ودعتك الله يا اللي نص قلبـي معـه=الله يفكك من الاشرار واهـل الحسـد
يامن نهار الـوداع ازريـت لاودعـه=ودعتك الواحد الفرد الاحـد الصمـد
لاكن بوصيك في علمٍ مهـم اسمعـه=وصاة والـد يريـد المنفعـه للولـد
الراس عن كل هزلات العلوم ارفعـه=وعلى الولي الكريم المستعان اعتمـد
والرزق عند الولي ماحدٍ قدر يقطعـه=ابذل لسمعتك ياماجد جميـع الجهـد
اصمل ولاتختلف وتهـزك الزعزعـه=ترى العزوم القوية من عزوم السعـد
لاكثرت ارياك خذ من كل راي اشجعه=وايامنا طبعها بيـن الفـرح والنكـد
والضيق مادام من بعده تصير السعه=لابد من فرحةٍ تاتـي بوقـت الوعـد
ارفع حجاجك وشوف المرتفع واطلعه=لعل عيـنٍ تطمـن شوفهـا للرمـد
قدامك الباب مفتوحٍ علـى مصرعـه=والعلم مثل البناء والجهل مثل الهـدد
العلـم نـورٍ يدلـك ولعـه ولـعـه=قيل اطلب العلم من حد المهـد للحـد
انهل من العلم علم المعرفه واجمعـه=من جد ياجد ومن يزرع زروعه حصد
تخدم وطنك وتفكه من هل المطمعـه=وانته رجل والرجل في واجبه به مسد
خدمة وطنك ومليكـك كلهـا منفعـه=في خدمة الدين نمشي تحت اوامر فهد
حنا نحب الوضوح ونكـره الاقنعـه=نلتف حول القيادة مثل روح وجسـد
املوكنا فخرنا عـز الوطـن وسنعـه=أن قلت سلطان وان قلنا ولي العهـد
وبعد الثلاثـة تحيـة حـب للاربعـه=نعم القيـادة وقادتهـا ونعـم السنـد
آل السعود الفهود المعتـدي تردعـه=عز البلد والذرا والخير لاهـل البلـد