شهر الفضيله علينا هل=عادت لياليه وايامه
يارب عفوك لمن هو زل= وتعين عبدك على صيامه
،=،
انا أدري ان العرب تدري= لاكن أذكر فقط لاغير
تغانم الشهر من بدري=شهر الفضيله وشهر الخير
،=،
لاسار عندك عذر شرعي =وافطرت أخفيه لاتجاهر
ولو كنت فالشارع الفرعي=قبل الفطور انتبه ساهر
،=،
هل الشهر وابتدت فرصه=والمنتضر فرصته جاته
خليك مثل الذي حرصـه=ينفق على قدر طاقاتـه
،=،
تو الشهر ابتدى توّه = ماراحت الا ثلاث ايام
كل الذي تقدره سوّه =وصلي لاسار العباد نيام
،=،
ان كنت رغبان من جدك= ونفسك تراودك . في تركه
فرصه وجاتك على حدك = وتتحرر اليوم . من شِركه
عن الدخان=
،=،
بعض العرب يشتري أغراض = يمكن تِكفّيه للقعده
مايدري ان الأكل أمراض = لازاد حدّه على المعده
،=،
ماقدّرو شهرنا والدار = وشنّو على ( جيوبنا ) حمله
ياهل ترى فالبلد أحرار = ولاّ . البلد كلها همله ؟
،=،
الأجر من دوره يلقاه= ولايمنعه شي من دونه
يبذل على قدر مايمداه=لو أنها ( حُق ) من تونه
،=،
العام كانو هنا معنا = والكل يفطر .. مع أحبابه
واليوم تجري مدامعنا = يوم المفارق .. فتح بابه
،=،
حسن التلاوه مع التدبير= لو انها بس . تختيمه
فالشهر تلقى لها تأثير= وفالنفس تلقى . لها قيمه
،=،
بعض العرب ياعرب منصاب = مايعايش الشهر ويعيشه
الليل كله مع الاصحاب = بين البراريد والشيشه
،=،
ثلث الشهر ياللذي تحسب = روّح وقفى فغمضة عين
ولازال عندك أمل تكسب= مادام باقي منه ثلثين
،=،
كل المخاليق فاستنفار= زحمه قباء . والحرم زحمه
نطلبك يالله ياغفار = سحائب الخير والرحمه
،=،
بعض العرب منه تستغرب=كيف يتلذذ بشهر الصـوم
يسهر الن الضحى يقـرب=ويدعسلها للمغارب نـوم
،=،
من يوم هل الشهر للأن =والكل فرحان بقدومه
واجب على مثلنا ياخوان = نعوّد الطفل . ويصومه
،=،
رحماك . ياحي . ياقيوم = ياعالم السر والنجوى
حتى الذي فالذنوب يعوم = تهديه للبر والتقوى
،=،
يالمجتهد استمع باوصيك = حافظ على مكسب الاعمال
لأن بعض البشر يغويك=ويضيع كسبك وراس المال
،=،
دام العفو . للعباد مشاع = والكل له حق . ويحيزه
واحنا بعد . فالشهر لساع = ليت التسامح . لنا ميزه
،=،
ياالله يامنزل الأنعام = لك الشكر لين ماترضى
اكتب لنا . زيارة الارحام= وعيادة اخواننا المرضى
،=،
بقدوم شهر الهنا والخير = كلاً يطارد ورى الفيمتو
وانا ابارك لكم لاغير = ياحبابنا .. وين .. ماكنتو
،=،
مادام شهر الفضيله هل = جينا . نهنيك . بهلوله
ماخص واحد واعم الكل = فالمنتدى . عرضه وطوله
،=،
يانفسي أوصيك قبل الغير= عن الذي كدّرك جوزي
جوزي وحنا في شهر الخير= وفوزي بذاك الاجر فوزي
،=،
اِرسم لنفسك مع القرأن = منهج ولايختلف رتمه
تلقاك فـ .التاليه كسبان= أقلّها فـ .الشهر ختمه
،=،
مادمت تبحث عن المحتاج=تلقاه لو كان متعفّف
اِحذر تسبب له الاحراج=خليك فالوضع متلطّف
،=،
بعض العرب يدفعه حرصه=لمواصل الأهل والأرحام
هيا بنا نجعله فرصه= ونواصل اللي جفى اعوام
،=،
مامر طاغي عليه ايشار= أطغى من الطاغيه فرعون
والعام هذا طلع بشار =ياكيف شعبه عليه يهون
،=،
لابد . ياخواننا . نذكر = اخواننا . في بلاد الشام
ندعي لهم . عند مانفطر= وفي ليلنا . والعباد نيام
،=،
اِسمع عسى ربنا يرعاك= الشهر هذا عظيم أمره
أنفق على قدر مايمداك= لو . اِنها شق . من تمره
،=،
في موطني أعلنو حمله= جرياً على نهجنا . المألوف
من كان يقدر وله كمله= يدفع . وماينفقه . مخلوف
،=،
من كان عزمه على مايرام = يقلع عن التبغ والشيشه
قال الذي جربوها اعوام=لاكيف فيها ولاعيشه
،=،
با الأمس كانوهنا أعضاء= فالمنتدى كنهم شمعه
واليوم ماهم مع الأحياء= ولفراقهم نذرف الدمعه
،=،
من جانبي باخذ الموضوع = من مبدأ الجد فالفمتو
كلاً وله رأيه المشروع=والأمر بيدينكم اِنتو
،=،
يامن تهاونت فصيامك = وافطرت . يوم العباد صيام
اِحرص على باقي ايامك= واندم على ماضي الأيام
،=،
بعض الأحاديث مشهوره = ومنكر تلاقيه أو موضوع
لابد مانبين الصوره= لجل التلفظ بها ممنوع
،=،
لاشفت بعض العرب يصخب = اِحذر تجاريه بالمرّه
أبعد وبعدك لكم مكسب= عنه اِدرق واتقي شرّه
،=،
درب صغيرك بدل مايحوم=فالليل والقايله نومه
خله يجرب نهار الصوم = ويفطر اذا صابته (حومه)
،=،
يامن صلاتك فوسط البيت =حافظ على الفرض فالمسجد
واطلب من الله لك التثبيت=ياصاحبي كل . ما . تسجد
،=،
يامدوّر الكسب والأرباح= يامن بهذا الشهر شاقي
ماعاد باقي كثر ماراح= اِحرص على جزئه الباقي
،=،
شوف المخاليق مثل النهر = تجري لها فالسعي لجّه
روى البخاري في هذا الشهر= من اِعتمر كنّها حجّه
،=،
بعض العرب ياكثر حرصه =على المساهر ودوري زين
وان قلتله اغنم الفرصه=جاوبك ألحق بها بعدين
،=،
بالأمس كنا سوى نفطر = واليوم . فالقبر . وحداني
وادمعي الي بدا يقطر = كل ماتذكرت خلاني
،=،
حطو لهم . فالخلا . مركاز= والكل . جهز . تلسكوبه
واللي بلا تقنيه وجهاز= العِلّم جابه باعجوبه
،=،
يابخت منهو قضى ليله = بين المناجاة والتسبيح
كل التباريك نهديله = لجله كسب والكسول مريح
،=،
من جانبي ياوجيه الخير=اِمحلل الكل ومسامح
وان كان مني حصل للغير= عساه للي حصل دامح
تحيتي=