ياوجدنا للي بهم عزه ودين= اهل الجزيله والثمينه والثمين
من حضر والا بدو ذربين اليمين=واللي يبرهن هرجته بفعالها
لكن زمان اليوم يالله النجاه =كلٍ على الطيب يومي في عصاه
الخط ابو عنوان بان لمن قراه=ماتصفق اليمنى بدون شمالها
هبت من الغربي ذعاذيح الرياح =الي تحول كل ممنوعٍ مباح
حنا بعصر العولمه والانفتاح=الشجره اللي مايظل ظلالها
قمنا نقلد كل صعلوك اجنبي=والنفس نمشي في هواها اللي تبي
هلاكنا في البعد عن نهج النبي=عزالها بعض البشر عزالها
اكالت القصعا قريب خيمت=بعض علامات القيامه تيمت
كان الرجال الفاضله ماقيمت=تراء البقيه ماتسرك حالها
يمكن بعد مده يسوقن الحريم=والوضع لاسالم ولاهو بالسليم
يالله تزينها وسترك ياكريم=ياعالمٍ بقصارها وطوالها
يعني يصير الامر بيدين المره=هذا التحرر كم من بيت ادمره
والرجل ماب ايده من الامر شعره=فرس بدون عنان ياخيالها
ويصير شيٍ يالنشاما مايقال=بس الامل بالله ثم بابو العيال
اللي يربيهم على سلم الرجال=تبا الرعيه واحدٍ يصحا لها
واللي حصل له منصبٍ دونه يذود=غير القرابه مال احد عنده وجود
وين الامانه والعوايد والعهود=العنصريه ذا زعيم ارجالها
فالواسطه ياكثر من طار ورقا=للمنصب اللي به جنابه ماهقا
ومدور اللقمه يدور مالقا=يالقمةٍ كل البشر تشقالها
لاسادو اللي مايعرفون الاصول =انكان مالك واسطه مالك قبول
يعني تعلم للنطاله مع نطول=والكف تفداء السيف لوهو شالها
ولاهو بكل الناس هذا طبعهم=ياكثر ناسٍ مثل زمزم نبعهم
اهل الوفاء يعم دايم نفعهم=صحيح نذخر للحمول جمالها
قبل الختام اهدي لكم ياهل الوفاء=لغزين يامن للجزيلات احلفاء
موروثنا الشعبي مانرضى له جفاء=ورث الاسود تورثه لاشبالها
الاسم واحد والسكن ماهم جميع=واحد تعلا فوق والثاني وضيع
عند الوضيع المال قالو مايضيع=اشوف ناسٍ ودعته اموالها
واللغز الاخر بنت مافيها عيوب=يجي لها مع داير المده وجوب
واللي بها العذروب قالو ماتنوب=واهل الجزيله جمل الله حالها
وختامها يالله تحمى المسلمين =من شر من به شر وغواه اللعين
امين قولوها معي يالسامعين=جعل الهزايم للعداء تشتالها