعاعه
من لايعدي في علو المراقيب
ويأخذ مع أهل العرف طيب البضاعه
ماحاز فالدنيا كبار المناصيب
من حكمته ماطاعه الحظ طاعه
الحر حر وصطوة الذيب لا الذيب
وثني العزوم محطمه وإنقطاعه
المرجله ماهي بحك العراقيب
ولاكل واحد حازها ياجماعه
المرجله طيب وفعول ومذاهيب
وأساس هاذي كلها فالشجاعه
الوقت هاذا المال سد المواجيب
المال يعطي لاالرجال المناعة
بالمال تسهلك جميع المطاليب
والضيق يرجعلك فرج وأتساعه
واللي لربعه مايصف المحاسيب
ماهو محصل من ربوعه جزاعه
قلته وأنا في لحيتي نور الشيب
عشت الزمن في طالعه وإرتجاعه
أخذت فالدنيا دروس وتجاريب
جربت منها طيبها واللكاعه
من لايروز العالية والمصاعيب
ماعندهم للواجبات استطاعه
ون طاح صكتله جميع اللواليب
لف الزمن بالصعب والصعب راعه
الحر ياخذ حصته بالمخاليب
يكفخ بجنحانه في عز ارتفاعه
خليفة المزروعي